ជាតិ
អ្នកភូមិបង្កោងនឹងរៀបចំពិធីចាប់ត្រីនៅក្នុងបឹងអភិរក្សនៅថ្ងៃទី១១ កុម្ភៈ ពិធីបុណ្យចាប់ត្រីនៅភូមិបង្កោងនៅឆ្នាំ២០២៣។
× សៀមរាប៖ ជាទំនៀមទម្លាប់តែងធ្វើមិនដែលខាន អ្នកភូមិបង្កោងនឹងរៀបចំពិធីចាប់ត្រី នៅក្នុងបឹងអភិរក្សក្នុងភូមិ ដើម្បីបង្ហាញថា ពិធីឡើងមាឃ ឬពិធីឡើងអ្នកតា នឹងចូលមកហើយ នារដូវក្រោយច្រូតកាត់នេះ។ នៅឆ្នាំ២០២៤នេះ ពិធីរៀបចំនៅថ្ងៃ២កើត ខែមាឃ ឬត្រូវនឹងថ្ងៃទី១១ កុម្ភៈ។
មេភូមិបង្កោង ឃុំអំពិល ស្រុកប្រាសាទបាគង លោក ពេជ្រ ឃិន បានឱ្យដឹងថា លោកបានប្រកាសឱ្យពលរដ្ឋត្រៀមចូលរួមក្នុងពិធីចាប់ត្រីរួចរាល់ហើយ និងរំពឹងថា មានពលរដ្ឋចូលរួមច្រើនដូចឆ្នាំមុនៗ។ ជាទូទៅ ពលរដ្ឋក្នុងភូមិបង្កោងដែលតែងចូលរួមពិធីបុណ្យនេះ សរុបជាង៣០០គ្រួសារ និងប្រមាណជាង១ពាន់នាក់។ នេះជាការបញ្ជាក់ពីលោក ពេជ្រ ឃិន។
យ៉ាងណាតាមការបញ្ជាក់ពីលោកមេភូមិ ឆ្នាំនេះស្ថានភាពទឹកក្នុងបឹងហាក់ទាបបន្ដិច គឺនៅត្រឹមចង្កេះ ខណៈដែលឆ្នាំទៅមិញជិតត្រឹមដោះ។ មេភូមិបង្កោងប្រមើលឃើញថា ត្រីអាចមិនសូវសម្បូរដូចឆ្នាំទៅមិញទេ។
ជាមួយនឹងពិធីបុណ្យប្រពៃណីនេះ មេភូមិបង្កោងរំពឹងថា ក៏អាចទាញចំណាប់អារម្មណ៍ដល់ទេសចរផងដែរ។ លោក ពេជ្រ ឃិន លើកឡើងថា៖« យើងមិនដឹងថា មានទេសចរឬអ្នកចម្ងាយមកកម្សាន្ត ឬទស្សនាទេ តែរឿងយើងធ្វើជាទម្លាប់របស់យើងនៅតែធ្វើបើទេសចរគេមានចំណាប់អារម្មណ៍គេចង់មកលេង មកទៅ»។
ក្នុងពិធីបុណ្យនេះ អ្នកភូមិចុះចាប់ត្រីព្រមគ្នានៅវេលាម៉ោងកំណត់ ដែលឆ្នាំនេះ នឹងចុះនៅម៉ោង៦កន្លះព្រឹក ដោយប្រើឧបករណ៍នេសាទបែបប្រពៃណីដូចជា សំណាញ់ អង្រុត និងឈ្នាងជាដើម។ល។ ក្រោយចាប់ត្រីបាន ពួកគេយកមកអាំងហូបជុំគ្នាយ៉ាងសប្បាយរីករាយ ដែលភាគច្រើនអ្នកភូមិបានវេចឆ្នាំង វេចបាយពីផ្ទះបានជាស្រេច និងសប្បាយរីករាយជាលក្ខណៈគ្រួសារ និងសហគមន៍។ មានតែអ្នកភូមិបង្កោងប៉ុណ្ណោះ ដែលអនុញ្ញាតឱ្យចុះនេសាទត្រីបាន។
ក្រោយចាប់ត្រីរួច អ្នកភូមិខ្លះត្រូវទុកចំណែកត្រី ដើម្បីរៀបចំស្លសម្លនំបញ្ចុក ដើម្បីត្រៀមយកទៅក្នុងពិធី ឡើងមាឃនាថ្ងៃបន្ទាប់ ដែលអ្នកភូមិបង្កោងតែងធ្វើនៅសាលាឆទាន។
គួរបញ្ជាក់ថា ពិធីចាប់ត្រីរួម គឺជាទំនៀមបុរាណដែលបង្ហាញពីសាមគ្គីភាព និងដើម្បីអរគុណ និងបញ្ជូនសំណែនដល់អ្នកតាម្ចាស់ស្រុក ដែលជួយឱ្យផលដំណាំស្រូវស្រែបានល្អប្រសើរនៅឆ្នាំនេះ។ ពិធីនេះក៏ដើម្បីសុំឱ្យអ្នកតាជាម្ចាស់ស្រុកភូមិ បន្តជួយគ្រងរក្សាអ្នកភូមិឱ្យមានក្ដីសុខសប្បាយនាឆ្នាំ បន្តបន្ទាប់ទៀតផងដែរ៕
Tag:
ពាក្យគន្លឹះ៖ ពិធីឡើងមាឃអ្នកភូមិបង្កោង
ពិធីចាប់ត្រី
ពិធីឡើងអ្នកតា
© រក្សាសិទ្ធិដោយ thmeythmey.com