Bayern Munich ឆ្លងកាត់ការពីវគ្គចែកពូលក្នុងនាមជាក្រុមកំពូលតារាងពូល A មិនដែលចាញ់ការប្រកួតណាមួយឡើយ ខណៈជំនួបក្នុងកីឡដ្ឋាន Stadio Olimpico ក្រុមកំពុងដឹងនាំដោយអ្នកចាត់ការលោក Thomas Tuchel ត្រូវបានមើលឃើញថាមានប្រៀបខ្លាំង ក្នុងការយកឈ្នះ។
 

ក្រុមយក្សមកពីអាល្លឺម៉ង់ បច្ចុប្បន្នកំពុងស្ថិតនៅលេខ ២ ក្នុងក្របខណ្ឌ La Liga ចំណែក Lazio បច្ចុប្បន្ននៅចំណាត់ថ្នាក់លេខ ៨ ហើយតែងរងបរាជ័យច្រើនប្រកួតក្នុងលីគកំពូលអ៊ីតាលី Serie A រដូវកាល ២០២៣-២៤។ ប៉ុន្តែមុនការប្រកួតមកដល់ Lazio បានយកឈ្នះការប្រកួតលើក្រុម Cagliari លទ្ធផល ៣-១ ដើម្បីពង្រឹងទឹកចិត្តក្រុមមុនការប្រកួតទល់ជើងខ្លាំង Bayern។
  

ម្ចាស់ជើងឯក Bundesliga ១១លើកចុងក្រោយជាប់ៗគ្នា មុនការប្រកួតពានរង្វាន់អឺរ៉ុបមកដល់ ពួកគេបានរងបរាជ័យក្នុងជំនួបដ៏សំខាន់ដែលត្រូវប្រជែងពិន្ទុ ដោយចាញ់ក្រុមកំពូលតារាង Leverkusen លទ្ធផល ៣-០ ហើយក្រុមកំពុងត្រូវការជ័យជម្នះឡើងវិញ។ 
 

ចំណែកទឹកដីបារាំង Paris Saint Germain នឹងបើកទ្វារកីឡដ្ឋាន Parc des Princes ស្វាគមន៍ជំនួបជើងទីមួយទល់នឹងក្រុម Real Sociedad មកពីអេស្ប៉ាញ វេលាម៉ោង ៣យប់រំលងអាធ្រាត្រ ម៉ោងនៅកម្ពុជា។
 

PSG ឆ្លងកាត់ការប្រកួតសន្សំពិន្ទុក្នុងពូលទាំងលំបាក ខណៈពូល F សម្បូរទៅដោយក្រុមខ្លាំងដូចជា AC Milan, Newcastle និង Dortmund ជាដើម។ ចំណែក Sociedad ចេញពីពូល D ក្នុងនាមជាក្រុមបញ្ចប់ចំណាត់ថ្នាក់កំពូលតារាង។ 
 

ចូលដល់ការប្រកួតវគ្គ ១៦ក្រុម ជើងខ្លាំងលីគកំពូលបារាំង កំពុងតែមានទម្រង់លេងគួរឱ្យកត់សម្គាល់ឡើងវិញ ដោយ ១៦ប្រកួតចុងក្រោយមកនេះ មិនទាន់ចាញ់មួយលើកឡើយនៅគ្រប់ពានរង្វាន់ ហើយចំណោម ៨ប្រកួតចុងក្រោយបង្អស់យកឈ្នះចំនួន ៧លើក។ 
 

Real Sociedad វិញមកកាន់ការប្រកួតរាត្រីនេះ ក្រុមហាក់បីធ្លាក់ទម្រង់លេងយ៉ាងឆាប់រហ័ស ដោយប៉ុន្មានប្រកួតចុងក្រោយពួកគេមិនដែលឈ្នះឡើយ ហើយសប្តាហ៍កន្លងទៅមុនឈានដល់ការប្រកួតថែមទាំងភ្លាត់ស្នៀតចាញ់ក្រោមថ្វីជើង Osasuna លទ្ធផល ១-០ ក្នុងជំនួប La Liga៕