ដោយ៖ឈាង បុប្ផា/RFI
តុលាការកូរ៉េខាងត្បូងបានសម្រេចនៅថ្ងៃទី៥ មករា ឲ្យអគ្គនាយកក្រុមហ៊ុនសាំស៊ុង លោកលី ជែយុង រួចផុតពីការចោទប្រកាន់ នៅក្នុងសំណុំរឿងច្របាច់បញ្ចូលគ្នានូវសាខាក្រុមហ៊ុនពីររបស់សាំស៊ុង កាលពីឆ្នាំ ២០១៥។ នៅក្នុងសំណុំរឿងនេះ រដ្ឋអាជ្ញាធ្លាប់ទាមទារឲ្យតុលាការកាត់ទោសថៅកែក្រុមហ៊ុនសាំស៊ុង ដាក់ពន្ធនាគារ៥ឆ្នាំ ព្រោះថា ការច្របាច់បញ្ចូលគ្នា នូវសាខាក្រុមហ៊ុនរបស់សាំស៊ុងធ្វើឡើងដោយខុសច្បាប់ នៅក្នុងគោលដៅពង្រឹងអំណាចរបស់លោកលី ជែយុង សម្រាប់ដឹកនាំក្បាលម៉ាស៊ីនក្រុមហ៊ុនសាំស៊ុង។
២ឆ្នាំក្រោយ ទទួលបានក្រឹត្យលើកលែងទោសពីប្រធានាធិបតីលោកយូន ស៊ុកយោល នៅក្នុងសំណុំរឿងប្រព្រឹត្តអំពើពុករលួយ អគ្គនាយកក្រុមហ៊ុនសាំស៊ុង លោកលី ជែយុងត្រូវតុលាការកូរ៉េខាងត្បូងសម្រេចលាងជម្រះឲ្យរួចផុតពីការចោទប្រកាន់នៅក្នុងសំណុំរឿងឧក្រិដ្ឋកម្មហិរញ្ញវត្ថុ កាលពីឆ្នាំ ២០១៥។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងត្បូង យុនហាប់។
នៅក្នុងបទចោទប្រកាន់ របស់រដ្ឋអាជ្ញា លោកលី ជែយុងថា កាលនៅជាអគ្គនាយករងក្រុមហ៊ុនសាំស៊ុង លោកលី ជែយុង បានសម្រេចច្របាច់បញ្ចូលគ្នារវាងក្រុមហ៊ុនសាខាពីររបស់សាំស៊ុងដោយខុសច្បាប់ នៅក្នុងគោលដៅតែមួយគត់ ដើម្បីសម្រួលការស្នងតំណែងរបស់លោកលី ជែយុង ទៅកាន់ក្បាលម៉ាស៊ីនដឹកនាំក្រុមហ៊ុនសាំស៊ុង ដោយគ្មានឧបសគ្គ។ បើតាមរដ្ឋអាជ្ញា វិធីសាស្រ្តរបស់លោកលី ជែយុងបានធ្វើឲ្យម្ចាស់ភាគហ៊ុនរបស់ Samsung C&T ដែលជាសាខាមួយរបស់សាំស៊ុង ត្រូវខាតបង់ ដោយសារតែការទម្លាក់តម្លៃភាគហ៊ុន ដើម្បីអាចច្របាច់បញ្ចូលគ្នាជាមួយក្រុមហ៊ុនសាខាមួយទៀត ឈ្មោះ Cheil។
ប៉ុន្តែ នៅក្នុងការសម្រេចនៅថ្ងៃចន្ទទី ៥កុម្ភៈនេះ ចៅក្រមរបស់តុលាការកូរ៉េខាងត្បូងវាយតម្លៃថា រដ្ឋអាជ្ញាគ្មានភស្តុតាងគ្រប់គ្រាន់ និងថា លោកលី ជែយុងគ្មានចេតនាបំផ្លាញប្រយោជន៍របស់ម្ចាស់ភាគហ៊ុន ដូចការចោទប្រកាន់របស់រដ្ឋអាជ្ញាឡើយ។
សម្រាប់តុលាការ ការពង្រឹងការគ្រប់គ្រង របស់លោកលី ជែយុង ដើម្បីស្នងតំណែងជាប្រធានក្រុមហ៊ុនសាំស៊ុងមិនមែនជាគោលដៅតែមួយនៃការច្របាច់បញ្ចូលគ្នានូវក្រុមហ៊ុនសាខាពីររបស់សាំស៊ុង។
