ភ្នំពេញ៖ កម្មវិធី CAPFISH-Capture ដែលគាំទ្រដល់ការសិក្សាស្រាវជ្រាវ និងការអប់រំផ្នែកវិទ្យាសាស្ត្រជលផល បានប្រារព្ធខួប២ឆ្នាំនៃភាពជាដៃគូរវាងសហភាពអឺរ៉ុប, រដ្ឋបាលជលផល និងអង្គការ FAO។ សហភាពអឺរ៉ុប រដ្ឋបាលជលផល និងអង្គការ FAO ប្ដេជ្ញាបន្តគាំទ្រការសិក្សាស្រាវជ្រាវ និងការអប់រំផ្នែកវិទ្យាសាស្ត្រជលផល ដែលជួយដល់ជំរុញកំណើនវិស័យជលផលនៅកម្ពុជា។
២ឆ្នាំហើយ ដែលសហភាពអឺរ៉ុប, រដ្ឋបាលជលផល និងអង្គការ FAO បានគាំទ្រដល់សាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មព្រែកលៀប វិទ្យាស្ថានកសិកម្មជាតិកំពង់ចាម និងសាកលវិទ្យាល័យក្រចេះ ក្នុងការអនុវត្តកម្មវិធីចំនួនបី សម្រាប់និស្សិត។ កម្មវិធីទាំងនោះរួមមាន កម្មវិធីនិស្សិតហាត់ការជាមួយខណ្ឌរដ្ឋបាលជលផល ការគាំទ្រដល់ការកែលម្អ និងការធ្វើបច្ចុប្បន្នភាពកម្មវិធីសិក្សាសម្រាប់បរិញ្ញាបត្រវិទ្យាសាស្ត្រជលផល និងកម្មវិធីទស្សនកិច្ចសិក្សារបស់និស្សិត។
លោក ស៊្រុន លីមស៊ុង អនុប្រធានរដ្ឋបាលជលផល បានមានប្រសាសន៍ថា កម្មវិធីនិស្សិតហាត់ការនេះ ជួយឱ្យនិស្សិតបានសិក្សារៀនសូត្រប្រកបដោយលក្ខខណ្ឌវិជ្ជាជីវៈ ។ មិនតែប៉ុណ្ណោះ តាមបណ្តាខណ្ឌរដ្ឋបាលជលផល ក៏ទទួលបានអត្ថប្រយោជន៍ជាកម្លាំងការងារបន្ថែម និងចំណេះដឹងថ្មីៗ ពីនិស្សិតផងដែរ។
លោក ស៊្រុន លីមស៊ុង អនុប្រធានរដ្ឋបាលជលផល
តាមរយៈកម្មវិធីនេះ និសិ្សត និងខណ្ឌរដ្ឋបាលជលផល បានចូលរួមចំណែកដល់ការគ្រប់គ្រងជលផល ឱ្យកាន់តែប្រសើរឡើង។ ចក្ខុវិស័យរបស់រដ្ឋបាលជលផល គឺអភិវឌ្ឍការគ្រប់គ្រងជលផល តាមបែបវិទ្យាសាស្ត្រក្នុងរយៈពេលវែង ទន្ទឹមនឹងការកសាងសមត្ថភាពរបស់មន្ត្រីដែរ។ នេះបើតាមលោក លីម ស៊ុង។
លោក ឃួន អេវីរ៉ាត អនុប្រធានផ្នែកកិច្ចសហប្រតិបត្តិការរបស់ប្រតិភូនៃសហភាពអឺរ៉ុបប្រចាំកម្ពុជា បានលើកឡើងថា គម្រោងដ៏ធំមួយនេះ បានជំរុញកំណើនវិស័យជលផល និងអភិវឌ្ឍន៍វិស័យនេះ ឱ្យមានភាពប្រសើរឡើង។ លោក ឃួន អេវីរ៉ាត បន្តថា កម្មវិធីនេះ បានអនុវត្តតាមគោលនយោបាយរបស់រដ្ឋាភិបាល ដើម្បីទប់ស្កាត់ការបំផ្លាញផ្សេងៗ និងជួយឱ្យវិស័យនេះ កាន់តែរីកចម្រើន។
