អន្តរជាតិ
ប្រធានាធិបតីជាប់ឆ្នោតតៃវ៉ាន់ សង្ឃឹមទទួលបានការគាំទ្រដ៏រឹងមាំពីអាម៉េរិក (ពីឆ្វេងទៅស្តាំ) សមាជិកសភាអាម៉េរិក លោក Ami Bera, សមាជិកសភាអាម៉េរិក Mario Diaz-Balart, ប្រធានាធិបតីជាប់ឆ្នោតតៃវ៉ាន់ លោក William Lai និងអនុប្រធានាធិបតីជាប់ឆ្នោតតៃវ៉ាន់ លោកស្រី Hsiao Bi-khim នៅថ្ងៃទី២៥ ខែមករា។ រូបភាព AFP
× ប្រធានាធីបតីជាប់ឆ្នោតតៃវ៉ាន់ លោក William Lai នៅថ្ងៃទី២៥ ខែមករា បានប្រាប់សមាជិកសភាអាម៉េរិកថា រដ្ឋាភិបាលក្រុងវ៉ាស៊ីនតោន នឹងនៅតែបន្តការគាំទ្រដ៏រឹងមាំសម្រាប់តៃវ៉ាន់ ស្របគ្នានឹងប្រឈមមុខកាន់តែតឹងតែងជាមួយចិន។
លោក William Lai ប្រធានបក្សកាន់អំណាចគណបក្សប្រជាធិបតេយ្យជឿនលឿន (DPP) និងជា ប្រធានាធិបតីជាប់ឆ្នោតដែលនឹងចូលកាន់តំណែងនៅថ្ងៃទី២០ ខែឧសភា ជួបជាមួយក្រមសមាជិកសភាតំណាងអាម៉េរិកទទួលបន្ទុកបញ្ហាតៃវ៉ាន់ដឹកនាំដោយសមាជិកលោក Mario Diaz-Balart និងលោក Ami Bera ។ ក្នុងជំនួបនេះ ប្រធានាធិបតីជាប់ឆ្នោតតៃវ៉ាន់ និយាយថា លទ្ធិប្រជាធិបតេយ្យ និងសេរីភាពគឺជាតម្លៃរួមជាមួយអាម៉េរិក។
«តៃវ៉ាន់ស្ថិតនៅក្នុងជួរខ្សែកោះទីមួយ ហើយឈរនៅលើខ្សែបន្ទាត់ជួរមុខនៃការពង្រីកអំណាចផ្តាច់ការរបស់ចិន។ នេះធ្វើឱ្យតៃវ៉ាន់ក្លាយជាទីតាំងយុទ្ធសាស្ត្រដ៏សំខាន់។ ស្ថិរភាពនៅ ទូទាំងច្រកសមុទ្រតៃវ៉ាន់មានសារសំខាន់ខ្លាំងណាស់ចំពោះសន្តិភាព និងវិបុលភាពក្នុងតំបន់ និងពិភពលោក»។ លោក Lai និយាយបែបនេះ ដោយបន្ថែមថា លោកនឹងបន្តការពារស្ថានភាពឆ្លងកាត់ច្រកសមុទ្រតៃវ៉ាន់ឱ្យមានសន្តិភាព និងស្ថិរភាព។
មេដឹកនាំតៃវ៉ាន់ក៏បានសង្ឃឹមថា អាម៉េរិកអាចបន្តគាំទ្រតៃវ៉ាន់ធ្វើឱ្យកិច្ចសហប្រតិបត្តិការ និងទំនាក់ទំនងទ្វេភាគីស៊ីជម្រៅជាងមុន ហើយធ្វើការជាមួយដៃគូប្រជាធិបតេយ្យផ្សេងទៀតដើម្បីធានាសន្តិភាព និងវិបុលភាពនៅក្នុងតំបន់។
ជាការឆ្លើយតប សមាជិកសភាអាម៉េរិក នៅតែបន្តគាំទ្ររដ្ឋាភិបាលក្រុងតៃប៉ិ។ លោក Diaz-Balart បានប្រាប់លោក Lai ថា ការគាំទ្ររបស់អាម៉េរិកចំពោះតៃវ៉ាន់គឺរឹងមាំពិតប្រាកដ ១០០ ភាគរយ។ លោកកត់សម្គាល់ថា តៃវ៉ាន់មានការគាំទ្រពីសភាអាម៉េរិកផងដែរ។
ថ្លែងទៅកាន់អ្នកសារព័ត៌មាន លោក Bera ដែលមានតួនាទីនៅគណៈកម្មាធិការសភាទទួលបន្ទុកកិច្ចការបរទេស បានអះអាងថា លោករំពឹងទីក្រុងប៉េកាំងអាចនឹងធ្វើរឿងមួយចំនួនចំពោះតៃវ៉ាន់ដែលប៉ះពាល់ដល់សន្តិភាព និងស្ថិរភាព មុនពេលលោក Lai ចូលកាន់តំណែងនៅខែឧសភា។ ត្រង់ចំណុចនេះ សមាជិកសភាអាម៉េរិក ជំរុញឱ្យចិនកុំធ្វើសកម្មភាពអ្វីផ្តេសផ្តាស។
«សាររបស់ខ្ញុំចំពោះក្រុងប៉េកាំងៈ សូមកុំធ្វើវា»។ លោក Bera បានលើកឡើងបែបនេះ ដោយបន្តជំរុញជាថ្មីឱ្យរក្សាស្ថានភាពបច្ចុប្បន្នលើកោះតៃវ៉ាន់។
ចិន នៅតែបង្ហាញការប្តេជ្ញាបង្រួបបង្រួមកោះតៃវ៉ាន់ ហើយថែមទាំងមិនរុញរាក្នុងការប្រើកម្លាំងយោធា ដើម្បីវាយប្រហារ ប្រសិនបើដែនកោះមួយនេះ ហ៊ានប្រកាសឯករាជ្យ៕
© រក្សាសិទ្ធិដោយ thmeythmey.com