នៅក្នុងសំណុំរឿងទាក់ទងនឹងការច្របាច់បញ្ចូលគ្នា តុលាការកូរ៉េខាងត្បូងនៅថ្ងៃចន្ទនេះបានសម្រេចឲ្យប្រធានក្រុមហ៊ុនសាំស៊ុងរួចផុតពីការចោទប្រកាន់ទាំងអស់ ដូចជា ការបន្លំប្តូរតម្លៃភាគហ៊ុន ការរំលោភទំនុកចិត្ត និងការបន្លំគណនីជាដើម។
ក្នុងវ័យ ៥៥ឆ្នាំ លោកលី ជែយុង ដែលបានចូលកាន់តំណែងជាអគ្គនាយកក្រុមហ៊ុនសាំស៊ុងជាផ្លូវការនៅខែ តុលា ឆ្នាំ ២០២២ បានស្បថនៅក្នុងតុលាការថា លោកមិនបានតម្លើងថ្លៃភាគហ៊ុនរបស់ក្រុមហ៊ុនមួយ ដើម្បីធ្វើឲ្យម្ចាស់ភាគហ៊ុនរបស់ក្រុមហ៊ុនមួយទៀតខាតបង់ប្រយោជន៍នោះទេ។ តាមទីភ្នាក់ងារយុនហាប់ អគ្គនាយកក្រុមហ៊ុនសាំស៊ុងបញ្ជាក់ថា គ្មានហេតុផលផ្ទាល់ខ្លួន ចូលទៅលាយឡំ នៅក្នុងការសម្រេចចិត្តច្របាច់បញ្ចូលគ្នានូវក្រុមហ៊ុនសាខាពីររបស់សាំស៊ុង។ មេធាវីរបស់លោកលី ជែយុងផ្ទាល់ធ្លាប់លើកឡើងថា ការច្របាច់បញ្ចូលគ្នាកាលណោះ ជាហេតុផលសេដ្ឋកិច្ចសុទ្ធសាធ ពោលគឺគ្មានជាប់ពាក់ព័ន្ធនឹងរឿងស៊ីសំណូក ឬ ដើម្បីពង្រឹងអំណាចរបស់លោកលី ជែយុង។
ការច្របាច់បញ្ចូលគ្នានូវក្រុមហ៊ុនសាខារបស់សាំស៊ុង ចាប់បែកការណ៍ នៅឆ្នាំ ២០១៤ រហូតកើតរឿង កើតរ៉ាវ រាលដាលចេញទៅជារឿងអាស្រូវប្រព្រឹត្តអំពើពុករលួយ ដែលធ្វើឲ្យលោកស្រីប្រធានាធិបតីប៉ាក់ គុនហេ ត្រូវខ្ទាតពីមុខតំណែង និងត្រូវតុលាការកាត់ទោសឲ្យជាប់ពន្ធនាគារ ២០ឆ្នាំ។ លោកលី ជែយុងផ្ទាល់ធ្លាប់ត្រូវតុលាការកូរ៉េខាងត្បូងកាត់ទោសជាច្រើនដង និងធ្លាប់ជាប់ពន្ធនាគារ ១៨ខែ មុននឹងត្រូវលោកប្រធានាធិបតី យូន ស៊ុកយោលចេញក្រឹត្យលើកលែងទោស នៅឆ្នាំ ២០២២ នៅក្នុងហេតុផលទ្រទ្រង់សេដ្ឋកិច្ច។
ជាមហាសេដ្ឋី ជាប់លំដាប់ថ្នាក់ទី ២៧៨នៅក្នុងពិភពលោក លី ជែយុង ស្នងពីឪពុកចូលគ្រប់គ្រងសាំស៊ុង ក្រុមហ៊ុន ធំជាងគេរបស់កូរ៉េខាងត្បូង ដែលផ្គត់ផ្គង់ ប្រមាណ៦០%នៃបន្ទះឈីបរបស់ទីផ្សាពិភពលោក។
អ្នកជំនាញវាយតម្លៃថា ការសម្រេចលាងជម្រះ ដកចោលរាល់ការចោទប្រកាន់ថៅកែក្រុមហ៊ុនសាំស៊ុង ជាសញ្ញាបើកផ្លូវឲ្យក្រុមហ៊ុនធ្វើផែនការវិនិយោគបោះទុនរយៈពេលវែង។ ប៉ុន្តែ សម្រាប់សមាគមការពារសិទ្ធិមនុស្ស ការសម្រេចរបស់តុលាការបង្ហាញថា ជាថ្មីម្តងទៀត នៅកូរ៉េខាងត្បូង មានស្តង់ដារពីរជានិច្ច។ ថៅកែក្រុមហ៊ុនធំៗដែលត្រូវកាត់ទោស ឲ្យជាប់ពន្ធនាគារពីបទពុករលួយ ឬគេចពន្ធ នៅទីបំផុត តែងត្រូវលើកលែងទោស ដោះលែងឲ្យមានសេរីភាព នៅក្នុងហេតុផលជួយស្តារសេដ្ឋកិច្ចជាតិ៕