នាថ្ងៃទី១២ មករា លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានចូលរួមអបអរក្នុងឱកាសដែលអង្ករកម្ពុជាចំនួន ៦ម៉ឺនតោន ស្មើនឹង ៥៤ លានដុល្លារ ត្រូវបានក្រុមហ៊ុន វ័នរ៉ូដ គ្រុប នាំចេញទៅកាន់ទីផ្សារអេមីរ៉ាតអារ៉ាប់រួម។ 

ជាមួយគ្នានេះ លោកស្រី ចម និម្មិល ក្រសួងពាណិជ្ជកម្ម បានលើកឡើងថា រដ្ឋាភិបាលកំពុងបន្តជំរុញ  និងគាំទ្រយ៉ាងពេញទំហឹងដល់ការនាំចេញកសិផលក្នុងស្រុកបង្កើតឱកាសការងារកាន់តែច្រើនសម្រាប់កសិករ និងអ្នកផលិត។ លើសពីនេះវាក៏ជាលើកកម្ពស់ការប្រកួតប្រជែងជាលក្ខណៈអន្តរជាតិនូវកសិផលរបស់កម្ពុជា ជាពិសេសស្វាគមន៍ដៃគូអន្តរជាតិនានា ដែលមកធ្វើធុរកិច្ច និងវិនិយោគនៅកម្ពុជា។
 

រដ្ឋមន្រ្តីក្រសួងពាណិជ្ជកម្មរូបនេះ បន្ថែមថា៖ «កម្ពុជានឹងមានការបញ្ជាទិញ និងនាំចេញកាន់តែច្រើនបន្ថែមទៀត និងបានស្នើឱ្យក្រសួង-ស្ថាប័ន និងដៃគូពាក់ព័ន្ធបន្តពួតដៃគ្នាក្នុងការជំរុញ និងអភិវឌ្ឍវិស័យអង្ករ

ព្រមទាំងកេរ្តិ៍ឈ្មោះអង្ករកម្ពុជាលើឆាកអន្តរជាតិ ផងដែរ»។
 

លើសពីនេះ ក្រសួងពាណិជ្ជកម្មនឹងចូលរួមរៀបចំវេទិកាផ្គូផ្គងអាជីវកម្ម ដែលនឹងរៀបចំឡើង នៅចុងខែកុម្ភៈឆ្នាំ ២០២៤ នៅទីក្រុងអាប៊ូដាប៊ី ដើម្បីជំរុញ និងបង្កើតឱកាសក្នុងការរកទីផ្សារថ្មីបន្ថែមទៀតរបស់អង្ករ​កម្ពុជា។

សូមបញ្ជាក់ថា កម្ពុជាទទួលបានចំណូលជាង ១ ៧០០លានដុល្លារពីការនាំចេញស្រូវ-អង្ករ នៅក្នុងរយៈពេល១២ខែ ឆ្នាំ២០២៣។ បើតាមសហព័ន្ធស្រូវអង្ករកម្ពុជា ទាំងចំណូល និង បរិមាណនៃការនាំចេញស្រូវ

អង្ករឆ្នាំ២០២៣ មានកំណើនខ្ពស់ជាងឆ្នាំ២០២២៕