លោកស្រី ភួង ថី ជាពលរដ្ឋរស់នៅក្នុងភូមិតាគង់ សង្កាត់សំបួរ ក្រុងសៀមរាប បានចាប់ផ្តើមដាំដើមអង្គាសីលជាច្រើនឆ្នាំមកហើយ។ នៅជុំវិញផ្ទះលោកស្រីសុទ្ធសឹងដើមអង្គាសីល។ ដើមខ្លះរីកចេញផ្កាពណ៌លឿងយ៉ាងស្រស់ស្អាត ខ្លះទៀតទើបតែក្រពុំអមដោយស្លឹកខៀវខ្ចី ហាក់បីដូចជារង់ចាំថ្ងៃចូលឆ្នាំចិនមកដល់ ដើម្បីរីកបង្ហាញសម្រស់របស់ខ្លួន។
មុនថ្ងៃចូលឆ្នាំចិន អតិថិជនតែងមកទិញដើមអង្គាសីលដល់ផ្ទះលោកស្រី ភួង ថី ផ្ទាល់ ដើម្បីយកទៅលក់បន្ត។ ពួកគេអាចទិញដោយគាស់យកទាំងគុម្ព ឬកាប់យកតែមែកក៏បានតាមតែតម្រូវការ។ ក្នុង១គុម្ព អាចលក់បានចន្លោះពី៥០ដុល្លារទៅ១០០ដុល្លារ ទៅតាមគុម្ពតូចឬធំ និងមានចេញផ្ការីកស្គុះស្គាយ។ នេះបើតាមជាការរៀបរាប់ របស់លោកស្រី ភួង ថី។
លោកស្រី ថី លើកឡើងថា អង្គាសីលជារុក្ខជាតិមួយប្រភេទដែលងាយស្រួលដាំខ្លាំងណាស់។ គ្រាន់តែកាប់ ជីករណ្តៅទុក រួចរកគាស់ដើមអង្គាសីលតាមវាលស្រែ ឫដុបក្បែរភូមិ មកដាក់ដាំជាការស្រេច តែត្រូវគាស់យក មកទាំងឫស និងជាប់ដីបានច្រើនទើបលូតលាស់ល្អ។ យ៉ាងណា សព្វថ្ងៃតាមព្រៃដុបក្បែរភូមិ មិនសម្បូរទៀតឡើយ ដោយសារការឈូសឆាយរៀបចំដីធ្វើស្រែចម្ការជាដើម។ លោកស្រី ថី បន្តថា ចំពោះទឹកស្រោចស្រពវិញ ក៏ពុំសូវត្រូវការញឹកញាប់នោះទេ ហើយការមើលថែទាំដាក់ជី ឬបាញ់ថ្នាំការពារសត្វល្អិតក៏មិនចាំបាច់ដែរ។
ដោយឡែក ពលរដ្ឋដទៃទៀត គឺលោកស្រី មាន មឿយ និងប្ដី កំពុងតែមមាញឹកមើលថែដើមអង្គាសីលដែលខ្លួនបានកាប់មែក យកមកត្រាំទឹក១៥ថ្ងៃមកហើយ ដោយបេះស្លឹកចាស់ចេញ និងត្រូវបាញ់ទឹក៣ដងក្នុង១ថ្ងៃជាប្រចាំ ដើម្បីឱ្យលាស់ស្លឹកថ្មី និងចេញផ្កាទាន់ថ្ងៃចូលឆ្នាំចិន។ លោកស្រី ដំណាលថា គ្រួសារលោកស្រីត្រូវក្រោកពីម៉ោង១យប់ ដើម្បីជិះឡានឈ្នួលក្នុងម្នាក់៣ម៉ឺនរៀល ទៅកាប់ដើមអង្គាសីលនៅខេត្តកំពង់ធំ ហើយត្រលប់មកវិញនៅម៉ោង៣រសៀល។
