សេដ្ឋកិច្ចអន្តរជាតិ
អន្តរជាតិ
វៀតណាមមានចំណែក៨៥ភាគរយនៃការនាំចូលអង្កររបស់ហ្វីលីពីន ការនាំអង្ករចេញតាមផ្លុវទឹកមួយកន្លែងនៅទីក្រុងហូជីមិញ ។ រូបភាព ៖ VNA
× វៀតណាម ជាប្រទេសនាំចេញអង្ករធំបំផុតទៅកាន់ហ្វីលីពីនដែលមានចំនួន ៨៥ភាគរយនៃចំណែកទីផ្សារនាំចូលអង្កររបស់ប្រទេសនេះ។ នេះបើយោងតាមសារព័ត៌មាន VnExpress។
ហ្វីលីពីនជាប្រទេសផលិត ប៉ុន្តែទិន្នផលអង្ករក្នុងស្រុកនាប៉ុន្មានឆ្នាំចុងក្រោយនេះ មិនអាចផ្គត់ផ្គង់តម្រូវការក្នុងស្រុកគ្រប់គ្រាន់ទេ។ ក្នុងមួយឆ្នាំ ប្រទេសនេះត្រូវនាំចូលអង្ករពី ២,៥ទៅ៣,៥ លានតោន ដើម្បីធានាតម្រូវការប្រើប្រាស់ និងទុកបម្រុង។
សារព័ត៌មាន VnExpress បានដកស្រង់សម្តីរដ្ឋមន្ត្រីកសិកម្មហ្វីលីពីន Francisco Tiu Laurel Jr ដែលបានធ្វើទស្សនកិច្ចនៅវៀតណាមកាលពីថ្ងៃទី២៩ ខែមករា ថា បច្ចុប្បន្នវៀតណាមមាន៨៥ភាគរយនៃការនាំចូលអង្កររបស់ហ្វីលីពីន។ លោកបានស្នើឲ្យវៀតណាមពង្រីកការនាំចេញអង្ករបន្ថែមទៀត។
ជាការឆ្លើយតប រដ្ឋមន្ត្រីលោកពាណិជ្ជកម្ម Nguyen Hong Dien បានលើកឡើងថា វៀតណាមត្រៀមខ្លួនជាស្រេចក្នុងការផ្តល់នូវស្ថិរភាព និងភាពយូរអង្វែងក្នុងការផ្គត់ផ្គង់អង្ករទៅកាន់ហ្វីលីពីន ព្រោះជាទីផ្សារនាំចេញដ៏សំខាន់មួយក្នុងចំណោមទីផ្សារនាំចេញសំខាន់ៗផ្សេងទៀត។
ក្នុងឱកាសនោះ វៀតណាម និងហ្វីលីពីន ចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការពាណិជ្ជកម្មអង្ករ សំដៅជំរុញ និងបង្កើនកិច្ចសហប្រតិបត្តិការយ៉ាងសកម្មរវាងប្រទេសទាំងពីរក្នុងវិស័យនេះក្នុងរយៈពេល ៥ឆ្នាំខាងមុខ។
យោងតាមទិន្នន័យរបស់ក្រសួងឧស្សាហកម្ម និងពាណិជ្ជកម្មវៀតណាម នៅឆ្នាំ២០២៣ ការនាំចេញអង្កររបស់វៀតណាមទៅកាន់ហ្វីលីពីនសម្រេចបាន១,៧៥ពាន់លានដុល្លារ កើនឡើងជិត១៨ភាគរយបើធៀបនឹងឆ្នាំ២០២២។ ក្រៅពីកិច្ចសហប្រតិបត្តិការលើទីផ្សារអង្ករ លោក Nguyen Hong Dien បានស្នើរឲ្យភាគីហ្វីលីពីនពង្រីកទីផ្សារផលិតផលផ្លែឈើ បសុសត្វ និងផលិតផលសាច់បសុបក្សីពីវៀតណាម។
ហ្វីលីពីន ជាទីផ្សារដ៏មានសក្តានុពលសម្រាប់ការការនាំចូលផលិតផលទំនិញ ដោយមានប្រជាជនចំនួន ១១៣លាននាក់នៅឆ្នាំ 2023។ ប្រទេសនេះមានទំហំសេដ្ឋកិច្ច (GDP) ប្រហែល ៤០០ពាន់លានដុល្លារ និងប្រាក់ចំណូលជាមធ្យមសម្រាប់មនុស្សម្នាក់ជាង ៣៥០០ដុល្លារ៕
Tag:
វៀតណាម
ហ្វីលីពីន
អង្ករ
© រក្សាសិទ្ធិដោយ thmeythmey.com