RFI
អន្តរជាតិ
ប៉ូលិសឥណ្ឌា និងជនជាតិភូមាដើរនៅលើស្ពាននៅព្រំដែនប្រទេសទាំងពីរ AP - Anupam Nath
×![]()
ដោយ៖ឈាង បុប្ផា/RFI
ឥណ្ឌាគ្រោងពង្រាយលួសបន្លា នៅតាមបណ្តោយព្រំដែនភូមា បន្ទាប់ពីជនជាតិភូមាកាន់តែច្រើន មិនថា ទាហាន ឬប្រជាជនស៊ីវិលរត់ឆ្លងដែនចូលទឹកដីឥណ្ឌាដើម្បីគេចចេញពីសង្រ្គាមហិង្សានៅភូមា។ នៅសប្តាហ៍មុន អគ្គមេបញ្ជាការកងទ័ពឥណ្ឌាបានប្រាប់កាសែតក្នុងស្រុកថា កងទ័ពភូមាជាង៤០០នាក់បានឆ្លងចូលទឹកដីឥណ្ឌា ខណៈដែលកងកម្លាំងរបស់របបសឹកបន្តជាប់ដៃប្រយុទ្ធយ៉ាងហិង្សាទល់នឹងក្រុមប្រដាប់អាវុធជនជាតិភាគតិចដែលរួមកម្លាំងជាមួយក្រុមប្រឆាំងភូមា ។
ឥណ្ឌាគ្រោងសង់របងលួសបន្លានៅតាមបណ្តោយព្រំដែនជាមួយប្រទេសភូមា និងបិទបញ្ចប់កិច្ចព្រមព្រៀងស្តីពីការធ្វើដំណើរដោយសេរីរវាងប្រទេសទាំងពីរ។ នៅក្នុងការចុះផ្សាយកាលពីថ្ងៃអាទិត្យ កាសែតក្នុងស្រុកឥណ្ឌាបានដកស្រង់ប្រសាសន៍របស់រដ្ឋមន្រ្តីក្រសួងមហាផ្ទៃលោក Amit Shah ដែលថារដ្ឋាភិបាលឥណ្ឌាបានសម្រេចចិត្តសាងសង់របងលួសនៅតាមបណ្តោយព្រំដែនឥណ្ឌា ភូមា ដែលមានប្រវែងជាង១២០០គីឡូម៉ែត្រ។
រដ្ឋមន្រ្តីមហាផ្ទៃឥណ្ឌាមិនបានបញ្ជាក់ទេ កាលបរិច្ឆេទ និងមធ្យោបាយសាងសង់របងលួសបន្លា នៅតាមបណ្តោយព្រំដែនដែលត្រូវលាតសន្ធឹងពីតំបន់ខ្ពង់រាបដាច់ស្រយាលរហូតដល់កំពូលភ្នំហិមាល័យ។
ក្រៅពីប្រកាសគម្រោងសាងសង់របងលួសនៅតាមព្រំដែនជាប់ភូមា រដ្ឋមន្រ្តីក្រសួងមហាផ្ទៃឥណ្ឌាអះអាងថា រដ្ឋាភិបាលឥណ្ឌានឹងបិទបញ្ចប់ផងដែរកិច្ចព្រមព្រៀងស្តីពីចរាចរណ៍ដោយសេរីរវាងប្រទេសទាំងពីរដែលរហូតមក បានអនុញ្ញាតឲ្យប្រជាជន រស់នៅតំបន់ជាប់ព្រំដែនភូមា ឥណ្ឌាអាចធ្វើដំណើរចេញចូលដោយសេរី ធ្វើជំនួញឆ្លងដែនដោយមិនចាំបាច់ត្រូវការសុំទិដ្ឋាការ។
រដ្ឋាភិបាលឥណ្ឌាគ្រោងសាងសង់របងលួសបន្លានៅតាមព្រំដែនជាប់ភូមា និងបិទបញ្ចប់កិច្ចព្រមព្រៀងស្តីពីការធ្វើដំណើរដោយសេរី នៅបន្ទាប់ពីមានការលើកឡើងរបស់មេបញ្ជាការទ័ពឥណ្ឌាដែលថា ក្នុងរយៈពេលតែ ២ខែ កងទ័ពភូមាជាង៤០០នាក់ដែលរត់គេចចេញពីការតាមវាយប្រហាររបស់ក្រុមប្រឆាំង បានរត់ចូលជ្រកកោនក្នុងទឹកដីឥណ្ឌា។
អាជ្ញាធរឥណ្ឌាអះអាងថា ខ្លួនបានចាប់បញ្ជូនកងទ័ពរបបសឹកទៅក្នុងប្រទេសភូមា នៅតែប៉ុន្មានថ្ងៃក្រោយពួកគេរត់ឆ្លងដែនចូលឥណ្ឌា។ នៅដើមដំបូងការចូលកាន់អំណាចរបស់ក្រុមយោធាភូមា ឥណ្ឌាធ្លាប់ផ្តល់កន្លែងជ្រកកោនដល់អ្នកប្រឆាំងភូមាដែលរត់គេចចេញពីការតាមចាប់ខ្លួនរបស់របបសឹក។ ប៉ូលិស ទាហានភូមាមួយចំនួនដែលបដិសេធមិនលើកដៃបាញ់សម្លាប់ ឬបង្រ្កាបលើបាតុករប្រឆាំងរបបសឹកក៏បានរត់ចោលជួរ ទៅសុំកន្លែងជ្រកកោនក្នុងទឹកដីឥណ្ឌាដែរ។
ចាប់តាំងពីធ្វើរដ្ឋប្រហារបណ្តេញរដ្ឋាភិបាលស៊ីវិលរបស់លោកស្រីអ៊ុងសាន ស៊ូជីនៅឆ្នាំ ២០២១ របបសឹកភូមាចាញ់ដៃប្រយុទ្ធតទល់នឹងក្រុមឧទ្ទាមប្រដាប់អាវុធជនជាតិភាគតិច។ ក្រុមនេះបានរួមកម្លាំងជាមួយក្រុមប្រឆាំងភូមា វាយដណ្តើមយកបានទីក្រុងកាន់តែច្រើននៅក្នុងរដ្ឋជាប់ព្រំដែនឥណ្ឌា បង់ក្លាដែស រួមទាំងរដ្ឋនៅជាប់ព្រំដែនចិន និងថៃ។
ជាក់ស្តែង កងទ័ពអារ៉ាខាន ក្នុងរដ្ឋរ៉ាឃីនបានអះអាងកាលពីថ្ងៃអាទិត្យទី១៤ថាពួកគេវាយបកបានទីក្រុងកំពង់ផែ Paletwa ដែលជាច្រកពាណិជ្ជកម្មសំខាន់មួយទៀតជាមួយប្រទេសជិតខាងឥណ្ឌា និងបង់ក្លាដែស៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
