RFI
អន្តរជាតិ
ទីភ្នាក់ងារចារកិច្ចន័រវែសលើកឡើងថា រុស្ស៊ីកំពុងតែមានប្រៀបផ្នែកកងទ័ព លើអ៊ុយក្រែន ភ្លើងឆាបឆេះនៅអគារផ្ទះសម្បែងក្នុងទីក្រុងកៀវ បន្ទាប់ពីរងការវាយប្រហាររបស់រុស្ស៊ី ថ្ងៃទី១០កុម្ភៈ ២០២៤ AP - Yevhen Titov
×
ដោយ៖ម៉ម ពិសី/ /RFI ខេមរភាសា
សង្គ្រាមនៅអ៊ុយក្រែន ដែលរុស្ស៊ីបានបញ្ឆេះឡើង បានអូសបន្លាយជិត២ឆ្នាំហើយ នៅបាំងតែជាង១០ថ្ងៃទៀតប៉ុណ្ណោះ។ ផ្អែកតាមរបាយការណ៍ថ្មីមួយ របស់ទីភ្នាក់ងារចារកិច្ចន័រវែស គឺរុស្ស៊ីកំពុងតែឈានទៅមានប្រៀបលើអ៊ុយក្រែន។ ដើម្បីអាចសង្ឃឹមយកឈ្នះបាន គឺអ៊ុយក្រែនត្រូវការជាចាំបាច់ នូវជំនួយសព្វាវុធដ៏ច្រើនសន្ធឹក ពីបញ្ចឹមលោក។
លោក Nils Andreas Stensones នាយកទីភ្នាក់ងារចារកិច្ចន័រវែស បានធ្វើបទបង្ហាញចំពោះមុខអ្នកកាសែត នូវរបាយការណ៍ប្រចាំឆ្នាំ ស្តីពីការវាយតម្លៃទៅលើបញ្ហាប្រឈមផ្នែកសន្តិសុខ នៅថ្ងៃទី១២កុម្ភៈ។ យោងតាមរបាយការណ៍នេះ ទីភ្នាក់ងារចារកិច្ចន័រវែស យល់ឃើញថា កងទ័ពរុស្ស៊ីកំពុងតែឈានទៅមានប្រៀបលើអ៊ុយក្រែន។
លោកបានលើកឡើងថា ស្ថានការណ៍នៅសមរភូមិនៅពេលនេះ គឺរុស្ស៊ីកំពុងមានប្រៀប ខុសពីឆ្នាំទៅមិញ។ លោកបានពន្យល់ថា មានកត្តាជាច្រើនដែលបង្ហាញថារុស្ស៊ីមានប្រៀបលើអ៊ុយក្រែន។ រុស្ស៊ីមានលទ្ធភាពអាចកេណ្ឌប្រមូលកម្លាំងទាហានមកបន្ថែម ចំនួន១គុណជា៣ បើប្រៀបធៀបទៅខាងអ៊ុយក្រែន។ ទាក់ទិននឹងទណ្ឌកម្មសេដ្ឋកិច្ច ដែលក្រុមប្រទេសលោកខាងលិចបានដាក់ទៅលើរុស្ស៊ីវិញ គឺរុស្ស៊ីនៅតែមានផ្លូវដើរ អាចសម្របខ្លួនបានយ៉ាងល្អលើសពីការប៉ាន់ស្មានទុក។ អ្វីដែលគួរឲ្យកត់សំគាល់ទៀតនោះ គឺវិស័យឧស្សាហកម្មរុស្ស៊ីត្រូវបានពង្រឹងសមត្ថភាព ឈានទៅអាចផលិតគ្រាប់ ផលិតគ្រឿងអាវុធ យានជំនេះកងទ័ព រថក្រោះ ដ្រូន មីស៊ីល ដើម្បីអនុញ្ញាតឲ្យកងទាហាន អាចឈរជើងបានយូរនៅសមរភូមិ។
លោកនាយកទីភ្នាក់ងារចារកិច្ចន័រវែស បានអះអាងទៀតថា រុស្ស៊ីបានទទួលជំនួយពីកូរ៉េខាងជើង បេឡារុស អ៊ីរ៉ង់ និងចិនចិនជាពិសេស។ យោងតាមព័ត៌មានដែលគេប្រមូលបាន គឺចិនមិនបានផ្តល់ឲ្យរុស្ស៊ី នូវអាវុធមែន តែចិនបានឲ្យរុស្ស៊ី នូវម៉ាស៊ីន គ្រឿងចក្រ គ្រឿងយន្ត រថយន្តដឹកជញ្ជូន គ្រឿងផ្សំអេឡិកត្រូនិក និងគ្រឿងបន្លាស់ច្រើនមុខទៀត ដែលចាំបាច់នៅក្នុងឧស្សាហកម្មផលិតសព្វាវុធរបស់រុស្ស៊ី។
សម្រាប់លោកនាយកទីភ្នាក់ងារចារកិច្ចន័រវែស ប្រសិនបើគេចង់ឲ្យអ៊ុយក្រែន ឈ្នះក្នុងសង្គ្រាមនេះ គឺទាល់តែក្រុមប្រទេសលោកខាងលិច ជួយផ្តល់គ្រឿងសព្វាវុធចាំបាច់ និងក្នុងទំហំច្រើនបំផុត ទៅឲ្យអ៊ុយក្រែន។ គ្រឿងសព្វាវិធចាំបាច់ទាំងនោះ គឺមានជាអាទិ៍ គ្រាប់កាំភ្លើង មីស៊ីលចម្ងាយឆ្ងាយ ប្រព័ន្ធខែលមីស៊ីលផ្លូវអាកាស រថក្រោះ រថពាសដែក និងយន្តហោះចម្បាំងជាដើម។
សូមបញ្ជាក់ថា ន័រវែស ដាណឺម៉ាក និងហូឡង់ គឺជាប្រទេសអឺរ៉ុបដែលបានប្រកាសសន្យា ថាផ្តល់យន្តហោះចម្បាំង F-16 ទៅឲ្យអ៊ុយក្រែន។ យន្តហោះចម្បាំងដ៏ទំនើបនេះ ត្រូវបានអ៊ុយក្រែនទាមទារសុំ ជាយូរមកហើយ ដើម្បីយកឈ្នះលើកម្លាំងសង្គ្រុប នៃសមត្ថភាពផ្លូវអាកាសរបស់រុស្ស៊ី។ គួរកត់សំគាល់ដែរថា ថ្វីបើសហរដ្ឋអាមេរិកជាអ្នកបានជួយផ្តល់ប្រាក់ច្រើនជាងគេដល់អ៊ុយក្រែន ប្រមាណជិត២ឆ្នាំមកនេះ តែឥឡូវនេះ សភាខុនហ្ក្រេសអាមេរិកមិនអាចស្វែងរកមតិរួម ដើម្បីសម្រេចផ្តល់ថវិកាជំនួយថ្មីទៅឲ្យអ៊ុយក្រែនឡើយ។ ជាងនេះទៀត មានការបារម្ភកាន់តែខ្លាំង ថាលោកដូណាល់ ត្រាំ អាចនឹងឈ្នះឆ្នោតត្រឡប់មកធ្វើប្រធានាធិបតីអាណត្តិថ្មី ដែលមានន័យថាអ្វីៗអាចនឹងកាន់តែលំបាកសម្រាប់អ៊ុយក្រែន៕
© រក្សាសិទ្ធិដោយ thmeythmey.com