ពីសន្និសីទសន្តិសុខក្រុងMunich អាល្លឺម៉ង់ លោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន បានប្រកាសអញ្ជើញលោកដូណាល់ ត្រាំ អតីតប្រធានាធិបតីអាម៉េរិក ទៅតំបន់ជួរមុខនៃសង្រ្គាមអ៊ុយក្រែន-រុស្ស៊ី ដើម្បីពិនិត្យមើលស្ថានការណ៍ដោយផ្ទាល់។ 

 

«លោកត្រាំ បើគាត់នឹងទៅ ខ្ញុំត្រៀមខ្លួនរួចរាល់ជាស្រេចក្នុងការទៅជាមួយគាត់នៅតំបន់ជួរមុខ»។ ប្រធានាធិបតីអ៊ុយក្រែន បានថ្លែងបែបនេះពីលើឆាក ក្នុងវេទិកាសន្និសីទសន្តិសុខក្រុងMunichនៅថ្ងៃទី១៧ ខែកុម្ភៈ។ នៅចំពោះមុខអ្នកចូលរួម លោក ហ្សេលេនស្គី បានយល់ថា វាមានចាំបាច់សម្រាប់អ៊ុយក្រែន ក្នុងការបន្តទំនាក់ទំនងល្អជាមួយបក្សសាធារណរដ្ឋ និងប្រជាធិបតេយ្យ។ 

 

បើតាមលោក ហ្សេលេនស្គី ការអញ្ជើញលោកត្រាំ ទៅតំបន់ជួរមុខនៃសង្រ្គាម គឺសំខាន់ណាស់ ដើម្បីបង្ហាញអ្នកសម្រេចចិត្ត ពិនិត្យមើលពីស្ថានភាពសង្រ្គាមជាក់ស្តែង។ ការអញ្ជើញរបស់មេដឹកនាំអ៊ុយក្រែន ធ្វើឡើងមុនការបោះឆ្នោតប្រធានាធិបតីអាម៉េរិក នៅខែវិច្ឆិកា ខណៈលោកត្រាំ ជាបេក្ខជនដ៏សំខាន់មួយនៅក្នុងបក្សសាធារណរដ្ឋ។ 

 

កន្លងមក លោកត្រាំ ​បាន​គំរាម​បោះ​បង់​សមាជិក​ណាតូ​ដែល​មិន​បាន​រួម​ចំណែក​ថវិកា​គ្រប់គ្រាន់ ក្នុងអង្គការណាតូស ​ក្នុង​ករណី​ដែល​ពួក​គេ​ត្រូវ​បាន​វាយ​ប្រហារ​ដោយ​រុស្ស៊ី បើសិនបើលោកក្លាយជាប្រធានាធិបតីជាថ្មី៕