តាមការប៉ាន់ប្រមាណរបស់ក្រសួងពាណិជ្ជកម្មថៃ ទិន្នផលអង្កររបស់ខ្លួន នឹងធ្លាក់ចុះ ៥,៩ភាគរយនៅឆ្នាំនេះ ដោយសាររងឥទ្ធិពលបាតុភូត El Nino។ 

 

ស្របពេលទិន្នន័យធ្លាក់ចុះ ហើយមានការប្រកួតប្រជែងពីបណ្តាលប្រទេសផ្សេង ក្រសួងដដែលក្នុងថ្ងៃទី១ ខែកុម្ភៈ បានព្យាករថា ទំហំនៃការនាំចេញអង្ករថៃ នៅឆ្នាំ២០២៤ អាចមានត្រឹមតែ ៧,៥លានមេទ្រីកតោនប៉ុណ្ណោះ ពោលគឺធ្លាក់ចុះ ១៤,៤ភាគរយ បើធៀបនឹងឆ្នាំមុន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

ជាប្រទេសនាំចេញអង្ករទីពីរលើពិភពលោក ថៃក៏បានដាក់ហេតុផលផ្សេងទៀតថា ការថយចុះនៃការបញ្ជាទិញអង្ករពីឥណ្ឌូណេស៊ី និងការបើកនាំចេញអង្ករឡើងវិញពីឥណ្ឌា ជាកត្តាដ៏សំខាន់ផងដែរ ដែលធ្វើឱ្យការនាំចេញផលិតផលកសិកម្មរបស់ខ្លួនមួយនេះ ថយចុះផង។ 

 

យ៉ាងណាក៏ដោយ ថៃ បានបញ្ជាក់ថា ការនាំចេញអង្ករក្នុងខែមករាបានកើនឡើង ៤៤ភាគរយ បើធៀបនឹងរយៈពេលដូចគ្នាកាលពីឆ្នាំមុន ដោយមានទំហំ ១,១២លានមេទ្រីកតោន។

 

ក្នុងឆ្នាំ ២០២៣ ថៃបាននាំចេញអង្ករចំនួន ៨,៧៦លានមេទ្រីកតោន កើនឡើង ១៣,៦ភាគរយជាបរិមាណ និង ២៨,៤ភាគរយជាតម្លៃធៀបនឹងឆ្នាំដដែល។ ការនាំចេញអង្ករកាលពីឆ្នាំ២០២៣ មានចំនួន ១,៨ភាគរយគិតជាតម្លៃនៃទំហំនាំចេញទំនិញសរុបរបស់ថៃ៕