ចិន និងថៃបានចុះហត្ថលេខាលើកិច្ចព្រមព្រៀងលើកលែងទិដ្ឋាការ នៅថ្ងៃទី២៨ ខែមករាដែលអនុញ្ញាតឱ្យប្រជាជនប្រទេសទាំងពីរចេញ-ចូល ដោយគ្មានទិដ្ឋាការរយៈពេល៣០ថ្ងៃ ដោយចូលជាធរមានចាប់ពីថ្ងៃទី១ ខែមីនា។
ការចុះហត្ថលេខាលើកិច្ចព្រមព្រៀងលើកលែងទិដ្ឋាការនេះ ធ្វើឡើងនៅក្នុងដំណើរទស្សនកិច្ចរបស់រដ្ឋមន្ត្រីការបរទេសចិន លោក វ៉ាង យី ទៅកាន់ទីក្រុងបាងកក។ កិច្ចព្រមព្រៀងនេះ នឹងអនុញ្ញាតឱ្យប្រជាជនអាចទៅកម្សាន្តចិន-ថៃ ដោយពុំចាំបាច់ទិដ្ឋាការ ចាប់ពីថ្ងៃទី១ ខែមីនាឆ្នាំ២០២៤។
រដ្ឋាភិបាលថៃ រំពឹងថា កិច្ចព្រមព្រៀងនេះ នឹងលើកទឹកចិត្តជនជាតិចិន កាន់តែច្រើនចូលមកក្នុងប្រទេសនេះ ដើម្បីជំរុញទេសចរណ៍ ដែលជាវិស័យសេដ្ឋកិច្ចដ៏សំខាន់មួយ ដែលកំពុងស្វែងរកការងើបឡើងវិញ បន្ទាប់ពីរងផលប៉ះពាល់យ៉ាងធ្ងន់ធ្ងរដោយជំងឺរាតត្បាតកូវីដ-១៩។
ថ្លែងបន្ទាប់ពីពិធីចុះហត្ថលេខា រដ្ឋមន្ត្រីការបរទេសថៃលោក Parnpree Bahiddha-Nukara បានបញ្ជាក់ថា កិច្ចព្រមព្រៀងនេះ នឹងជួយជំរុញវិស័យទេសចរណ៍ប្រទេសទាំងពីរ ខណៈដែលសមភាគីចិនលោក វ៉ាង យី ក៏បានស្វាគមន៍ចំពោះកិច្ចព្រមព្រៀងនេះដែរ។
ទោះបីជាព័ត៌មានលម្អិតនៃកិច្ចព្រមព្រៀង មិនត្រូវបានប្រកាសក៏ដោយ ក៏មន្ត្រីថៃ បាននិយាយកាលពីដើមខែនេះថា កិច្ចព្រមព្រៀងនឹងអនុញ្ញាតឱ្យប្រជាជនប្រទេសទាំងពីរ អាចទៅកម្សាន្តទៅមកបានរយៈពេល ៣០ថ្ងៃ ដោយគ្មានទិដ្ឋាការ។
ចិនជាប្រទេសដែលមានភ្ញៀវទេសចរទៅកម្សាន្តនៅថៃច្រើនជាងគេ មុនពេលជំងឺរាតត្បាតកូវីដ-១៩ផ្ទុះឡើង។ យ៉ាងណា ប្រភពទេសចរចិនបានធ្លាក់ចុះបន្តិច ទោះស្ថានភាពជំងឺកូវីដ-១៩ បានធូរស្រាល។
នៅឆ្នាំ២០២៣ ចំនួនអ្នកទេសចរចិនមកកម្សាន្តនៅថៃមានប្រមាណ ៣,៤លាននាក់ ដែលជាការថយចុះយ៉ាងខ្លាំងបើធៀបនឹង ១១លាននាក់ដែលបានកត់ត្រាក្នុងឆ្នាំ ២០១៩ ។
យោងតាមក្រសួងការបរទេសចិន លោក វ៉ាង យី បានទៅបំពេញទស្សនកិច្ចនៅថៃ ចាប់ពីថ្ងៃទី ២៦-២៩ ខែមករា តបតាមការអញ្ជើញរបស់ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ លោក Parnpree Bahiddha-Nukara។
នៅទីក្រុងបាងកក ប្រមុខការទូតចិនរូបនេះ ក៏បានជួបពិភាក្សាជាមួយទីប្រឹក្សាសន្តិសុខជាតិអាម៉េរិក លោក Jake Sullivan ដោយពិភាក្សាអំពីបញ្ហាក្នុងតំបន់ និងអន្តរជាតិ៕