បើតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទីពុធនេះ  វិទ្យាស្ថានជាតិសុខភាពសាធារណៈ បានបញ្ជាក់ពីការរកឃើញករណីជំងឺអុតស្វាទី៤នេះ ​នៅថ្ងៃទី២៣ ខែមករា ឆ្នាំ២០២៤ ​លើបុរសម្នាក់ ដែលបច្ចុប្បន្នអ្នកជំងឺត្រូវបានដាក់ឱ្យព្យាបាលនៅមន្ទីរពេទ្យ។

 

​ដើម្បីបង្ការ​ការចម្លងជំងឺអុតស្វា ក្រសួងសុខាភិបាល  បានរំឭកឱ្យ​ប្រជាពលរដ្ឋបង្កើនការប្រុងប្រយ័ត្ន និងអនុវត្តវិធានការអនាម័យឱ្យបានខ្ពស់។ 

 

ជំងឺអុតស្វា មានរោគសញ្ញាដូចជា កន្ទួលរមាស់ជាមួយពងទឹកនៅលើមុខ បាតដៃ ជើង ដងខ្លួន ភ្នែក មាត់ ឬប្រដាប់ភេទ គ្រុនក្តៅ ហើមកូនកណ្តុរ ឈឺក្បាល ឈឺសាច់ដុំ និងឈឺចង្កេះ អស់កម្លាំង។

  

ជំងឺនេះ ពីមនុស្សម្នាក់ ទៅមនុស្សម្នាក់ទៀត តាមរយៈការរួមភេទគ្រប់ទម្រង់ជាមួយអ្នកជំងឺអុតស្វា និងការប៉ះពាល់ដោយផ្ទាល់នឹងកន្លែងមានដំបៅ ទឹកសារពាង្គកាយ ទឹកមាត់ តំណក់តូចៗ តាមផ្លូវដង្ហើម និងសម្ភារប្រើប្រាស់ដែលប្រឡាក់​ជាមួយនឹងវីរុស។ ជំងឺអុតស្វា ក៏ឆ្លងពីម្ដាយទៅកូន តាមរយៈទងសុក ក្នុងអំឡុងពេលឬក្រោយពេលសម្រាល និងការប៉ះផ្ទាល់ បើស្ត្រីមានផ្ទៃពោះ ឬឪពុកម្តាយមានជំងឺអុតស្វា៕

 

​