អន្តរជាតិ
អាមេរិកបញ្ជាក់ថា រុស្ស៊ីកំពុងប្រឹងប្រែងបង្កើតប្រព័ន្ធក្នុងអវកាសប្រឆាំងផ្កាយរណប
រូបឯកសារ៖ រ៉ុក្កែត Soyuz របស់រុស្ស៊ីបានចេញហោះហើរចេញពីមូលដ្ឋានស្ថានអវកាសរបស់រុស្ស៊ី នៅតំបន់ Baikonur ប្រទេសកាហ្សាក់ស្ថាន កាលពីថ្ងៃទី២៤ ខែវិច្ឆិកា ឆ្នាំ២០២១។ (Roscosmos Space Agency Press Service photo via AP)
×![]()
ដោយ: VOA
រដ្ឋធានីវ៉ាស៊ីនតោន— ការគំរាមសន្តិសុខជាតិថ្មីមួយបានធ្វើឱ្យមន្ត្រីអាមេរិកមួយចំនួនក្នុងរដ្ឋធានីវ៉ាស៊ីនតោន មានការខ្វាយខ្វស់បារម្ភក្នុងចិត្ត និងធ្វើឱ្យមានការអំពាវនាវដោយជំរុញដល់ពលរដ្ឋអាមេរិកាំង កុំឱ្យភ័យស្លន់ស្លោ ជុំវិញសមត្ថភាពថ្មីមួយរបស់រុស្ស៊ី ក្នុងការប្រឆាំងផ្កាយរណបលើលំហអាកាស។ នេះបើតាមការបញ្ជាក់របស់សេតវិមានកាលពីថ្ងៃទី១៥កុម្ភៈ និងបានសង្កត់ធ្ងន់ផងដែរថា រឿងនេះមិនមែនជាការគំរាមកំហែងបន្ទាន់ភ្លាមៗដល់អាយុជីវិតឬបង្កគ្រោះថ្នាក់នោះឡើយ។
ទីប្រឹក្សាទំនាក់ទំនងសន្តិសុខជាតិអាមេរិក លោក John Kirby បដិសេធមិននិយាយលម្អិតពីសមត្ថភាពដែលកំពុងលេចឡើងរបស់រុស្ស៊ីជុំវិញបញ្ហានេះទេ ប៉ុន្តែថា ទីភ្នាក់ងារស៊ើបការណ៍សម្ងាត់អាមេរិកនានា បាននិងកំពុងតាមដានត្រួតពិនិត្យនូវការប្រឹងប្រែងអភិវឌ្ឍប្រព័ន្ធឧបករណ៍របស់រុស្ស៊ី និងថា រដ្ឋាភិបាលក្រុងវ៉ាស៊ីនតោន បានទាក់ទងប្រាប់ទៅសម្ព័ន្ធមិត្តរបស់ខ្លួនរូចហើយ ពីជំហានបន្ទាប់ដែលត្រូវធ្វើ។
លោក Kirby បានប្រាប់ក្រុមអ្នកសារព័ត៌មានថា នេះមិនមែនជាសមត្ថភាពដ៏សកម្មដែលត្រូវបានដាក់ឱ្យប្រើរួចហើយនោះទេ។ លោកបន្ថែមទៀតថា៖ «ទោះបីជារុស្ស៊ីកំពុងប្រឹងប្រែងបង្កើតឱ្យមានសមត្ថភាពជាពិសេសនេះជាការបារម្ភក៏ដោយ ក៏ពុំមានការគំរាមកំហែងបន្ទាន់ណាមួយ ដល់សុវត្ថិភាពរបស់នរណាម្នាក់ឡើយ»។
