លោក សុខ លូ យុទ្ធនាការ«ផ្ទះមួយ ដើមឈើមួយដើម» នឹងចាប់ផ្តើមនាខែមិថុនា ឆ្នាំ២០២៤ ដោយចាប់ផ្តើមពីក្រុងបាត់ដំបង និងបន្តទៅតាមទីប្រជុំស្រុកផ្សេងៗទៀតក្នុងខេត្ត។ រដ្ឋបាលខេត្ត នឹងផ្តល់ជូនដើមឈើសម្រាប់ឱ្យប្រជាពលរដ្ឋយកទៅដាំ រួមមាន  ដើមធ្នង់ បេង នាងនួន គគីរជាដើម។  បើតាមអភិបាលខេត្តបាត់ដំបង យុទ្ធនាការនេះ នឹងធ្វើឱ្យពលរដ្ឋ​យល់ដឹងកាន់តែខ្លាំងពីអត្ថប្រយោជន៍ នៃការដាំដើមឈើតាមទីប្រជុំជន​ ជាពិសេសទីក្រុងមានខ្យល់អាកាសល្អថែមទៀតផង ។ 
  

«យើងនឹងចាប់ផ្តើមដាំ នៅមុខផ្ទះរបស់ប្រជាពលរដ្ឋ ដែលនៅក្នុងក្រុងជាមុន ហើយឱ្យពួកគាត់ជួយថែរក្សា ស្រោចទឹក ផ្តល់ជាម្លប់ត្រជាក់ និងខ្យល់អាកាសបរិសុទ្ធ។ ការដាំដើមឈើនេះ នឹងធ្វើឱ្យក្រុងក្លាយជាទីក្រុងបៃតង បរិស្ថានល្អ ផ្តល់អុកស៊ីសែន និងទាក់ទាញទេសចរណ៍ ស្របជាមួយនឹងក្រុងរៀបចំផ្លូវសម្រាប់អ្នកថ្មើរជើងផងដែរ។» លោក សុខ លូ បានបញ្ជាក់ដូច្នេះ។ 
 

ក្នុងពិធីពិព័រណ៌ម្ហូបអាហារ ក្នុងក្រុងបាត់ដំបង កាលពីថ្ងៃទី២៩ ធ្នូ ២០២៣កន្លងទៅ លោក សុខ លូ បាន លើកឡើងថា យុទ្ធនាការនេះ ទាមទារឱ្យប្រជាពលរដ្ឋ ចូលរួមគាំទ្រ និងអនុវត្តទាំងអស់គ្នា ។ លោកសង្ឃឹមថា ក្រុងបាត់ដំបង់ នឹងពោរពេញទៅដោយដើមឈើខៀវស្រងាត់ ដែលផ្តល់ម្លប់ និងទាក់ទាញទេសចរ៕