នាជំនួបវគ្គពាក់កណ្តាលផ្តាច់ព្រ័ត្រ ក្នុងកីឡដ្ឋាន Al Thumama នៅយប់ថ្ងៃទី៧ ខែកុម្ភៈ ដែលមានអ្នកទស្សនាផ្ទាល់ជាង៤ម៉ឺននាក់ ខ្សែប្រយុទ្ធឆ្នើម Sardar Azmoun រកបានគ្រាប់នាំមុខឱ្យអ៊ីរ៉ង់ ត្រឹម៤នាទី នៃវគ្គទី១ មុនពេល Jassem Gaber Abdulsallam ស៊ុតតាមស្មើឱ្យកាតាវិញ នៅនាទី១៧។ 
 

មុនបញ្ចប់វគ្គទី១ ខ្សែបម្រើ Akram Afif បន្ថែមគ្រាប់ទី២ នៅនាទី៤៣ ដើម្បីជួយម្ចាស់ផ្ទះនាំមុខ ២-១ វិញ។​ ចូលដល់វគ្គទី២ បន្ទាប់ពីដំណើរការប្រកួតបាន៦នាទី អ៊ីរ៉ង់ទទូលបានបាល់ពិន័យ១១ម៉ែត្រ ហើយ Alireza Jahanbakhsh Jirendeh រ៉ាប់រងការទាត់បញ្ចូលទីតាមស្មើកាតា ២-២។ នៅទីបំផុត Almoez Ali សម្រេចបានគ្រាប់បាល់ទី៣ និងជាគ្រាប់បាល់ជ័យជម្នះសម្រាប់កាតា នៅនាទី៨៣។
 

លទ្ធផល ៣-២ បានជួយកាតា ឡើងទៅការពារតំណែងជើងឯកពានរង្វាន់ទ្វីអាស៊ីរបស់ខ្លួន ដោយត្រូវជួបហ្សកដានី នៅវគ្គផ្តាច់ព្រ័ត្រ ស្របពេលអ៊ីរ៉ង់ ខកឱកាសជាថ្មី ក្រោយអាក់​ខាន៤៧ឆ្នាំ។ អ៊ីរ៉ង់ ម្ចាស់ជើងឯក៣លើក ឈ្នះ Asian Cup លើកចុងក្រោយឆ្នាំ១៩៧៦ និងក្រោយៗមក មិនធ្លាប់ឈានដល់វគ្គផ្តាច់ព្រ័ត្រឡើយ។
 

ដោយឡែកជំនួបវគ្គផ្តាច់ព្រ័ត្ររវាង កាតា និងហ្សកដានី ដែលនឹងធ្វើឡើងនៅកីឡដ្ឋាន Lusail នៅថ្ងៃទី១០ ខែកុម្ភៈ ជាការជួបគ្នារវាងក្រុមប្រទេសតំបន់អារ៉ាប់ ជាលើកទី៤ ចំណោមវគ្គផ្តាច់ព្រ័ត្រទាំង១៨លើក។ ការជួបគ្នារបស់ក្រុមប្រទេសអារ៉ាប់ នៅវគ្គផ្តាច់ព្រ័ត្រពានតំបន់អាស៊ី៣លើកកន្លងមក មានជំនួបរវាងអ៊ីរ៉ង់ ដែលយកឈ្នះកូវែត ១-០ ឆ្នាំ១៩៧៦ ជំនួបដែលអារ៉ាប៊ីសាអូឌីត ឈ្នះ អេមីរ៉ាតអារ៉ាប់រួម ដោយបាល់កាត់ក្តី១១ម៉ែត្រ នៅឆ្នាំ១៩៩៩ និងជំនួបដែលអ៊ីរ៉ាក់ ឈ្នះ អារ៉ាប៊ីសាអូឌីត ១-០ នៅឆ្នាំ២០០៧។
 

តើកាតា ម្ចាស់ជើងឯកឆ្នាំ២០១៩ អាចការពារតំណែងជើងឯករបស់ខ្លួនបានឬអត់? ហើយថាតើហ្សកដានី អាចបណ្តើមយកពាន Asian Cup ឆ្នាំ២០២៣ នេះជាលើកដំបូងក្នុងប្រវត្តិសាស្ត្ររបស់ខ្លួនបានដែរឬទេ?