RFI
អន្តរជាតិ
នាយករដ្ឋមន្ត្រីបារាំង៖ កសិករជាកម្លាំងនិងជាមោទនភាពជាតិ គួរត្រូវលើកលែងពន្ធពិសេស
នាយករដ្ឋមន្ត្រីបារាំង លោក ហ្កាប៊្រីយែល អាតតាល់ នៅសភាបារាំង។ REUTERS - SARAH MEYSSONNIER
×![]()
ដោយ៖ហេង ឧត្តម/RFI
នាយករដ្ឋមន្ត្រីបារាំង លោក ហ្កាប៊្រីយែល អាតតាល់ បានថ្លែងថា «កសិករ ជាកម្លាំងនិងជាមោទនភាពជាតិ។ អាស្រ័យហេតុនេះ កសិករបារាំងគួរត្រូវតែទទួលបានការលើកលែងពន្ធពិសេស ក្នុងវិស័យកសិកម្ម»។ ការប្រកាសរបស់ប្រមុខរដ្ឋាភិបាលបារាំងបែបនេះ ក៏ដើម្បីសម្រាលបន្ថយកំហឹងកសិករបារាំង ដែលបានប្រកាសធ្វើបាតុកម្មសម្តែងមតិជាច្រើនកន្លែងទូទាំងប្រទេស ហើយនិងនាំគ្នាបិទច្រកផ្លូវសំខាន់ៗជាច្រើន សម្រាប់ចេញចូលរដ្ឋធានីប៉ារីស។ ការណ៍នេះ ត្រូវបង្ខំចិត្តឲ្យនាយករដ្ឋមន្ត្រីប្រកាសដាក់ចេញគោលនយោបាយជ្រោមជ្រែងវិស័យកសិកម្ម។ 
នៅចំពោះមុខបណ្តាអ្នកតំណាងរាស្ត្របារាំង លោកនាយករដ្ឋមន្ត្រី ហ្កាប៊្រីយែល អាតតាល់ បានប្រកាសកោតសរសើរដល់ប្រជាកសិករនិងប្រជានេសាទ ថាពួកគេខំប្រឹងប្រែងធ្វើការទាំងព្រឹក ទាំងថ្ងៃ ទាំងយប់ដើម្បីផ្តល់ចំណីអាហារចិញ្ចឹមប្រជាជនបារាំង ម្លោះហើយ ពួកគេគួរតែត្រូវទទួលបានការលើកលែងពន្ធពិសេសក្នុងវិស័យកសិកម្ម។ ដោយមិនបញ្ជាក់លម្អិតថាករណីលើកលែងពន្ធពិសេសនោះមានអ្វីខ្លះនិងត្រូវធ្វើយ៉ាងណានៅឡើយ តែជំហានបឋម លោក ហ្កាប៊្រីយែល អាតតាល់ បានលើកឡើងអំពីការជ្រោមជ្រែងផ្តល់ជំនួយដល់វិស័យកសិកម្ម តាមរយៈការបន្ធូរបន្ថយពន្ធសម្រាប់ប្រជាកសិករអ្នកចិញ្ចឹមសត្វ។ យន្តការនេះបន្ថែមទៅលើការបន្ធូរបន្ថយតម្លៃប្រេងឥន្ធនៈសម្រាប់វិស័យកសិកម្ម ដែលប្រមុខរដ្ឋាភិបាលបារាំង បានប្រកាសផ្សាយកាលពីសប្តាហ៍មុន។
មិនតែប៉ុណ្ណោះ លោក ហ្កាប៊្រីយែល អាតតាល់ បានសន្យាកែទម្រង់ប្រព័ន្ធការងារក្នុងវិស័យកសិកម្ម ហើយនិងលើកកម្ពស់កម្រិតជីវភាពកសិករ។ ពោលគឺត្រូវវាយតម្លៃឡើងវិញ នូវកម្រិតប្រាក់ចំណូលរបស់ប្រជាកសិករ ត្រូវផ្ទៀងផ្ទាត់ធ្វើយ៉ាងណាមិនត្រូវឲ្យប្រាក់ចំណូលរបស់កសិករ មានចំនួនតិចជាងកម្រិតប្រាក់ចំណូលអប្បបរិមា ជាដាច់ខាត។ ទន្ទឹមនោះ រដ្ឋបារាំងក៏ត្រូវទូរទាត់ផ្តល់ជំនួយបន្ថែម និងផ្តល់អត្ថប្រយោជន៍ផ្សេងៗទៀតជូនកសិករ។ ត្រង់ចំណុចនេះដែរ នាយករដ្ឋមន្ត្រីបារាំង បានសង្កត់ធ្ងន់ថា កសិករបារាំង ដែលមិនទាន់ទទួលបានជំនួយអឺរ៉ុបសម្រាប់វិស័យកសិកម្មនៅឡើយទេ គឺនឹងត្រូវទទួលបានប្រាក់ឧបត្ថម្ភធ្លាក់ចូលក្នុងគណនីរបស់ពួកគេដោយស្វ័យប្រវត្តិ ចាប់ពីចន្លោះពេលនេះ ដល់ពាក់កណ្តាលខែមីនា ខាងមុខ។
ការប្រកាសបណ្តាវិធានការគិតគូរដល់កសិករនេះ បន្ទាប់ពីកសិករប្រកាសធ្វើបាតុកម្មមិនឈប់ឈរចាប់ពីថ្ងៃ២៦មករាមក ហើយនៅថ្ងៃអង្គារ ពួកកសិករប្រមូលផ្តុំគ្នាបិទផ្លូវជាតិសំខាន់ៗ ដែលចេញចូលក្រុងប៉ារីស ទៀតផង។ បើតាមសហជីពកសិករ នៅថ្ងៃទី៣០មករា ពួកកសិករបើកត្រាក់ទ័រ ប្រមាណ២០០គ្រឿង តម្រង់ឆ្ពោះទៅលោមព័ទ្ធបិទទីផ្សារ រាំងហ្ស៊ីស (Rungis)។ រាំងហ្ស៊ីស ជាផ្សារអន្តរជាតិ ហើយក៏ជាផ្សារធំដ៏សំខាន់សម្រាប់ផ្គត់ផ្គង់ក្រពះប្រជាជនប៉ារីស។ ប្រជាកសិករបារាំង ធ្លាប់បានប្រកាសពីសប្តាហ៍មុនថា ពួកគេនឹងមិនព្រមឈប់ធ្វើបាតុកម្មឡើយ ល្គឹកណា កម្មវត្ថុទាមទាររបស់ពួកគេ មិនបានសម្រេចទេ។
បាតុកម្មរបស់កសិករ មិនមែនមានតែនៅបារាំងទេ។ ហ្វូងកសិករក្នុងប្រទេសជាច្រើននៅអឺរ៉ុប ក៏ងើបឈរសម្តែងមតិ ធ្វើបាតុកម្មយ៉ាងច្រើនកន្លែង តួយ៉ាងនៅ អាល្លឺម៉ង់ អេស្ប៉ាញ អ៊ីតាលី ប៊ែលស៊ីក ប៉ូឡូញ និង រ៉ូម៉ានី ៕
© រក្សាសិទ្ធិដោយ thmeythmey.com
