RFI
អន្តរជាតិ
លោកម៉ាក្រុងប្រកាសសន្យា ពង្រឹងសណ្តាប់ធ្នាប់សង្គម តម្រង់ផ្លូវយុវជន និងបន្តជួយអ៊ុយក្រែន
×
ដោយ៖ម៉ម ពិសី/RFI
លោកប្រធានាធិបតីបារាំង កំពុងនិយាយក្នុងសន្និសីទកាសែត ដែលលោករៀបចំឡើង នៅវិមានអេលីហ្សេ ថ្ងៃទី១៦ មករា ២០២៤ AP - Aurelien Morissardលោកអេម៉ានុយអែល ម៉ាក្រុង ប្រធានាធិបតីបារាំង បានធ្វើសន្និសីទកាសែតដ៏ធំមួយ កាលពីថ្ងៃទី១៦ មករា ដើម្បីបង្ហាញអំពីទស្សនវិស័យ នៃការដឹកនាំរបស់លោក។ អាណត្តិទី២របស់លោកម៉ាក្រុង បានជួបនូវបញ្ហារកាំរកូស ព្រមទាំងបានរងនូវការរិះគន់កាន់តែខ្លាំងឡើងៗ។ តើការដឹកនាំ ក្នុងរយៈពេលជិត៤ឆ្នាំទៅមុខទៀតនេះ លោកម៉ាក្រុងបានសន្យាអ្វីខ្លះ និង ផ្តល់អាទិភាពទៅលើអ្វីខ្លះ?
ដើម្បីផ្តល់សន្ទុះថ្មីដល់ការដឹកនាំរបស់ខ្លួន ដែលកាន់តែចុះខ្សោយ រងការរិះគន់មិនស្វាង លោកម៉ាក្រុង បានអញ្ជើញអ្នកកាសែតជាង២០០នាក់ ឲ្យមកអង្គុយស្តាប់លោកនិយាយ នៅវិមានអេលីហ្សេ។ ក្នុងរយៈពេលជាង២ម៉ោងនៃសន្និសីទកាសែតនេះ លោកម៉ាក្រុងបានប្រកាសនូវផែនការដឹកនាំរបស់លោក លើគ្រប់វិស័យ សម្រាប់រយៈពេល ជិត៤ឆ្នាំទៅមុខ មុននឹងលោកចប់អាណត្តិ។
លោកម៉ាក្រុងបានប្តេជ្ញាថា វិស័យអប់រំសិក្សាធិការជាតិ គឺជាអាទិភាពធំបំផុត។ លោកម៉ាក្រុងបានប្រកាសដាក់ចុះនូវផែនការថ្មី ដើម្បីតម្រង់ផ្លូវ និងពង្រឹងសមត្ថភាពសិស្សានុសិស្ស យុវជនបារាំង ដែលជាអនាគតសសរទ្រូងប្រទេសជាតិ។ រដ្ឋាភិបាលបារាំងនឹងចាប់ផ្តើម អនុវត្តសាកល្បង ឲ្យសិស្សសាលាពាក់ឯកសណ្ឋានរួម មានម៉ោងរៀនសិលធម៌-ពលរដ្ឋវិជ្ជា ព្រមទាំងពង្រឹងការអប់រំផ្នែកសិល្បៈវប្បធម៌ ដូចជាតាមរយៈការហាត់លេងល្ខោនជាដើម។ លោកម៉ាក្រុងបានអះអាងទៀត ថាលោកគាំទ្រគំនិតឲ្យសិស្សសាលា ត្រូវរៀនច្រៀងចម្រៀងជាតិបារាំង តាំងតែពីចូលឆ្នាំទី២នៃអនុវិទ្យាល័យ។ កម្មវត្ថុគឺ ដើម្បីពង្រឹងសីលធម៌សង្គម ធ្វើឲ្យសិស្សានុសិស្សបារាំង មានវិន័យល្អ មានឆន្ទៈស្រលាញ់ការសិក្សា ស្រលាញ់ស្រុកទេស និងជាពិសេសនោះ គឺមានឧត្តមគតិសាធារណរដ្ឋនិយម។
