នៅក្នុងពិធី «បិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្ត ឆ្នាំ២០២៤​ របស់ក្រសួងកសិកម្ម រុក្ខាប្រមាញ់​ និងនេសាទ» នៅថ្ងៃទី៣០មករា សម្ដេច​ ហ៊ុន ម៉ាណែត បានលើកឡើងពីការប្ដេជ្ញាចិត្តការពារបឹងទន្លេសាបឱ្យបាន ដើម្បីផ្ដល់ប្រយោជន៍រយៈពេលវែងសម្រាប់ជាតិ។ 
 

ក្នុងកិច្ចការងារនេះ សម្ដេច បញ្ជាឱ្យរដ្ឋបាលខេត្តចំនួន៦ ដែលមានព្រំប្រទល់ជាប់បឹងទន្លេសាប រួមគ្នាការពារឱ្យបានម៉ត់ចត់ ជាពិសេសពង្រឹងភាពម្ចាស់ការទប់ស្កាត់ការទន្រ្ទានយកដីតំបន់ព្រៃទឹកសាប។ នាយករដ្ឋមន្រ្តីរូបនេះ ព្រមានប្រើអំណាចចុងប៉ិច ឬអភិក្រម៥ ដើម្បីវះកាត់ ប្រសិនបើការដឹកនាំរដ្ឋបាលនីមួយៗគ្មានវិន័យ និងគ្មានការទទួលខុសត្រូវ។  

រដ្ឋបាលខេត្តទាំង៦ ដែលនៅជុំវិញបឹងទន្លេសាបរួមមាន ខេត្តបាត់ដំបង ពោធិ៍សាត់ កំពង់ឆ្នាំង កំពង់ធំ បន្ទាយមានជ័យ និងសៀមរាប។
 

សម្ដេច ថ្លែងយ៉ាងដូច្នេះ៖« ឯកឧត្តមទាំង៦ខេត្ត ត្រូវសន្យាជាមួយខ្ញុំ ចូលរួមទប់ស្កាត់ទន្រ្ទានតំបន់៣នេះឱ្យបាន ព្រោះបឹងទន្លេសាបនៅក្នុងដែនសមត្ថកិច្ចរបស់អស់លោក។ និយាយទៅ ខ្ញុំអត់ចង់ប្រើអំណាចចុងប៉ិចនោះទេ បើសិនយើងមានភាពម្ចាស់ការលើការងារ។ ដូច្នេះ សូមរួមគ្នាការពារបឹងទន្លេសាបរបស់យើង ហើយនេះជាការងារដ៏សំខាន់ ដើម្បីធានាបានអត្ថប្រយោជន៍សម្រាប់ជាតិរបស់យើង»។ 
 

ទន្លេសាប គឺជា​បឹង​ទឹកសាប​ ដ៏ធំ​បំផុត​មួយ​នៅ​អាស៊ីអាគ្នេយ៍​ ដែលមាន​បណ្ដោយ​ប្រមាណ១១៦ គីឡូម៉ែត្រ ទទឹងប្រមាណ​ពី៣គីឡូម៉ែត្រទៅ៣៣គីឡូម៉ែត្រ និង​មាន​ឆ្នេរ​ប្រវែង​ប្រមាណ៤៨២គីឡូម៉ែត្រ នៅ​រដូវប្រាំង។ 
 

បឹងនេះ ត្រូវបានចាត់ទុកជារតនសម្បត្តិរបស់កម្ពុជា ដែលសម្បូរទៅដោយជីវៈចម្រុះជាច្រើនប្រភេទ។ ក្រៅពីផ្តល់ជម្រកដល់ សត្វ និងរុក្ខជាតិ បឹងទន្លេសាប ក៏ជាប្រភពទឹកដ៏សំខាន់សម្រាប់អ្នកនេសាទ និងកសិករ អាស្រ័យផលផងដែរ។ ត្រីប្រមាណ២៨០ប្រភេទ កំពុងរស់នៅក្នុងបឹងទឹកសាបនេះ ខណៈជីវសាស្ដ្រចម្រុះក្នុងតំបន់បឹងទន្លេសាប រួមមាន ល្មូន៤២ប្រភេទ បក្សី២២៥ប្រភេទ ថនិកសត្វ៤៦ប្រភេទ និងរុក្ខជាតិជាង២០០ប្រភេទ។ 
 

បើតាមសៀវភៅខ្ញុំចង់ដឹងចំណងជើងថា «​ជីវិតជុំវិញបឹងទន្លេសាប» របស់អង្គការស៊ីប៉ា ការនេសាទនៅកម្ពុជាមានតួនាទីធំ ហើយត្រីជាអាហារសំខាន់បន្ទាប់ពីស្រូវ។ ពលរដ្ឋជុំវិញបឹងទន្លេសាបរាប់ពាន់នាក់ រស់នៅពឹងផ្អែកលើការនេសាទ ខណៈការបរិភោគត្រីរបស់មនុស្សម្នាក់ៗ ជាមធ្យម៦៧គីឡូក្រាម ក្នុងមួយឆ្នាំ។
 

ក្រៅពីផ្តល់​ប្រយោជន៍ដល់អ្នករស់នៅជុំវិញបឹងទន្លេសាប ការនេសាទ ក៏បានផ្តល់ចំណូលដល់សេដ្ឋកិច្ចជាតិផងដែរ ដូចជា ពន្ធទាក់ទងនឹងការនេសាទ រួមទាំងលំនាំផលចេញផងដែរ។ ចំពោះបរិមាណត្រីនេសាទបានជាមធ្យមក្នុងមួយឆ្នាំៗ មានលើសពី ១សែនតោន។ ការនេសាទប្រព្រឹត្តទៅពេញមួយឆ្នាំ លើកលែងតែរដូវត្រីពង៕