ក្រុមបាល់បោះរទេះនារីកម្ពុជា ចាញ់ចិនវគ្គផ្តាច់ព្រ័ត្រ ខកឱកាសទៅប៉ារ៉ាឡាំពិកប៉ារីស

កីឡាជាតិ

ជាតិ

ក្រុមបាល់បោះរទេះនារីកម្ពុជា ចាញ់ចិនវគ្គផ្តាច់ព្រ័ត្រ ខកឱកាសទៅប៉ារ៉ាឡាំពិកប៉ារីស

12, Jan 2024 , 2:19 pm

រូបភាព

ដោយ: ទេព ពិទូរ្យ

ក្រុមកីឡាការិនីជម្រើសជាតិបាល់បោះជិះរទេះនារីកម្ពុជា វិញ្ញសា៣ទល់៣ ទទួលបញ្ចប់ក្នុងចំណាត់ថ្នាក់លេខ២ ក្នុងការប្រកួតជើងឯកតំបន់អាស៊ី-អូសេអានី IWBF AOZ Championship ក្រោយចាញ់ចិនវគ្គផ្តាច់ព្រ័ត្រក្នុងលទ្ធផល ៩-៣។ មេដាយមាសចិន ទទួលបានសំបុទ្រទៅប្រកួតប៉ារ៉ាឡាំពិកក្រុងប៉ារីស ឆ្នាំ២០២៤ ខណៈកម្ពុជា សល់កៅអីទៅប្រកួតជើងឯក IWBF Women’s Repechage ឆ្នាំ២០២៤ នៅជប៉ុន។

ថៃ ជាម្ចាស់ផ្ទះរៀបចំការប្រកួតកីឡាបាល់បោះជិះរទេះជើងឯកតំបន់អាស៊ី-អូសេអានី IWBF AOZ Championship និងវគ្គជម្រុះព្រឹត្តិការណ៍កីឡាប៉ារ៉ាឡាំពិកក្រុងប៉ារីស ឆ្នាំ២០២៤ ដែលរៀបចំនៅក្រុងបាងកក ពីថ្ងៃទី១០ ដល់ទី២១ ខែមករា។ វិញ្ញាសានារី ៣ទល់៣ កម្ពុជា ស្ថិតនៅពូល B ជាមួយម្ចាស់ផ្ទះថៃ(A) អូស្ត្រាលី និងឥណ្ឌា ដោយឡែកពូល A មានឡាវ ចិន ហ្វីលីពីន និងថៃ(B)។

នៅជំនួបក្នុងពូល B ក្រុមនារីកម្ពុជា ឈ្នះទាំង៣ប្រកួត ឈរកំពូលតារាង មុនបន្តឈ្នះ២ប្រកួតទៀតនៅវគ្គ៨ក្រុមដោយឈ្នះឡាវ ១៤-៤ និងពាក់កណ្តាលផ្តាច់ព្រ័ត្រ ឈ្នះក្រុមថៃ (B) ៧-៤។

ឡើងទៅវគ្គផ្តាច់ព្រ័ត្រ ដោយត្រូវជួបចិន នៅព្រឹកថ្ងៃទី១២ ខែមករានេះ កម្ពុជារងបរាជ័យក្នុងលទ្ធផល ៩-៣។

ក្រុមបាល់បោះជិះរទេះនារីចិន វិញ្ញសា៣ទល់៣ ក្លាយជាម្ចាស់មេដាយមាស IWBF AOZ Championship ឯកម្ពុជា បានលេខ២ទទូលបានមេដាយប្រាក់។ អូស្ត្រាលី បានលេខ៣ ក្រោយឈ្នះ ថៃ(B) ក្នុងលទ្ធផល ៤-៣។

តាមរយៈលទ្ធផលនេះ ក្រុមបាល់បោះរទេះនារីចិន វិញ្ញសា៣ទល់៣ ទទួលបានកៅអីទៅប្រកួតប៉ារ៉ាឡាំពិកក្រុងប៉ារីស ឆ្នាំ២០២៤ ស្របពេលក្រុមរងជើងឯករងកម្ពុជា និងក្រុមលេខ៣ អូស្ត្រាលី ទទួលបានកៅអីប្រកួតជើងឯក IWBF Women’s Repechage ឆ្នាំ២០២៤ នៅក្រុងអូសាកា ប្រទេសជប៉ុន ឆ្នាំ២០២៤៕