ក្នុងបទសម្ភាសជាមួយសារព័ត៌មានថ្មីៗ លោកស្រី មាន មឿយ ប្រាប់ថា រាល់ឆ្នាំមានគ្នីគ្នាប្រហែល១០នាក់ តែឆ្នាំនេះមានតែ២នាក់ប្តីប្រពន្ធប៉ុណ្ណោះ ដែលចេញទៅរកកាប់ដើមអង្គាសីលនៅតំបន់មួយក្នុងខេត្តកំពង់ធំ។ ទោះបីជាមិនស្គាល់ថា ទីតាំងណាសម្បូរឬមិន
សម្បូរដើមអង្គាសីលក្តី តែលោកស្រី មាន មឿយ មិនអស់សង្ឃឹមឡើយ និងបានសួរនាំអ្នកភូមិទៅនោះ ដើម្បីទៅដល់កន្លែងដើមអង្គាសីល។
តាមការបញ្ជាក់ពីលោកស្រី មឿយ ថាបើចង់ឱ្យដើមអង្គាសីលលាស់ស្លឹកខ្ចី និងមានចេញផ្កាល្អទាន់ថ្ងៃចូលឆ្នាំចិន ត្រូវកាប់យកមកយ៉ាងហោចណាស់ឱ្យបានមុន២០ថ្ងៃ នឹងត្រូវមើលថែឱ្យបានដិតដល់។ លោកស្រីពន្យល់បន្តថា ពេលយកមកដល់ត្រូវបាញ់ទឹកឱ្យសើមស្លឹក រួចត្រាំក្នុងអាងមួយយប់។ លុះព្រឹកឡើងត្រូវបេះស្លឹកចាស់ចេញ និងតម្រឹមគល់ឱ្យបានស្អាត រួចដាក់ត្រាំក្នុងធុង បន្ទាប់មកត្រូវបាញ់ទឹកជាប្រចាំ ៣ដងក្នុង១ថ្ងៃ។
លោកស្រីឱ្យដឹងដែរថា នៅពេលអង្គាសីលចាប់ផ្តើមលាស់ល្អមានផ្ការីកស្គុះស្គាយ លោកស្រីយកទៅលក់ខ្លួនឯង ដោយរៀបដាក់ធុង ចងភ្ជាប់នឹងកង់រួចជិះលក់តាមផ្លូវនិងផ្សារនានា ក្នុងក្រុងសៀមរាប។ លោកស្រីបន្ត ប្រសិនបើអង្គាសីលលាស់ល្អ មានផ្ការីកព្រោងព្រាត អាចលក់បានពី៤ម៉ឺនទៅ៥ម៉ឺនរៀលក្នុង១បាច់។ ប៉ុន្តែបើអង្គាសីលមិនសូវមានចេញផ្កាច្រើន អាចលក់បាន៥ពាន់ទៅ១ម៉ឺនរៀលប៉ុណ្ណោះក្នុង១បាច់។
សូមជម្រាបដែរថា សព្វថ្ងៃនេះដើមអង្គាសីលមិនសូវសម្បូរទៀតទេ នៅតាមវាលស្រែ ឬតាមគុម្ពោតព្រៃក្នុងបរិវេណតំបន់ព្រៃលិចទឹកក្នុងសង្កាត់សំបួរ ឬសង្កាត់ស្វាយដង្គំ ក្រុងសៀមរាប ដោយសារមានពលរដ្ឋជាច្រើននាំគ្នាទៅកាប់ ឬគាស់យកមកដាំនៅតាមផ្ទះរបស់ខ្លួន។ លើសពីនេះ តំបន់ដែលធ្លាប់តែសម្បូរមួយចំនួន ត្រូវបានម្ចាស់ដីឈូសឆាយដើម្បីធ្វើស្រែចម្ការជាដើម។ ការណ៍នេះ ធ្វើឱ្យអង្គាសីលនៅតំបន់កាន់តែខ្សត់ទៅៗ ទើបពលរដ្ឋដែលប្រកបរបរជាអ្នកលក់ដើមអង្គាសីល នាំគ្នាទៅស្វែងរកកាប់អង្គាសីលនៅទីឆ្ងាយៗ ដើម្បីមកលក់ពេលចូលឆ្នាំចិន៕