លោក ឃួន អេវីរ៉ាត អនុប្រធានផ្នែកកិច្ចសហប្រតិបត្តិការរបស់ប្រតិភូនៃសហភាពអឺរ៉ុបប្រចាំកម្ពុជា
កម្មវិធីនេះ ក៏ជាផ្នែកមួយជួយដល់និស្សិតផ្នែកជលផល ឱ្យមានឱកាសសិក្សារៀនសូត្របន្ថែម និងទទួលបានបទពិសោធល្អៗទៀតផង។ សម្រាប់កម្មវិធីនិស្សិតហាត់ការនេះ ពួកគេទទួលបានថវិកាចំនួន ៣ 000 ដុល្លារ ក្នុង១នាក់ ដើម្បីគាំទ្រដល់ការសិក្សាស្រាវជ្រាវ រយៈពេល៦ខែដំបូង ព្រមទាំងថវិកាឧបត្ថម្ភប្រចាំខែចំនួន ៥00 ដុល្លារ ក្នុងរយៈពេល៦ខែបន្ទាប់ សម្រាប់ចំណាយលើការស្នាក់នៅ និងម្ហូបអាហារជាដើម។ នេះបើតាមអនុប្រធានផ្នែកកិច្ចសហប្រតិបត្តិការរបស់EU។
កញ្ញា Rebekah Bell តំណាងអង្គការ FAO ប្រចាំកម្ពុជា បានឱ្យដឹងថា កម្មវិធីហាត់ការដល់និស្សិតនេះ នឹងជួយបង្កើននូវជំនាញរបស់ពួកគេ ក្នុងវិស័យជលផល និងបង្កើនការទំនាក់ទំនងជាមួយរដ្ឋាភិបាលផងដែរ។ តំណាងអង្គការ FAO ប្រចាំកម្ពុជារូបនេះ ប្ដេជ្ញាបន្តកិច្ចប្រតិបត្តិការជាមួយសាកលវិទ្យាល័យមួយចំនួន ក្នុងការលើកកម្ពស់វិស័យជលផល ជាពិសេសការសិក្សារបស់និស្សិតជលផល។
កញ្ញា Rebekah Bell តំណាងអង្គការ FAO ប្រចាំកម្ពុជា
ការសិក្សាស្រាវជ្រាវ និងការអប់រំក្នុងវិស័យជលផល គឺជាសកម្មភាពមួយ ក្នុងចំណោមសកម្មភាពជាច្រើនទៀត របស់អង្គការ FAO ។ កម្មវិធី CAPFISH-Capture នេះ មានគោលបំណង ជួយរដ្ឋាភិបាលកម្ពុជា ឱ្យសម្រេចបាននូវការអភិវឌ្ឍជលផលប្រកបដោយនិរន្តរភាព ដែលគិតគូរពីភាពធន់នឹងអាកាសធាតុនៅតំបន់ទឹកសាបនិងតំបន់ឆ្នេរ។
សូមបញ្ជាក់ថា កម្មវិធី CAPFISH-Capture ជាកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន (ផ្នែកនេសាទ) និងជាកម្មវិធីជលផលដ៏ធំបំផុតមួយរបស់សហភាពអឺរ៉ុប។ កម្មវិធីនេះ មានគោលបំណងធ្វើឱ្យប្រសើរឡើងនូវការគ្រប់គ្រង ការអភិរក្សជលផល និងការអនុវត្តច្បាប់ និងបទប្បញ្ញត្តិនានាស្តីពីជលផល រួមទាំងផែនការសកម្មភាពដើម្បីទប់ស្កាត់ និងលុបបំបាត់ការនេសាទខុសច្បាប់ ក្នុងដែននេសាទសមុទ្រ និងទឹកសាប៕