របាយការណ៍ដដែល បានបញ្ជាក់ថា ចំនួនអ្នកមានការងារនៅកម្ពុជា កាលពីឆ្នាំ២០២២ ចាប់ពីអាយុ១៥ ទៅ៦៤ឆ្នាំ មាន៩,១លាននាក់ ហើយចំនួននេះ បានកើនឡើងដល់ ៩,៣លាននាក់ ឬកើន២,៧ភាគរយ ក្នុងឆ្នាំ២០២៣ ។ របាយការណ៍ បានបន្ថែមថា នៅឆ្នាំ២០២៣ ចំនួនអ្នកមានការងារធ្វើ ក្នុងវិស័យកសិកម្ម ថយចុះ២,៣ភាគរយ ខណៈវិស័យឧស្សាកម្ម និងសេវាកម្ម បានរក្សាកំណើនការងារពី ៣,២ភាគរយ ទៅ ៦,៦ភាគរយ។ 

 

សម្រាប់ឆ្នាំ២០២៤នេះ ក្រសួងការងារព្យាករថា ​អ្នកមានការងារក្នុងវិស័យកសិកម្មនេះ នឹងរក្សាបានកំណើន ២,៣ភាគរយ ឬកើនឡើងបន្ថែម២២ម៉ឺននាក់។ ដោយឡែក វិស័យកសិកម្មត្រូវបានព្យាករថា ថយចុះ៣,៩ភាគរយ ដែលស្មើនឹង១១,២ម៉ឺននាក់។  

 

ក្នុងរបាយការណ៍ក្រសួងការងារ បានបកស្រាយយ៉ាងដូច្នេះ៖ «និន្នាការនេះ ឆ្លុះឱ្យឃើញពីជម្រើសមុខរបរនិងការងារកាន់តែប្រសើរ សម្រាប់ពលរដ្ឋ ដោយប្ដូរការងារពីវិស័យកសិកម្ម ដែលមានចំណូលទាប ទៅចាប់យកឱកាសការងារថ្មី ដែលមានចំណូលប្រសើរជាងមុន ក្នុងវិស័យឧស្សាហកម្ម និងសេវាកម្ម»។ 

 

ក្រសួងការងារចាត់ទុកវិស័យកសិកម្ម ជាវិស័យសំខាន់ ក្នុងការរក្សាលំនឹងសេដ្ឋកិច្ច នៅពេលមានវិបត្តិកន្លងមក ស្របពេលផលិតផលក្នុងស្រុកសរុប(ផ.ស.ស) របស់វិស័យកសិកម្ម បានថយចុះពី១៨ភាគរយ នៅឆ្នាំ២០១៨ ដល់ ១៥,៦ភាគរយ នៅឆ្នាំ២០២៣៕