ការងារអភិរក្សប្រាសាទ ជាការងារដ៏សំខាន់បំផុតមួយ ដើម្បីឱ្យប្រាសាទទាំងអស់នៅឈរបានបន្តទៅអនាគត។ កិច្ចការអភិរក្សប្រាង្គប្រាសាទ ត្រូវបានយកចិត្តទុកដាក់ខ្លាំងពីអាជ្ញាធរជាតិអប្សរា និងអ្នកជំនាញបរទេស។ បើតាម អាជ្ញាធរជាតិអប្សរា រាល់សកម្មភាពជួសជុល និងអភិរក្ស សុទ្ធតែស្ថិតក្រោមការត្រួតពិនិត្យរបស់ អាយស៊ីស៊ី-អង្គរ។ 

 

ក្រុមការងារផ្នែកអភិរក្ស នៃអាជ្ញាធរជាតិអប្សរា បានចាប់បដិសន្ធិឡើង ក្រោមការជួយជ្រោមជ្រែងពីអ្នកជំនាញការអន្តរជាតិ។ ចាប់ផ្ដើមពីបាតដៃទទេ អ្នកជំនាញខ្មែរ បានខិតខំរៀនសូត្ររហូត ក្លាយជាអ្នកជំនាញផ្នែកអភិរក្សប្រាង្គប្រាសាទ។ 

 

«ការងារអភិរក្ស ត្រូវការអ្នកជំនាញផ្នែក អភិរក្ស ដែលប្រៀបដូចជា ពេទ្យ និង វេជ្ជបណ្ឌិត ពីព្រោះមុនពេលយើងព្យាបាល យើងត្រូវសិក្សាជំងឺរបស់ថ្មហ្នឹង។ ថ្ម មានជំងឺច្រើន ដូច្នេះយើងត្រូវពិនិត្យ និងវាយតម្លៃ ដើម្បីរកថ្នាំព្យាបាលឱ្យត្រូវ។» នេះជាការពន្យល់របស់លោក ឡុង ណារី។