ជាតិ
ពីនេះ ពីនោះ
ព័ត៍មានសុខភាព
សុខភាព
×![]()
ដោយ: សារព័ត៌មានថ្មីៗ
ទឹកនោមផ្អែម ជាជំងឺត្រូវការការយកចិត្តទុកដាក់ និងថែទាំឲ្យបានដិតដល់ ហើយអ្នកជំងឺ ត្រូវយកចិត្តទុកដាក់អនុវត្តវិធានការថែទាំ ដែលគ្រូពេទ្យបានណែនាំឲ្យបានខ្ជាប់ខ្ជួន។ ការថែទាំ និងគ្រប់គ្រងជំងឺទឹកនោមផ្អែមបានល្អ ធ្វើឲ្យអ្នកជំងឺចៀសវាងបានច្រើន ពីផលវិបាកធ្ងន់ធ្ងរ ដែលអាចគំរាមកំហែងដល់អាយុជីវិត។
តិចនិកមួយចំនួន ដែលអ្នកមានជំងឺទឹកនោមផ្អែមគួរអនុវត្ត៖
តិចនិកមួយចំនួន ដែលអ្នកមានជំងឺទឹកនោមផ្អែមគួរអនុវត្ត៖
១. តាំងចិត្តខ្ពស់គ្រប់គ្រងជំងឺទឹកនោមផ្អែម
អ្នកជំងឺទឹកនោមផ្អែម កុំគិតថាខ្លួនឯកោ នៅមានមនុស្សជាច្រើនទៀត ចាំជួយលើកទឹកចិត្ត និងគាំទ្រយើងដែរ ដូចជាសាច់ញាតិ សហគមន៍ ពិសេសគឺគ្រូពេទ្យជំនាញតែម្ដង។ យើងក៏អាចចាប់ផ្ដើមស្វែងយល់ ពីចំណេះដឹងមូលដ្ឋានទាក់ទងនឹងជំងឺទឹកនោមផ្អែម ដើម្បីយើងអាចគ្រប់គ្រងជំងឺនេះបានកាន់តែល្អ។ ការញ៉ាំអាហារសុខភាព មានតុល្យភាព ហាត់ប្រាណជាប្រចាំ និងរក្សាទម្ងន់ខ្លួនឲ្យបានល្អតាមការណែនាំ សុទ្ធតែជារឿងសំខាន់ និងមានប្រយោជន៍ដល់ការគ្រប់គ្រងជំងឺទឹកនោមផ្អែម។ ដូចគ្នាដែរ ការតាមដានកម្រិតជាតិស្ករក្នុងឈាម និងគ្រប់គ្រងកម្រិតជាតិស្ករតាមការណែនាំរបស់គ្រូពេទ្យ គឺជារឿងចាំបាច់ និងកុំភ្លេចប្រើប្រាស់ថ្នាំ ដែលគ្រូពេទ្យផ្ដល់ឲ្យបានត្រឹមត្រូវ។
២. កុំជក់បារី
អ្នកដែលមិនជក់បារី គឺជារឿងល្អសម្រាប់សុខភាព ប៉ុន្តែបើយើងមានទម្លាប់ជក់បារី ហើយដឹងថាខ្លួនមានជំងឺទឹកនោមផ្អែម គួរតែបញ្ឈប់ការជក់បារី។ ការជក់បារី ធ្វើឲ្យអ្នកជំងឺទឹកនោមផ្អែមប្រភេទ២ ប្រឈមកាន់តែខ្ពស់នូវផលវិបាកផ្សេងៗ។ ការជក់បារីអាចនាំឲ្យ៖
• កាត់បន្ថយលំហូរឈាមទៅកាន់ជើង និងប្រអប់ជើង ដែលអាចនាំឲ្យមានការឆ្លងរោគ ដំបៅ និងអាចនាំឲ្យមានការកាត់ជើងក៏មាន។
• ជំងឺបេះដូង និងជំងឺសរសៃឈាមខួរក្បាល
• ជំងឺភ្នែក អាចនាំឲ្យមានពិការភ្នែក
• ខូចប្រព័ន្ធប្រសាទ និងតម្រងនោម
• អាចឆាប់ស្លាប់
៣. គ្រប់គ្រងសម្ពាធឈាម និងកូលេស្តេរ៉ូលឲ្យបានល្អ
អ្នកជំងឺទឹកនោមផ្អែម ការឡើងសម្ពាធឈាមខ្ពស់ អាចធ្វើឲ្យខូចសរសៃឈាម។ ដូចគ្នាដែរ ការឡើងកូលេស្តេរ៉ូលខ្ពស់ ក៏ជាកង្វល់មួយដែរ អាចធ្វើឲ្យខូចសរសៃឈាម ហើយបើយើងមានជំងឺទឹកនោមផ្អែម ការខូចខាតនេះ នឹងកាន់តែអាក្រក់ និងលឿនថែមទៀត។ ពេលដែលបញ្ហាសុខភាពទាំងពីរនេះកើតឡើងជាមួយគ្នា អាចធ្វើឲ្យអ្នកជំងឺទឹកនោមផ្អែម ជួបបញ្ហាគាំងបេះដូង បញ្ហាសរសៃឈាមខួរក្បាល និងបញ្ហាដែលគំរាមកំហែងដល់អាយុជីវិតផ្សេងទៀត។ វិធីដ៏ល្អនោះគឺជ្រើសរើសការញ៉ាំអាហារដែលល្អចំពោះសុខភាព តាមរយៈការកាត់បន្ថយអាហារមានជាតិខ្លាញ់។ អ្នកជំងឺទឹកនោមផ្អែម ក៏ត្រូវហាត់ប្រាណឲ្យបានទៀងទាត់ ដែលអាចជួយឲ្យអ្នកគ្រប់គ្រងសម្ពាធឈាម និងកូលេស្តេរ៉ូលបាន។ ក្នុងករណីខ្លះ គ្រូពេទ្យអាចចេញវេជ្ជបញ្ជាឲ្យប្រើថ្នាំពេទ្យខ្លះដែរ បើចាំបាច់។
