ទោះទទួលបានការចាប់អារម្មណ៍ខ្លាំងថាជាក្រុមដែលនឹងអាចឈ្នះជើងឯក ប៉ុន្តែនៅត្រឹមវគ្គពាក់កណ្តាលផ្តាច់ព្រ័ត្រ កូរ៉េខាងត្បូង ដែលមានគ្រូបង្វឹកលោក Jurgen Klinsmann រងការភ្ញាក់ផ្អើល ដោយត្រូវបានក្រុមហ្សកដានី ស៊ុតទម្លោះសំណាញ់ទី ២គ្រាប់ដោយកីឡាករ Yazan Al Naimat និង Musa Al-Taamari នៅក្នុងកីឡដ្ឋាន Ahmed bin Ali។
 

កូរ៉េខាងត្បូងមានភាគរយគ្រប់គ្រងបាល់ដល់ ៧០ភាគរយ ប៉ុន្តែពួកគេអាចរកឱកាសស៊ុតបានត្រឹមតែ ៨លើក តែមិនចំគោលដៅឡើយ បើធៀបទៅនឹងហ្សកដានីមានឱកាសស៊ុត ១៧លើក។

​ហ្សកដានីមានចំណាត់ថ្នាក់ពិភពលោកលេខ ៨៧ ឡើងមកកាន់វគ្គពាក់កណ្តាលផ្តាច់ព្រ័ត្រលើកដំបូងក្នុងប្រវត្តិសាស្ត្រ ហើយក៏បន្តបង្កើតប្រវត្តិសាស្ត្របន្ថែមទៀត ដោយឡើងទៅកាន់វគ្គផ្តាច់ព្រ័ត្រក៏ជាលើកដំបូងក្នុងប្រវត្តិសាស្ត្រផងដែរក្នុងពានរង្វាន់ Asian Cup។ កូរ៉េខាងត្បូងចំណាត់ថ្នាក់ពិភពលោកលេខ ២៦ ធ្លាក់ចេញដោយការខកចិត្ត ខណៈក៏ជាការខកចិត្តថ្មីបន្ថែមទៀតសម្រាប់ប្រធានក្រុម Heung Min Son ដែលកាលពីឆ្នាំ ២០១៥ ក្រុមបញ្ចប់ចំណាត់ថ្នាក់ត្រឹមលេខ ២។
 

Son ប្រធានក្រុមមានវ័យ ៣១ឆ្នាំ បាននិយាយក្រោយចប់ការប្រកួតដូច្នេះថា៖«ខ្ញុំមិនដឹងទេថានឹងត្រូវនិយាយបែបម៉េចនោះទេ ខ្ញុំពិតជាសុំទោស។ ក្រុមកីឡាករបានបង្ហាញអស់ពីសមត្ថភាពហើយ ខ្ញុំពិតសុំទោសពិតមែនដែលបញ្ចប់ការប្រកួតទៅដោយបែបនេះ ដោយសារតែកំហុស ខ្ញុំសុំទោសដែលមិនអាចបំពេញទៅតាមអ្វីដែលអ្នកគាំទ្រយើងបានរំពឹង ខ្ញុំក៏បានព្យាយាមអស់ពីសមត្ថភាពហើយដែរ។»។
 

បន្ទាប់ពីក្រុមធ្លាក់ចេញពី Asian Cup ប្រធានក្រុម Son នឹងត្រូវវិលត្រឡប់ទៅកាន់ក្រុម Tottenham Hotspur វិញ ខណៈដែលពានរង្វាន់ទ្វីបអាស៊ីមិនមានការប្រកួតប្រជែងដណ្តើមលេខ ៣ ឡើយ។ Son អាចនឹងត្រូវចូលលេងនៅក្នុងជម្រើស ១១នាក់ដំបូងសម្រាប់ការប្រកួតរបស់ Spurs ទល់នឹងក្រុម Brighton & Hove Albion នៅក្នុងជំនួប Premier League សប្តាហ៍នេះ៕