បើតាមលោក ស៊ា សុផល ប្រធានអង្គការមូលនិធិទំពាំងស្នងឫស្សី ចលនាយុទ្ធនាការនេះនឹងបន្តសកម្មភាពសម្អាតរយៈពេល៦ខែ នៅគ្រប់សហគមន៍នានាជាប់មាត់បឹងទន្លេសាប ដូចជាសហគមន៍កំពង់ភ្លុក ចុងឃ្នៀស និងសហគមន៍មេជ្រៃ។ ប្រធានអង្គការមូលនិធិទំពាំងស្នងឫស្សីរូបនេះ បានបន្តទៀតថា យុទ្ធនាការនេះ ក៏នឹងអាចពង្រីកវិសាលភាពការងារសម្អាត ដល់តំបន់ព្រែកទាល់ក្នុងខេត្តបាត់ដំបង និងតំបន់ផ្សេងៗទៀត ជុំវិញបឹងទន្លេសាប។ យុទ្ធនាការនេះ នឹងបន្តរហូតដល់ថ្ងៃអបអរទិវាបរិស្ថានជាតិ និង បរិស្ថានពិភពលោក ៥មិថុនា ដែលជាថ្ងៃកំណត់ការបិទយុទ្ធនាការសម្អាតបរិស្ថាននារដូវទឹកស្រកផងដែរ។

 

គួរជម្រាបផងដែរថា នេះជាឆ្នាំទី៦ហើយ ដែលអង្គការមូលនិធិទំពាំងស្នងឫស្សី បានរៀបចំយុទ្ធនាការនេះឡើង និងសហការជាមួយមន្ទីរបរិស្ថាន សមាគមមគ្គុទេស្ទក៍ទេសចរណ៍អង្គរ អាជ្ញាធរមូលដ្ឋាន សហគមន៍ទេសចរណ៍ ក្រុមហ៊ុនឯកជន អង្គការ សិស្សានុសិស្ស និងពលរដ្ឋសហគមន៍ ជាដើម៕