បើតាម ឡេម៉ង់ ការចូលរួមប្រកួតក្នុងកម្មវិធី«សំណេរអង្គរ»នេះ គឺជាការតេស្តនូវចំណេះដឹង  និងភាពឆ្លាសវ៉ៃ នៃការសរសេររបស់បេក្ខជនម្នាក់ៗ។  «ហេតុផលមួយទៀតដែលជំរុញឱ្យខ្ញុំមកដល់ស្ពានហាលនេះ គឺដើម្បីជួយលើកស្ទួយវប្បធម៌ និងតម្លៃភាសាជាតិរបស់ប្រទេស»។ ឡេម៉ង់ បាននិយាយបែបនេះមកកាន់សារព័ត៌មានថ្មីៗ(ThmeyThmey) ដោយបានបញ្ជាក់យ៉ាងដូច្នេះ៖ «ប្រទេសនីមួយៗ គឺមានភាសាជាតិរបស់ខ្លួន ដែល[យើង]មិនត្រូវភ្លេចភាសាជាតិរបស់ខ្លួនឡើយ ព្រោះភាសាជាតិ គឺជាអត្តសញ្ញាណជាតិ។»។

 

 

 

ការប្រកួតសរសេរតាមអានក្នុងកម្មវិធី «សំណេរអង្គរ»បានធ្វើឡើងស្ពានហាល មុខប្រាសាទអង្គវត្ត ខេត្តសៀមរាប នាថ្ងៃទី២១មករា ដែលមានបេក្ខជនជាង៧០០អង្គ/នាក់ចូលរួម ចាប់ពីអាយុក្រោម១០ឆ្នាំ រហូតដល់ជាង៦០ឆ្នាំ រួមទាំងមានវត្តមានព្រះសង្ឃផង។ កម្មវិធីនេះត្រូវបានគាំទ្រដោយក្រសួងអប់រំ យុវជន និងកីឡា, ក្រសួងវប្បធម៌ និងវិចិត្រសិល្បៈ, ក្រសួងទេសចរណ៍ សារព័ត៌មាន និងវិស័យឯកជនជាច្រើន៕