RFI
អន្តរជាតិ
Toyota ផ្អាកការបញ្ជូនរថយន្ត១០ម៉ូឌែលទៅលក់ ក្រោយរឿងអាស្រូវតេស្តម៉ាស៊ីន Toyotaផ្អាកការបញ្ជូនរថយន្ត១០មូឌែលចេញទៅលក់ ក្រោយរឿងអាស្រូវតេស្តម៉ាស៊ីន © AP/Altaf Qadri
×
ដោយ៖អៀង សុខម៉ិញ
ក្រុមហ៊ុនយានយន្តតូយ៉ូតា ដ៏ល្បីល្បាញរបស់ជប៉ុន បានប្រកាសនៅថ្ងៃចន្ទទី ២៩មករា២០២៤នេះ ផ្អាកការបញ្ជូនឱ្យអតិថិជននូវរថយន្តប្រើប្រេងម៉ាហ្សូត ចំនួន១០ម៉ូឌែល។ សេចក្តីសម្រេចនេះធ្វើឡើងក្រោយពីក្រុមហ៊ុនបានរកឃើញមានភាពមិនប្រក្រតីមួយចំនួនទាក់ទងនឹងការធ្វើតេស្តមើលកម្លាំងម៉ាស៊ីន។
ឡានខ្លះមានលក់នៅលើទីផ្សារអាស៊ីផង អឺរ៉ុបផង និងដើមបូព៌ាផង ដូចជាឡានមួយបាំងកន្លះ Pick up Hilux, Land Cruiser 300, SUV Fortuner និង LX500d ... តែគ្មានទេម៉ូឌែលដែលលក់នៅខាងអាមេរិក។ ជាសរុបមានរថយន្តតូយ៉ូតាប្រើប្រេងម៉ាហ្សូត ចំនួន១០ប្រភេទ ត្រូវជាប់បម្រាមមិនឱ្យបញ្ចេញទៅជូនអតិថិជនមួយរយៈសិន។
មូលហេតុមកពីមានរបាយការណ៍ឯករាជ្យមួយផ្តួចផ្តើមសិក្សាដោយក្រុមហ៊ុនតូយ៉ូតាផ្ទាល់ និងដែលក្រុមហ៊ុនទើបប្រគល់ទៅឱ្យក្រសួងដឹកជញ្ជូនជប៉ុននៅថ្ងៃចន្ទនេះ បានរកឃើញថាពិតមានម៉ាស៊ីនម៉ាហ្សូតបី ផលិតដោយToyota ខ្លួនឯង ជាប់ពាក់ព័ន្ធនឹងភាពមិនប្រក្រតីទាក់ទងនឹងការធ្វើតេស្តបញ្ជាក់កម្លាំងរបស់ម៉ាស៊ីនឡាន។ នៅពេលធ្វើតេស្តបញ្ជាក់កម្លាំងរបស់ម៉ាស៊ីនម៉ាហ្ស៊ូតនោះ គេបានប្រើកម្មវិធីផ្សេងដែលខុសពីកម្មវិធីមានប្រើក្នុងសង្វាក់ផលិតកម្ម ដើម្បីកុំឱ្យមានលទ្ធផលប្រែប្រួលពេក។ នេះបើតាមសេចក្តីថ្លែងការណ៍របស់តូយ៉ូតា ដែលធានាថាម៉ាស៊ីន និងរថយន្តជាប់ពាក់ព័ន្ធ ឆ្លើយតបទាំងស្រុងនៅនឹងបទដ្ឋានចរាចរណ៍ និងគ្មានហេតុផលអ្វីត្រូវបញ្ឈប់ការប្រើយានយន្តទាំងអស់នោះទេ។ ប៉ុន្តែក្រុមហ៊ុនសម្រេចផ្អាកការបញ្ជូនម៉ាស៊ីន និងរថយន្តមានបំពាក់ម៉ាស៊ីនម៉ាហ្សូតប្រភេទនេះ ទៅឱ្យអតិថិជន ជាបណ្តោះអាសន្ន ស្របទៅតាមសំណើរបស់ក្រសួង។
នៅក្នុងសេចក្តីថ្លែងការណ៍ដដែល តូយ៉ូតាបានទទួលស្គាល់ថាជាកំហុសដ៏ធ្ងន់ធ្ងរដែលក្រុមហ៊ុនត្រូវជួបភាពមិនប្រក្រតីក្នុងពេលធ្វើតេស្តបញ្ជាក់សមត្ថភាពម៉ាស៊ីនម្តងហើយម្តងទៀត។ សូមបញ្ជាក់ថា នេះជារឿងអាម៉ាសមួយបន្ថែមទៀតដែលមកប្រលាក់ប្រលូសក្រុមហ៊ុនផលិតរថយន្តលំដាប់ទីមួយពិភពលោក។ កាលពីខែមីនា២០២៣ តូយ៉ូតាប្រកាសរកឃើញភាពមិនធម្មតាពេលធ្វើតេស្តម៉ាស៊ីនយានយន្តប្រភេទDaihatsu បន្ទាប់មកTico។
តូយ៉ូតាមិនបានលម្អិតអំពីផលប៉ះពាល់នៃការផ្អាកបញ្ជូនរថយន្តទៅឱ្យអតិថិជននេះទេ។ ប៉ុន្តែបើតាមក្រុមហ៊ុន ក្នុងចំណោមរថយន្តទាំង១០ម៉ូឌែល មួយឈប់ផលិតហើយ និង៩ម៉ូឌែលទៀតផលិតក្នុងមួយខែ៣៦៥០០គ្រឿង នៅលើពិភពលោក៕
© រក្សាសិទ្ធិដោយ thmeythmey.com