លោក ថាក់ស៊ីន ស៊ីណាវ៉ាត់ អតីតនាយករដ្ឋមន្រ្តីថៃដ៏មានឥទ្ធិពល ត្រូវបានរួចពីទោសហើយ និងបានចាកចេញពីមន្ទីរពេទ្យប៉ូលិស ក្នុងសភាពដៃរុំបង់ ហើយស្ថិតនៅក្នុងរថយន្ត យីហោ Mercedes ពណ៌ខ្មៅ។ 

 

ក្នុងដំណើរចាកចេញពីមន្ទីរពេទ្យនេះ លោកស្រី Paetongtarn Shinawatra ប្រធានបក្សភឿថៃ បានទៅទទួលឪពុកដោយផ្ទាល់ និងបានឆ្ពោះទៅផ្ទះក្នុងក្រុងបាងកកប្រមាណជា ២៥នាទី ក្រោយ។ 

 

«លោកថាក់ស៊ីន បានមកដល់ផ្ទះហើយ។ សង្ឃឹមថា លោកមានសុខភាពល្អ»។ លោកស្រី Paetongtarn បានសរសេរសារលើបណ្តាញសង្គម X បែបនេះ នៅថ្ងៃទី១៨ ខែកុម្ភៈ។ 

 

មហាសេដ្ឋីថៃរូបនេះ អាចរួចពីទោសមុនពេលកំណត់ គឺដោយសារតែអាយុ, លក្ខខណ្ឌសុខភាព និងរយៈពេលជាប់ពន្ធនាគារ។ 

 

អតីតនាយករដ្ឋមន្រ្តីថៃរូបនេះ បានចំណាយពេលនៅក្រៅប្រទេសរហូតដល់ ១៥ឆ្នាំឯណោះ ដើម្បីគេចពីបទចោទ និងការជាប់ពន្ធនាគារ។​ យ៉ាងណាមិញ ស្របពេលបក្សភឿថៃ ទទួលបានសំឡេងគ្រប់គ្រាន់ក្នុងសភា ក្នុងការរៀបចំរដ្ឋាភិបាល លោកថាក់ស៊ីន បានសម្រេចត្រលប់មកប្រទេសវិញ ហើយត្រូវបានតុលាការសម្រេចឱ្យជាប់ពន្ធនាគាររយៈពេល ៨ឆ្នាំ ដោយសារតែការរំលោភអំណាច, ការផ្តល់ប្រាក់កម្ចីឱ្យរដ្ឋាភិបាលមីយ៉ាន់ម៉ា និងទំនាស់ផលប្រយោជន៍ជាដើម។ 

 

ប៉ុន្មានខែក្រោយ មហាក្សត្រថៃ បានបន្ធូរបន្ថយទោសលោកថាក់ស៊ីន មកត្រឹមមួយឆ្នាំ។ យ៉ាងណាមិញ លោកថាក់ស៊ីន បានចំណាយពេលជាប់ឃុំរយៈពេល ៦ខែ ក្នុងមន្ទីរពេទ្យប៉ូលិសទាំងស្រុង ដោយជាប់ពន្ធនាគារត្រឹមប៉ុន្មានម៉ោងប៉ុណ្ណោះ ដោយសារបញ្ហាសុខភាព សម្ពាធឈាមឡើងខ្ពស់ និងចុកទ្រូងជាដើម៕