ប្រធានសហភាពសហគមន៍បន្លែសុវត្ថិភាពកម្ពុជា ចាត់ទុកការបញ្ជៀបបន្លែសុវត្ថិភាពទៅកាន់ផ្សារបោះដុំ និងលក់រាយនៅពេលនេះ គឺជាផ្នែកមួយជួយលើកកម្ពស់សុខុមាលភាពពលរដ្ឋ ព្រោះថា បន្លែដែលដាំដុះដោយសហភាពសហគមន៍បន្លែសុវត្ថិភាពកម្ពុជា ត្រូវបានឆ្លងកាត់អ្នកបច្ចេកទេស និងការត្រួតពិនិត្យច្បាស់លាស់។ 
 

អ្នកបច្ចេកទេសទាំងអស់នោះ បានធ្វើការងារជាប់ជាមួយកសិករ ក្រោមរូបភាពបណ្ដុះបណ្ដាលការដាំដុះ និងការប្រើប្រាស់ជីថ្នាំឱ្យស្របតាមស្តង់ដារសុវត្ថិភាព ដែលកំណត់ដោយក្រសួងកសិកម្ម រុក្ខាប្រមាញ់ និងនេសាទ។ លើសពីនេះ បន្លែទាំងអស់ត្រូវបានដាំក្នុងរោងផ្ទះសំណាញ់ ដែលអាចជួយកាត់បន្ថយការប្រើប្រាស់ជីថ្នាំច្រើន ជាងការដាំដុះនៅតាមទីវាល។ 

កន្លងមក បន្លែនាំចូលពីបរទេសមួយចំនួន មិនត្រូវបានឆ្លងកាត់ការត្រួតពិនិត្យពាក់ព័ន្ធនឹងសារធាតុគីមី ឬជីថ្នាំ នោះទេ ជាហេតុបង្កឱ្យមានផលប៉ះពាល់ដល់សុខភាពអ្នកប្រើប្រាស់។
នេះជាការលើកឡើងរបស់ លោក ជួ មករា ដោយបន្ថែមដូច្នេះថា៖«បញ្ហាកន្លងមក ការនាំចូលបន្លែមួយចំនួន មិនបានឆ្លងការកាត់ត្រួតពិនិត្យលើបញ្ហាជីថ្នាំអ្វីនោះទេ ដូច្នេះ វាធ្វើឱ្យមានបញ្ហារាំរៃទៅលើសុខភាពអ្នកប្រើប្រាស់។ ដោយឡែក បន្លែដែលផលិតដោយកសិកររបស់យើងវិញ គឺយើងមានក្រុមអ្នកបច្ចេកទេស​ ត្រួតពិនិត្យច្បាស់លាស់  ដែលគាត់ធ្វើការជាប់ជាមួយកសិករ»។ 
 

បច្ចុប្បន្ន សហភាពសហគមន៍បន្លែសុវត្ថិភាពកម្ពុជា អាចផ្គត់ផ្គង់បន្លែសុវត្ថិភាពបានប្រមាណ២តោនក្នុងមួយថ្ងៃ។​ បន្លែទាំងនោះ ត្រូវបានដាំដុះដោយកសិករនៃសហគមន៍កសិកម្មពន្លឺថ្មីពេជ្រចិន្តា ស្ថិតក្នុងស្រុកភ្នំព្រឹក ខេត្តបាត់ដំបង។ សហគមន៍កសិកម្មមួយនេះ មានសមាជិកប្រមាណ៥០គ្រួសារ និងផ្ទះសំណាញ់៤០០ខ្នង៕