លោកស្រី Marlar Than Htaik លេខាធិការអចិន្ត្រៃយ៍នៃក្រសួងការបរទេសក្រោមការគ្រប់គ្រងរបស់របបយោធា ជាតំណាងឲ្យមីយ៉ាន់ម៉ាចូលរួមប្រជុំជាមួយរដ្ឋមន្ត្រីការបរទេសអាស៊ាននៅថ្ងៃទី២៩ ខែមករានៅទីក្រុងហ្លួងព្រះបាង។ នេះបើតាមកាសែត South China Morning Post ។

 

មីយ៉ាន់ម៉ាបានធ្វើពហិការមិនចូលរួមកិច្ចប្រជុំថ្នាក់រដ្ឋមន្ត្រី ចាប់តាំងពីសមាជិកអាស៊ានបានសម្រេចចិត្តក្នុងខែតុលា ឆ្នាំ២០២១ ដោយអនុញ្ញាតឱ្យមានតែតំណាងមិននយោបាយមកពីប្រទេសនេះចូលរួមតែប៉ុណ្ណោះ។ មិនពេញចិត្តនឹងការសម្រេចនេះ របបយោធា មិនបានបញ្ជូនណាមួយទៅចូលរួមកិច្ចប្រជុំរដ្ឋមន្រ្តីការបរទេស ឬកិច្ចប្រជុំកំពូលឡើយ។

 

វិបត្តិនយោបាយ និងមនុស្សធម៌ក្នុងនៅមីយ៉ានម៉ាកាន់តែមានសភាពធ្ងន់ធ្ងរចាប់តាំងពីរដ្ឋប្រហារ ដោយការប៉ះទង្គិចគ្នាខ្លាំងឡើងជាមួយក្រុមយោធានៅភាគខាងជើងប្រទេស ព្រមទាំងធ្វើឱ្យប្រជាជនភៀសខ្លួនកើនឡើងដល់ ២,៦លាននាក់គិតត្រឹមដំណាច់ឆ្នាំ ២០២៣ ។

 

ទន្ទឹមនេះ ក្រុមឧក្រិដ្ឋជនបានកេងប្រវ័ញ្ចផលចំណេញ ស្របពេលមានភាពចលាចលនយោបាយនៅមីយ៉ាន់ម៉ា ដោយបង្កើនការផលិតគ្រឿងញៀន និងការបោកប្រាស់តាមអ៊ីនធឺណិតកើនឡើងខ្លាំង។

 

អាស៊ានមិនទាន់អាចធ្វើអ្វីបានជាផ្លែផ្កានៅឡើយទេរយៈពេល៣ឆ្នាំមកនេះ ដើម្បីឆ្ពោះទៅរកដំណោះស្រាយនៅក្នុងប្រទេសមីយ៉ាន់ម៉ា ក្រៅតែពីអំពាវនាវឱ្យបញ្ចប់អំពើហិង្សាក្នុងប្រទេស និងតែងតាំងបេសកជនពិសេសអាស៊ានទៅចួបជាមួយភាគីពាក់ព័ន្ធទាំងអស់ដូចជាការផ្តល់ជំនួយមនុស្សធម៌ជាដើម។ 

 

បេសកជនពិសេសអាស៊ានបច្ចុប្បន្នប្រចាំមីយ៉ាន់ម៉ាគឺ អ្នកការទូតឡាវ Alounkeo Kittikhoun បានជួបជាមួយមេដឹកនាំរបបយោធាមីយ៉ាន់ម៉ា លោក មីន អ៊ុងឡាំង ក៏ដូចជាលោកស្រី Zin Mar Aung រដ្ឋមន្ត្រីការបរទេសនៃរដ្ឋាភិបាលរួបរួមជាតិដែរ៕