នាជំនួបសប្តាហ៍ទី២២ នៅរាត្រីថ្ងៃទី១ ខែកុម្ភៈ ក្រុមភ្ញៀវ Man Utd រកបាន២គ្រាប់នាំមុខ Wolves នៅវគ្គទី១ នាទីទី៥ និង២២ ដោយ Marcus Rashford និង Rasmus Højlund។ នៅតង់​ទី២ Pablo Sarabia ដែលទើបប្តូរចូលស៊ុត១គ្រាប់ ដោយបាល់ប៉េណាល់ទីនៅនាទី៧១ ឱ្យក្រុមម្ចាស់ផ្ទះវិញ មុនពេល Scott McTominay បន្ថែមគ្រាប់ទី៣ ឱ្យបិសាចក្រហមនៅ ៤នាទីបន្ទាប់។
 

២គ្រាប់បន្តបន្ទាប់ពី Max Kilman និង Pedro Neto នៅនាទី ៨៥ និង ៩០+៥ បានជួយក្រុមរហស្សនាមចចក តាមបានស្មើ ៣-៣ វិញ ដែលធ្វើឱ្យលោក Gary O'Neil ដែលជាអ្នកចាត់ការមានសង្ឃឹមនឹងទទួលបាន១ពិន្ទុទៅហើយ។ ប៉ុន្តែយ៉ាងណា ក៏ដោយក្រុមលោក Erik ten Hag ដែលស្រេកឃ្លាន៣ពិន្ទុយ៉ាងខ្លាំងនោះ តាមបានគ្រាប់ជ័យជម្នះមកវិញនៅនាទី៩០+៧ តាមរយៈការស៊ុតបញ្ចូលទីដ៏ល្អរបស់ Kobbie Mainoo។
 

កើនបាន៣៥ពិន្ទុ និងស្ថិតនៅលេខ៧ បណ្តោះអាសន្ន Man Utd មានឱកាសប្រជែងតំណែង Top4 ប៉ុន្តែការដណ្តើមជើងឯកលីគកំពូលអង់គ្លេសរដូវកាល ២០២៣-២៤នេះ ហាក់ឃ្លាតឆ្ងាយបន្តិច ដ្បិត Liverpool, Man City និង Arsenal ជាដើមមិនបន្ថយដៃឡើយ។
 

ហង្សក្រហមក្រោមការដឹកនាំរបស់លោក Jürgen Klopp បានបន្តឈ្នះ Chelsea ៤-១ នៅសប្តាហ៍ទី២២ និងរក្សាភាពមិនចាញ់ក្នុង១៦ប្រកួតចុងក្រោយ ក្នុងនោះឈ្នះ១០ និងស្មើ៦​លើក​។ ឆ្លងកាត់២២ប្រកួត Liverpool រកបាន៥១ពិន្ទុ នាំមុខគូប្រជែង ម្ចាស់ការពារជើងឯក Man City និង Arsenal ៥ពិន្ទុ។
 

ក្រុមមេឃខៀវ ដែលយកឈ្នះ Burnley ៣-១ នៅសប្តាហ៍ទី២១របស់ពួកគេ បានដណ្តើមចំណាត់ថ្នាក់ទី២ ពីកាំភ្លើងធំវិញ ទោះមាន៤៦ពិន្ទុដូចគ្នា។ Arsenal ដែលប្រកួត២២លើក ធ្លាក់ទៅលេខ៣ ដោយសារមានសំណល់គ្រាប់បាល់តិចជាង Man City។
 

Everton ធ្លាក់ទៅតំបន់ត្រូវកាត់ចោល ជាមូយ Burnley និង Sheffield United ស្របពេល Luton Town ឡើងទៅតំបន់សុវត្ថិភាព ក្រោយឈ្នះ Brighton ៤-០៕