ជាតិ
ជប៉ុន ផ្តល់ជំនួយជិត១៤លានដុល្លារ ដល់ CMAC សង់អគារហ្វឹកហ្វឺន និងអគារសារមន្ទីរតេជោសន្តិភាព រូបភាព៖ហ្វេសប៊ុក CMAC
× ភ្នំពេញ៖ ជប៉ុន បានផ្ដល់ជំនួយឥតសំណង ចំនួន ២.០៧៩.៨០០.០០០ យ៉េន ស្មើនឹងជិត១៤ លានដុល្លារដល់កម្ពុជា សម្រាប់គាំទ្រគម្រោងសាងសង់អគារហ្វឹកហ្វឺននៅវិទ្យាស្ថានបច្ចេកទេសសកម្មភាពកំចាត់មីនក្នុងខេត្តកំពង់ឆ្នាំង និងអគារសារមន្ទីរតេជោសន្តិភាព នៅខេត្តសៀមរាប។
លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) និងលោក Jun KATO អគ្គនាយកក្រុមហ៊ុន SATO KOGYO CO., LTD បានចុះហត្ថលេខាលើជំនួយនេះ នៅថ្ងៃទី១៤ កុម្ភៈ ឆ្នាំ២០២៤។ បើតាម CMAC គម្រោងនេះ នឹងជួយលើកកម្ពស់សមត្ថភាពរបស់ស៊ីម៉ាក់ ក្នុងសកម្មភាពកំចាត់មីននៅកម្ពុជា និងក្នុងការជួយពង្រឹងកិច្ចសហប្រតិបត្តិការជាមួយបណ្តាប្រទេសមានគ្រាប់មីន និងសំណល់យុទ្ធភណ្ឌសង្គ្រាម ដើម្បីជំរុញការលុបបំបាត់បញ្ហាគ្រាប់មីន និងសំណល់យុទ្ធភណ្ឌសង្គ្រាមនៃបណ្តាប្រទេសទាំងនោះ។
បើតាមទំព័រហ្វេសប៊ុករបស់មជ្ឈមណ្ឌលសកម្មភាពកំចាត់មីនកម្ពុជា អគារដែលត្រូវសាងសង់នៅវិទ្យាស្ថានបច្ចេកទេសសកម្មភាពកំចាត់មីន ខេត្តកំពង់ឆ្នាំង រួមមានសាលប្រជុំ អគារសិក្សា អគារអន្ដេវាសិកដ្ឋាន អគារអាហារដ្ឋាន និងសម្ភារបំពាក់ដូចជាកុំព្យូទ័រ ទូរទស្សន៍ តុ កៅអីជាដើម។
ចំណែកអគារសារមន្ទីរតេជោសន្ដិភាព ស្ថិតនៅខេត្តសៀមរាប ជាសំណង់អគារដែលមានរាងដូចនឹងគ្រាប់មីនប្រឆាំងមនុស្ស មានកម្ពស់២ជាន់ កម្ពស់១៧ម៉ែត្រការ៉េ។ ទីតាំងសារមន្ទីរនេះ ស្ថិតនៅឃុំត្រពាំងធំ ស្រុកបាគង ខេត្តសៀមរាប៕
ប្លង់សារមន្ទីរតេជោសន្ដិភាព
© រក្សាសិទ្ធិដោយ thmeythmey.com