៤. ពិនិត្យរាងកាយ និងភ្នែកឲ្យបានទៀងទាត់
បន្ថែមលើការពិនិត្យតាមដានស្ថានភាពជំងឺទឹកនោមផ្អែមពី ២-៤ដងក្នុងមួយឆ្នាំ អ្នកជំងឺទឹកនោមផ្អែម ក៏គួរពិនិត្យសុខភាពរាងកាយ និងភ្នែករាល់ឆ្នាំផងដែរ។ ការពិនិត្យសុខភាពរាងកាយ គ្រូពេទ្យនឹងសួរនាំពីអាហារដែលយើងញ៉ាំ កម្រិតសកម្មភាពរាងកាយដែលយើងបានធ្វើ និងរកមើលពីផលវិបាកដែលអាចកើតមាន ដូចជាសញ្ញាខូចតម្រងនោម ខូចប្រព័ន្ធប្រសាទ និងជំងឺបេះដូងជាដើម។ សម្រាប់គ្រូពេទ្យភ្នែកវិញ អាចនឹងពិនិត្យរកមើលសញ្ញាខូចខាតស្រទាប់រ៉េទីន ភ្នែកឡើងបាយ និងទឹកដក់ក្នុងបាតភ្នែកជាដើម។
៥. ថែទាំសុខភាពធ្មេញ
អ្នកមានជំងឺទឹកនោមផ្អែម អាចប្រឈមនឹងបញ្ហាឆ្លងរោគនៅអញ្ចាញធ្មេញ។ អ្នកជំងឺត្រូវដុសធ្មេញយ៉ាងតិចពីរដងក្នុងមួយថ្ងៃ ជាមួយថ្នាំដុសធ្មេញមានជាតិ fluoride ប្រើអំបោះទាក់កាកសំណល់អាហារចេញពីធ្មេញរាល់ថ្ងៃ និងជួបពេទ្យធ្មេញយ៉ាងតិចពីរដងក្នុងមួយឆ្នាំ។ បើយើងសង្កេតឃើញថា មានឈាមអញ្ចាញធ្មេញ ឬអញ្ចាញធ្មេញឡើងក្រហម ឬហើម សូមទៅជួបគ្រូពេទ្យធ្មេញ។
៦. ប្រុងប្រយ័ត្នចំពោះការផឹកគ្រឿងស្រវឹង
គ្រឿងស្រវឹង អាចធ្វើឲ្យយើងឡើង ឬចុះជាតិស្ករក្នុងឈាម អាស្រ័យលើបរិមាណដែលយើងបានផឹក និងថាយើងបានញ៉ាំអាហារខ្លះៗ ពេលផឹកគ្រឿងស្រវឹងដែរឬអត់។ បើយើងសម្រេចចិត្តថា ផឹកគ្រឿងស្រវឹង ត្រូវផឹកក្នុងកម្រិតតិចតួច មានន័យថា មិនត្រូវលើសពីមួយកែវ ឬមួយកំប៉ុងក្នុងមួយថ្ងៃ សម្រាប់មនុស្សស្រី និងមនុស្សប្រុសមានវ័យចាស់ជាង៦៥ឆ្នាំ។ សម្រាប់មនុស្សប្រុសមានអាយុ៦៥ឆ្នាំ ឬតិចជាងនេះ ត្រូវកម្រិតផឹកយ៉ាងច្រើនបានពីកែវ ឬពីរកំប៉ុង ក្នុងមួយថ្ងៃ។ ត្រូវចាំថា ការផឹកគ្រឿងស្រវឹង អាចធ្វើឲ្យកម្រិតជាតិស្ករក្នុងឈាមថយចុះនៅពេលបន្ទាប់ ពិសេសសម្រាប់អ្នកចាក់អាំងស៊ុយលីន។ គួរពិភាក្សាជាមួយគ្រូពេទ្យ ពីកម្រិតគ្រឿងស្រវឹងដែលយើងអាចផឹកបាន។
៧. គ្រប់គ្រងស្ត្រេស
បើសិនជាយើងកើតស្ត្រេស វាអាចនាំឲ្យយើងធ្វេសប្រហែល លើការគ្រប់គ្រងជំងឺទឹកនោមផ្អែមប្រចាំថ្ងៃ។ អ្នកជំងឺទឹកនោមផ្អែម ត្រូវរៀនគ្រប់គ្រងស្ត្រេស និងរកពេលសម្រាកឲ្យបានត្រឹមត្រូវ គេងឲ្យបានគ្រប់គ្រាន់ ដើម្បីសុខភាព។ ក្រៅពីអ្វីរៀបរាប់ខាងលើ យើងត្រូវគិតវិជ្ជមានចំពោះខ្លួនឯងជានិច្ច ជំងឺទឹកនោមផ្អែមយើងអាចគ្រប់គ្រងបាន ហើយជំងឺទឹកនោមផ្អែមមិនអាចបញ្ឈប់យើង ពីការចូលរួមក្នុងសកម្មភាពសង្គម ឬការងារ និងមានសុខភាពល្អ បាននោះទេ៕
ត្រួតពិនិត្យដោយ៖ www.health.com.kh
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