វិស័យដ៏ចាំបាច់មួយទៀត គឺសន្តិសុខសណ្តាប់ធ្នាប់សង្គម ដែលកាន់តែធ្លាក់ចុះដុនដាប។ លោកម៉ាក្រុងប្រកាសសន្យាថានឹង ប្រយុទ្ធប្រឆាំងនឹងការជួញដូរគ្រឿងញៀន គ្រប់ច្រកល្ហកទាំងអស់ក្នុងទឹកដីបារាំង ប្រយុទ្ធប្រឆាំងនឹងសកម្មភាពអសីលធម៌ ប្រយុទ្ធប្រឆាំងនឹងការផ្សព្វផ្សាយចរន្តអ៊ីស្លាមជ្រុលនិយមផ្តាច់ការ។
ទាក់ទិនជីវភាពប្រជាជនវិញ លោកម៉ាក្រុងសន្យាថា នៅឆ្នាំ២០២៥ រដ្ឋនឹងបន្ថយពន្ធ ដែលមានទឹកប្រាក់សរុបចំនួន២ពាន់លានអឺរ៉ូ ដើម្បីជួយដល់អ្នកមានចំណូលមធ្យម។ ក្នុងវិស័យសុខាភិបាល ដែលកំពុងតែជួបបញ្ហាខ្វះគ្រូពេទ្យ លោកម៉ាក្រុង បានទាមទារថាត្រូវតែ ផ្តល់ក្រដាសស្នាមស្របច្បាប់ដល់បុគ្គលិក ឬក្រុមគ្រូពេទ្យបរទេស ដែលបច្ចុប្បន្នកំពុងស្ថិតនៅលើទឹកដីបារាំង។
នៅក្នុងសំណុំរឿងអន្តរជាតិ លោកម៉ាក្រុងបានលើកឡើងថា សង្គ្រាមនៅអ៊ុយក្រែនគឺជារឿងធំបំផុត ព្រោះវាប៉ះពាល់ដោយផ្ទាល់ មកលើសន្តិសុខស្ថិរភាពរបស់បារាំង ក៏ដូចជារបស់អឺរ៉ុបទាំងមូល។ លោកម៉ាក្រុងអះអាងថា មិនអាចឲ្យរុស្ស៊ីឈ្នះសង្គ្រាមនេះជាដាច់ខាត។ ដូច្នេះ បារាំងនឹងបន្តជួយអ៊ុយក្រែនទោះចំណាយប៉ុណ្ណាក៏ដោយ។ លោកម៉ាក្រុង បានប្រកាសផ្តល់មីស៊ីលចំងាយឆ្ងាយ ប្រភេទ Scalp ចំនួនជាង៤០គ្រាប់ ព្រមទាំងគ្រប់បែកជាច្រើនរយគ្រាប់ទៀត ទៅឲ្យកងទ័ពអ៊ុយក្រែន។ ហើយនៅខែកុម្ភៈខាងមុខ លោកម៉ាក្រុងនឹងធ្វើដំណើរទៅទីក្រុងកៀវ ដើម្បីបញ្ជាក់ពីការប្តេជ្ញាចិត្តជួយអ៊ុយក្រែន។
ទាក់ទិននឹងបញ្ហានៅដើមបូព៌ាវិញ លោកម៉ាក្រុងបានលើកឡើងថា ការបន្តធ្វើសង្គ្រាមរបស់អ៊ីស្រាអែល នៅតំបន់ហ្កាហ្សា ដោយមិនប្រមាណកម្លាំង ដោយមិនខ្វល់អំពីអាយុជីវិតជនស៊ីវីលបាឡេស្ទីន វាគឺជារឿងគ្រោះថ្នាក់ខ្លាំងណាស់។ គ្រោះថ្នាក់គឺការឆាបឆេះសង្គ្រាមពេញតំបន់ ហើយគ្រោះថ្នាក់សម្រាប់សន្តិសុខអ៊ីស្រាអែលខ្លួនឯងទៅថ្ងៃមុខ ព្រោះវាធ្វើឲ្យគេចិញ្ចឹមចិត្តស្អប់ និងកំហឹងទៅលើអ៊ីស្រាអែល។ លោកម៉ាក្រុង បានបញ្ជាក់ថា ដើម្បីចៀសវៀសកុំឲ្យបញ្ហាកាន់តែរីកធំ បារាំងបានសម្រេចចិត្ត មិនចូលរួមនៅក្នុងសម្ព័ន្ធភាពអន្តរជាតិ ដែលអាមេរិកនិងអង់គ្លេសបានបង្កើតឡើង ដើម្បីប្រយុទ្ធនឹងក្រុមហ៊ូទីយេម៉ែនឡើយ៕
© រក្សាសិទ្ធិដោយ thmeythmey.com