RFI
អន្តរជាតិ
Kim Aris៖ ទោះជាប់ពន្ធនាគាររបស់របបសឹក លោកស្រីអ៊ុងសាន ស៊ូជីនៅតែមានស្មារតីរឹងមាំ
ទោះជាប់ពន្ធនាគាររបស់របបសឹក លោកស្រីអ៊ុងសាន ស៊ូជីនៅតែមានស្មារតីរឹងមាំ Reuters/Suzanne Plunkett
×![]()
ដោយ៖ ឈាង បុប្ដា /RFI
បើទោះបីជាជាប់ក្នុងពន្ធនាគាររបស់របបសឹកភូមា ប៉ុន្តែ លោកស្រីអ៊ុងសាន ស៊ូជីនៅតែមានស្មារតីរឹងមាំជាប់ជានិច្ច។ នេះបើតាមKim Aris កូនប្រុសរបស់លោកស្រីមេបក្សប្រឆាំងភូមា ដែលទើបបានទទួលសំបុត្រពីម្តាយ កាលពីខែមករាកន្លងទៅ។ គិតមកដល់ខែ កុម្ភៈ មានរយៈពេល៣ឆ្នាំគត់ ដែលមេដឹកនាំយោធាភូមាធ្វើរដ្ឋប្រហារ និងចាប់ឃុំលោកស្រី អ៊ុងសាន ស៊ូជី។ ត្រូវរបបសឹកចោទប្រកាន់ជាច្រើនបទល្មើស តាំងពីការប្រព្រឹត្តអំពើពុករលួយ លួចបន្លំសន្លឹកឆ្នោត និងរំលោភកិច្ចការសម្ងាត់រដ្ឋ លោកស្រីអ៊ុងសាន ស៊ូជី អាយុ ៧៨ឆ្នាំត្រូវតុលាការសឹកភូមា កាត់ទោសឲ្យជាប់ពន្ធនាគារជាង២០ឆ្នាំ។ 
ខែកុម្ភៈ ២០២១ ខែកុម្ភៈ ២០២៤។ រយៈពេល ៣ឆ្នាំគត់ដែលមេដឹកនាំយោធាភូមាចាប់ឃុំលោកស្រី អ៊ុងសាន ស៊ូជី បន្ទាប់ពីធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី ដែលទើបទទួលជ័យជំនះ ដ៏ធំធេង នៅក្នុងការបោះឆ្នោតសភា។
ជាប់ក្នុងពន្ធនាគាររបស់ពួកយោធា បីឆ្នាំមកនេះ លោកស្រីអ៊ុងសាន ស៊ូជីបាត់មុខ បាត់សំឡេង ដោយគេឃើញលោកស្រីម្តងម្កាលតែប៉ុណ្ណោះ នៅតាមប្រព័ន្ធផ្សព្វផ្សាយរបស់រដ្ឋាភិបាលសឹកភូមា នៅពេលមានសវនាការជំនុំជម្រះលោកស្រី នៅតុលាការសឹក នៅរដ្ឋធានីណៃពីដោ។ នៅក្នុងសវនាការរយៈពេល ១៨ខែ កាលពីឆ្នាំ ២០២២ ដែលនៅក្នុងនោះលោកស្រី រងបទចោទប្រកាន់ ជាង១០បទល្មើស ដូចជាប្រព្រឹត្តអំពើពុករលួយ រំលោភកិច្ចការសម្ងាត់រដ្ឋ បន្លំសន្លឹកឆ្នោត រំលោភច្បាប់កូវីដជាដើម លោកស្រី អ៊ុងសាន ស៊ូជី អាយុ ៧៨ឆ្នាំ នៅទីបំផុតត្រូវតុលាការសឹកភូមា កាត់ទោសឲ្យជាប់ពន្ធនាគារ ជាង២០ឆ្នាំ។
ជាទូទៅ គេអាចដឹងសុខទុក្ខរបស់លោកស្រី តាមរយៈ មេធាវីរបស់លោកស្រីតែប៉ុណ្ណោះ។ លោក Kim Aris កូនប្រុសរបស់លោកស្រី អ៊ុងសាន ស៊ូជីក៏មិនដែលបានទៅជួបម្តាយផ្ទាល់ភ្នែក នៅ៣ឆ្នាំមកនេះ។ ប៉ុន្តែ នៅក្នុងការចុះផ្សាយរបស់ទីភ្នាក់ងារព័ត៌មានបារាំង AFPនៅថ្ងៃអង្គារ លោកKim Aris បានប្រាប់AFP លោកទើបទទួលបានសំបុត្រពីម្តាយ នៅខែ មករាកន្លងទៅ និងថា ទោះជាប់ក្នុងពន្ធនាគាររបស់របបសឹកភូមា ប៉ុន្តែ លោកស្រី អ៊ុងសាន ស៊ូជី នៅតែមានស្មារតីរឹងមាំជានិច្ច។ តាមលោកKim Aris ម្តាយរបស់លោកបានផ្ញើក្តីស្រឡាញ់ដល់មនុស្សគ្រប់គ្នាក្នុងក្រុមគ្រួសារ និងអរគុណសម្រាប់កញ្ចប់បញ្ញើដែលលោកបានផ្ញើទៅឲ្យ កាលពីចុងឆ្នាំមុន។ នៅក្នុងកញ្ចប់ផ្ញើទៅឲ្យម្តាយក្នុងពន្ធនាគារ លោកKim Aris និយាយថា លោកផ្ញើកញ្ចប់ថ្នាំ និងអាហារសំបូរដោយជាតិវីតាមីន។
បើតាមកូនប្រុសរបស់លោកស្រី អ៊ុងសាន ស៊ូជី លោកស្រី នៅតែបញ្ហាសុខភាពធ្មេញដូចមុន។ គណបក្សសម្ព័ន្ធជាតិដើម្បីប្រជាធិបតេយ្យ របស់លោកស្រីអ៊ុងសាន ស៊ូជីធ្លាប់ចោទរបបសឹកថា បដិសេធមិនផ្តល់ការព្យាបាលគ្រប់គ្រាន់ ដល់លោកស្រីអ៊ុងសាន ស៊ូជី ដែលធ្លាប់មានបញ្ហាងងឹតមុខ ក្អួតចង្អោរ និងពិបាកបរិភោគដោយសារឈឺធ្មេញ។
ម្យ៉ាង ពន្ធនាគារដែលលោកស្រីត្រូវរបបសឹកចាប់ឃុំគ្មានប្រព័ន្ធម៉ាស៊ីនត្រជាក់ នៅពេលអាកាសធាតុក្តៅខ្លាំង ឬតែងលិច ជ្រាបទឹក នៅរដូវភ្លៀវ។ នេះបើតាមសក្ខីកម្មរបស់លោកSean Turnell ទីប្រឹក្សាសេដ្ឋកិច្ចរបស់លោកស្រីស៊ូជី ដែលត្រូវពួកយោធា ចាប់ឃុំខ្លួន ក្នុងពេលតែមួយជាមួយលោកស្រី ស៊ូជី។ លោកSean Turnell ជនជាតិអូស្ត្រាលីត្រូវរបបសឹកលើកលែងទោស និងដោះលែងឲ្យមានសេរីភាពនៅចុងឆ្នាំ ២០២២។
បើតាមទីប្រឹក្សារូបនេះ លោកស្រី អ៊ុងសាន ស៊ូជីជាមនុស្សរឹងមាំ កម្រនឹងជួប។ លោកស្រីគិតខ្វល់ពីសុខទុក្ខរបស់មិត្តរួមការងារដែលជាប់ក្នុងពន្ធនាគារ ជាជាងគិតខ្វល់ពីសុខភាពផ្ទាល់ខ្លួន។
ដោយចាប់ឃុំលោកស្រីអ៊ុងសាន ស៊ូជី ដាក់ក្នុងពន្ធនាគារ ក្នុងរដ្ឋធានីណៃពីដោរ ឆ្ងាយដាច់ស្រយាល ពួកយោធាចង់បំបាក់ទឹកចិត្តរបស់លោកស្រី អ៊ុងសាន ស៊ូជី និងកាត់ផ្តាច់មិនឲ្យលោកស្រីអាចជួបជុំ និយាយឆ្លើយឆ្លងជាមួយមហាជន។ នៅក្នុងរបបសឹកមុនៗ លោកស្រី អ៊ុងសាន ស៊ូជី ជាប់ឃុំក្នុងផ្ទះមែន ប៉ុន្តែ លោកស្រីនៅតែអាចមកឈរនិយាយ នៅមាត់របងទៅកាន់ប្រជាជនភូមា អ្នកគាំទ្ររបស់លោកស្រី។ ប៉ុន្តែ តាមកាសែតក្នុងស្រុកភូមា ផ្ទះជាប់មាត់ទឹក ជាទីដែលលោកស្រីស៊ូជីធ្លាប់ជាប់ឃុំក្នុងផ្ទះអស់ ជាច្រើនឆ្នាំ នឹងត្រូវដាក់លក់ នៅប៉ុន្មានសប្តាហ៍ខាងមុខ៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
