ជាតិ
សម្តេច ហ៊ុន ម៉ាណែត បង្កើតគណៈបញ្ជាយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លោក នេត សាវឿន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន (ខាងឆ្វេង) និង លោក ស សុខា រដ្ឋមន្ត្រីក្រសួងមហាផ្ទៃ។
× ភ្នំពេញ៖ សម្ដេច ហ៊ុន ម៉ាណែត នាយករដ្ឋមន្ត្រី សម្រេចបង្កើតគណៈបញ្ជាយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដែលមានលោកឧបនាយករដ្ឋមន្ដ្រី នេត សាវឿន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជាប្រធាន និងលោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃជាអនុប្រធាន។ នេះបើតាមសេចក្ដីសម្រេចរបស់រដ្ឋាភិបាលចេញថ្ងៃទី ១៤កុម្ភៈ។
បើគិតទាំងប្រធាន និងអនុប្រធាន គណៈបញ្ជាយុទ្ធនាការប្រយុទ្ធប្រឆាំងគ្រឿងញៀនខុសច្បាប់ មានសមាជិកទាំងអស់ ១៩នាក់។ គណៈបញ្ជាការនេះ មានភារកិច្ចដឹកនាំបញ្ហា និងចាត់តាំង អនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ របស់រាជរដ្ឋាភិបាល។
លោក ស ថត អគ្គស្នងការនគរបាលឃាតិ ទទួលបន្ទុកជាប្រធានលេខាធិការដ្ឋាន, លោក នេត្រ ភក្ត្រា រដ្ឋមន្ត្រីក្រសួងព័ត៌មានជាប្រធានគណៈកម្មការទទួលបន្ទុកផ្សព្វផ្សាយអប់រំ, លោក ប្រាក់ សំអឿន រដ្ឋលេខាធិការក្រសួងមហាផ្ទៃ ជាប្រធានគណៈកម្មការទទួលបន្ទុកអនុវត្តវិធានការរដ្ឋបាល។
គណៈកម្មការបង្ការ ទប់ស្កាត់ និងបង្ក្រាបគ្រឿងញៀនតាមបណ្តាខេត្តជាប់ព្រំដែន និងតាមច្រកទ្វារព្រំដែន ដឹកនាំដោយលោក កង សុខន រដ្ឋលេខាធិការក្រសួងមហាផ្ទៃ ដោយមានអនុគណៈកម្មការ៣ គឺអនុគណៈកម្មការបណ្តាខេត្តជាប់ព្រំដែនភាគឦសាន ដែលមានលោក ប៊ុនប៉ា ម៉ារីលុច អគ្គស្នងការរងនគរបាលជាតិជាប្រធាន, អនុគណៈកម្មការតាមច្រកទ្វារព្រំដែន ក្រោមការដឹកនាំរបស់លោក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ និងអនុគណៈកម្មការបង្ការ ទប់ស្កាត់ និងបង្ក្រាបគ្រឿងញៀនតាមបញ្ញើប្រៃសណីយ៍ដែលដឹកនាំដោយ លោក ឌី វិជ្ជា អគ្គស្នងការរងនគរបាលជាតិ។
គណៈកម្មការទទួលបន្ទុកសហប្រតិបត្តិការអន្តរជាតិ និងគណៈកម្មការផ្គត់ផ្គង់ ដឹកនាំដោយ លោក កេត សោផាន់ រដ្ឋលេខាធិការទីស្តីការគណៈរដ្ឋមន្ត្រី, លោក ស្តើង សុខុម រដ្ឋលេខាធិការក្រសួងសេដ្ឋកិច្ច និងហរិញ្ញវត្ថុ ជាប្រធានគណៈកម្មារផ្គត់ផ្គង់៕
© រក្សាសិទ្ធិដោយ thmeythmey.com