ការពន្យល់បកស្រាយនិងការប្រឹងប្រែងដើម្បីធានាដល់សាធារណជននេះ កើតមានឡើងតែជាង២៤ម៉ោងប៉ុណ្ណោះ ក្រោយពីសមាជិកសភាអាមេរិកដ៏មានឥទ្ធិពលម្នាក់ បានបង្ហោះសារលើបណ្តាញសង្គម ដោយទាមទារឱ្យប្រធានាធិបតីសហរដ្ឋអាមេរិក លោក Joe Biden ត្រូវចាត់ចំណាត់ថា្នក់ព័ត៌មានស៊ើបការណ៍នោះថាមិនមែនជារឿងសម្ងាត់ទេ ដោយត្រូវបា្រប់ដល់សាធារណជនអាមេរិកាំង និងសម្ពន្ធមិត្តរបស់ខ្លួន ដើម្បីអាចត្រៀមលក្ខណៈធ្វើការឆ្លើយតបជុំវិញរឿងនេះ។
សមាជិករដ្ឋសភាអាមេរិកនៃបក្សសាធារណរដ្ឋ លោក Mike Turner ប្រធានគណៈកម្មាធិការស៊ើបការណ៍នៃរដ្ឋសភាអាមេរិក បានផ្សព្វផ្សាយនូវសេចក្តីថ្លែងការណ៍មួយកាលពីថ្ងៃពុធ ដោយព្រមានពីការគំរាមកំហែងសន្តិសុខជាតិដ៏ធ្ងន់ធ្ងរមួយ។
ទាំងសេតវិមាននិងក្រសួងការពារជាតិអាមេរិកកាលពីថ្ងៃព្រហស្បតិ៍ មិនបាននិយាយបន្ធូរបន្ថយពីភាពចំាបាច់លើរឿងនេះថា មិនមែនជាបញ្ហាបន្ទាន់នោះឡើយ ខណៈទទួលស្គាល់ថា ការវិវត្តទៅមុខរបស់រុស្ស៊ីក្នុងរឿងនេះធ្វើឱ្យមានក្តីបារម្ភនោះ។
ចំណែករុស្ស៊ី កាលពីថ្ងៃព្រហស្បតិ៍ បានបដិសេធការចោទប្រកាន់របស់អាមេរិក ស្តីពីសមត្ថភាពវាយប្រហារផ្កាយរណបដោយរុស្ស៊ីនោះ ថាជា«ការកុហកព្យាបាទ»។
អ្នកនាំពាក្យវិមានក្រឹមឡាំងលោក Dmitry Peskov បានចោទរដ្ឋាភិបាលក្រុងវ៉ាស៊ីនតោនថា បង្កើតល្បិចកលដើម្បីឱ្យសមាជិកសភាអាមេរិកផ្តល់ថវិកាចំណាយបន្ថែមទៀត។
បើទោះបីជារឿងនេះបានធ្វើឱ្យមានការភ្ញាក់ផ្អើលស្រឡាំងកាំងក្នុងចំណោមមន្ត្រីសេតវិមាននិងសមាជិកសភាមួយចំនួន ពីរបៀបដែលមហាជនត្រូវបានគេប្រាប់ឱ្យដឹងពីការគំរាមកំហែងនោះក៏ដោយ ក៏មានការឯកភាពជាទូទៅក្នុងសហរដ្ឋអាមេរិកផងដែរថា ការគំរាមពីគ្រោះថ្នាក់នេះគឺមានពិតប្រាកដ។
ទីភ្នាក់ងារស៊ើបការណ៍សម្ងាត់អាមេរិកនានា បានធ្វើការព្រមានជាច្រើនឆ្នាំមកហើយថា រុស្ស៊ីនិងប្រទេសចិន កំពុងប្រឹងប្រែងបង្កើតអាវុធ«ប្រឆាំងនឹងផ្កាយរណបក្នុងកម្រិតពេញលេញមួយ» និងបានកត់សម្គាល់ថា ការអភិវឌ្ឍនិងការប្រើប្រាស់នូវប្រព័ន្ធអាវុធនេះ «អាចប៉ះពាល់ដល់សមត្ថភាពប្រមូលព័ត៌មានស៊ើបការណ៍សម្ងាត់របស់សហរដ្ឋអាមេរិក» ផងដែរ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
