ជាតិ
ការកំណែវិញ្ញាសាប្រឡង ត្រូវគិតគូរឱ្យមានតម្លាភាពសម្រាប់បេក្ខជន និងសាធារណជន
×![]()
ភ្នំពេញ៖ នៅព្រឹកថ្ងៃទី២៩ មករានេះ គណៈកម្មការរៀបចំការប្រឡងប្រជែងជ្រើសរើសគ្រូបង្រៀនឯកទេសអប់រំកាយ និងកីឡា បានចាប់ផ្ដើមដំណើរការកំណែវិញ្ញាសាសរសេរ។ ក្នុងដំណើរការកំណែនេះ លោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ លើកឡើងថា ការកំណែនេះ នឹងត្រូវគិតគូរធានាឱ្យមានតម្លាភាពសម្រាប់បេក្ខជន និងសាធារណជន។
ដំណើរការប្រឡងលើវិញ្ញាសាសរសេរ នៃការប្រឡងប្រជែងជ្រើសរើសគ្រូបង្រៀនឯកទេសអប់រំ និងកីឡា បានបញ្ចប់ដោយរលូន។ បន្ទាប់ពី បញ្ចប់ដំណើរការប្រឡងលើវិញ្ញាសាសរសេរ នៅថ្ងៃទី២៨ មករា ដំណើរការកំណែ បានចាប់ផ្ដើមនៅព្រឹកនេះ។ ដំណើរការកំណែ ប្រព្រឹត្តទៅក្រោមការសង្កេតការណ៍ពីអង្គភាពប្រឆាំងអំពើពុករលួយ សាធារណជនទូទៅ និងសិស្សនិស្សិតផងដែរ។
លោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជាអនុប្រធានគណៈកម្មការរៀបចំការប្រឡង បានមានប្រសាសន៍ថា ការធ្វើកំណែវិញ្ញាសាសរសេរនេះ នឹងត្រូវគិតគូរធានាឱ្យមានតម្លាភាពសម្រាប់បេក្ខជន និងសាធារណជន។ បើតាមរដ្ឋលេខាធិការប្រចាំការរូបនេះ នីតិវិធីនៃការកែ គឺផ្អែកលើប្រព័ន្ធចុះលេខសម្ងាត់ជាលក្ខណៈអាណាមិក។ ជាមួយគ្នានេះ ការកំណែនេះ នឹងកែដោយលម្អិត និងច្បាស់លាស់ពីក្រុមលោកគ្រូអ្នកគ្រូដែលទទួលបន្ទុកផ្នែករៀបចំវិញ្ញាសា។
សូមអញ្ជើញទស្សនាវីដេអូដូចតទៅ៖
វិញ្ញាសាអនុវត្តកីឡា នឹងរៀបចំនៅរសៀលថ្ងៃទី២៩ មករានេះ នឹងបន្តរយៈពេល៨ថ្ងៃ សម្រាប់វិញ្ញាសារត់ល្បឿន, លោតចម្ងាយ និងចោលដុំដែក។ លោក ប៊ុនណា បញ្ជាក់ថាតាមការគ្រោងទុក លទ្ធផលនៃការប្រឡងនេះ នឹងប្រកាសនៅថ្ងៃទី៥ កុម្ភៈខាងមុខផងដែរ។
ក្រោយប្រឡងជាប់បេក្ខជនទាំងអស់ ត្រូវចូលរួមបណ្ដុះបណ្ដាលរយៈពេល ២ឆ្នាំ សម្រាប់កម្រិត១២+២ និងរយៈពេល៤ឆ្នាំ សម្រាប់កម្រិត១២+៤។ ក្នុងករណីបេក្ខជនបោះបង់នៅអំឡុងពេលបណ្ដុះបណ្ដាល គណៈកម្មការរៀបចំការប្រឡង នឹងផ្ដល់ឱកាសដល់បេក្ខជនជាប់បម្រុង។
សូមបញ្ជាក់ថា បន្ទាប់ពីបណ្ដុះបណ្ដាលរួច គ្រូបង្រៀនឯកទេសអប់រំកាយ និងកីឡាទាំង១០០នាក់ នឹងចេញទៅបង្រៀននៅតាមអនុវិទ្យាល័យ និងវិទ្យាល័យ ដែលបានជ្រើសរើស។ សូមបញ្ជាក់ថា ការប្រឡងនេះ មានបេក្ខជនចូលរួមជិត ២០០០នាក់ ដោយបែងចែកជាពីរកម្រិត គឺការបណ្ដុះបណ្ដាលគ្រូបង្រៀនកម្រិតមូលដ្ឋាន១២+២ ចំនួន ១៤៤៥នាក់ និងកម្រិតមូលដ្ឋាន ១២+៤ ចំនួន ៤៤៧នាក់៕
Tag:
ប្រឡង
គ្រូបង្រៀន
តម្លាភាព
អប់រំកាយ
កីឡា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
