RFI
អន្តរជាតិ
រដ្ឋមន្ត្រីការបរទេសកាណាដា និងសមភាគីចិន បានជួបគ្នានៅអាល្លឺម៉ង់ ។ © AFP
×![]()
ដោយ៖ហេង ឧត្តម/RFI ខេមរភាសា
រដ្ឋមន្ត្រីការបរទេសកាណាដា និងសមភាគីចិន បានជួបគ្នានៅអាល្លឺម៉ង់ កាលពីចុងសប្តាហ៍។ ប្រមុខទូត លោក វ៉ាង យី បានថ្លែងថា ប្រទេសទាំងពីរ គ្មានភាពជាសត្រូវនឹងគ្នាទេ ហើយចិនបដិសេធច្រានចោល«ព័ត៌មានមិនពិត» ដែលចោទប្រកាន់ថា រដ្ឋបាលក្រុងប៉េកាំងជ្រៀងជ្រែកកិច្ចការផ្ទៃក្នុងរបស់កាដាណា។ ប្រភពពីក្រសួងការបរទេសកាណាដាវិញ បានឲ្យដឹងថា ភាគីទាំងពីរយល់ព្រមបន្តជជែកគ្នា ដោយស្មារតីគោពទៅវិញទៅមក។ គួរជ្រាបថា សញ្ញាណសម្របសម្រួលផ្លូវការទូតនេះ គឺបន្ទាប់ពី ប្រទេសទាំងពីរ បានឈ្លោះទាស់សម្តីគ្នាជាច្រើនឆ្នាំមកហើយ។
«ទំនាក់ទំនងលំបាកតានតឹងរវាង ចិន និង កាដាណា គឺប្រទេសចិនមិនចង់ឃើញសោះឡើយ។»។ នេះជាអ្វីដែល ប្រមុខទូតចិន លោក វ៉ាង យី បានបញ្ជាក់ប្រាប់ទៅកាន់ រដ្ឋមន្ត្រីការបរទេសកាណាដា នៅក្នុងជំនួបទ្វេភាគី ដាច់ដោយឡែក នាឱកាសសន្និសីទក្រុងម៉ុយនិចស្តីពីសន្តិសុខ នៅអាល្លឺម៉ង់។ អ្នកការទូតចាស់វស្សា លោក វ៉ាង យី ក៏បានអះអាងទៀតថា «ប្រទេសទាំងពីរ គ្មានរឿងត្រូវឈ្លោះគ្នាទេ ហើយនិង រឹងតែពុំមែនសត្រូវនឹងគ្នាទៅទៀត។ មិនតែប៉ុណ្ណោះ ប្រទេសទាំងពីរ គួរតែត្រូវវិលទៅរកកិច្ចសហការ ក្នុងភាពជាដៃគូនឹងគ្នា»។ នេះបើតាមសេចក្តីថ្លែងការណ៍របស់ក្រសួងការបរទេសចិន ចេញផ្សាយ នៅថ្ងៃអាទិត្យ ទី១៨កុម្ភៈ ដោយបញ្ជាក់ទៀតថា ភាគីចិនបដិសេធច្រានចោលព័ត៌មានមិនពិតប្រឌិតក្លែងក្លាយ ដែលនាំឲ្យសង្ស័យថា រដ្ឋអំណាចចិនប៉េកាំង ជ្រៀតជ្រែកកិច្ចការផ្ទៃក្នុងរបស់កាដាណា។
សំណុំរឿងជ្រៀតជ្រែកកិច្ចការផ្ទៃក្នុងនេះ បានជំរុញឲ្យ រដ្ឋាភិបាលកាណាដា បើកការស៊ើបអង្កេតកាលពីឆ្នាំទៅមិញ ដើម្បីបំភ្លឺករណីលួចស៊ើបការណ៍សម្ងាត់ បម្រើផលប្រយោជន៍រដ្ឋបរទេស។ ការជ្រៀតជ្រែកពីបរទេស ក្នុងទីនេះ គឺមាន ចិន រុស្ស៊ី និងឥណ្ឌា។
នាប៉ុន្មានឆ្នាំចុងក្រោយនេះ ទំនាក់ទំនងចិននិងកាណាដា បានជួបភាពល្អក់កកជាខ្លាំង បន្ទាប់ពី តម្រួតនគរបាលកាណាដា បានចាប់ឃាត់ខ្លួនអ្នកស្រី ម៉េង វ៉ាន់ចូវ ថ្នាក់ដឹកនាំក្រុមហ៊ុនបច្ចេកវិទ្យាចិន Huawei នៅឆ្នាំ២០១៨។ ជាការសងសឹក រដ្ឋអំណាចចិន បានចាប់ឃុំខ្លួន បុរសកាដាណា ២ នាក់វិញដែរ។ ជនជាតិកាដាណាទាំងពីររូប លោក Michael Spavor និងលោក Michael Kovrig បានជាប់ពន្ធនាគារចិន ប្រមាណ ៣ ឆ្នាំ។
ការសាច់ទឹកដាក់គ្នាកើតមានជាហូរហែ ហើយនិងឈានដល់ដាក់ទណ្ឌកម្មពាណិជ្ជកម្មចំពោះគ្នាទៀតផង។ កាណាដា បានចោទប្រកាន់ រដ្ឋអំណាចចិន ថាធ្វើចារកម្មស៊ើបយកការណ៍សម្ងាត់ ហើយនិងជ្រៀតជ្រែកក្នុងការបោះឆ្នោតរដ្ឋសហព័ន្ធកាណាដា ក្នុងឆ្នាំ២០១៩ និងឆ្នាំ២០២១។ ដើមឆ្នាំ២០២៤ ថ្មីៗនេះ ក្រុមប៉ូលិសស៊ើបការណ៍សម្ងាត់របស់កាណាដា ក៏បានដាក់ការសង្ស័យថា រដ្ឋអំណាចចិន បង្កប់ក្រុមឈ្លបស៊ើបការណ៍ក្នុងសហគមគ្រួសារចិននៅកាណាដា ក្នុងទីក្រុងម៉ុងរ៉េអាល់។
ទោះជាយ៉ាងណាក៏ដោយចុះ ក្នុងសេចក្តីថ្លែងការណ៍ចុះផ្សាយថ្ងៃសៅរ៍ ទី១៧កុម្ភៈ ក្រសួងការបរទេសកាណាដា បានឲ្យដឹងថា លោកស្រី មេឡានី ចូលី ប្រមុខទូតកាណាដា បានជួបសំណេះសំណាលជាមួយនឹង លោក វ៉ាង យី ប្រធានការិយាល័យនយោបាយគណៈមជ្ឈិមបក្សកុម្មុយនិស្តចិន ទទួលបន្ទុកកិច្ចការបរទេស និងជា រដ្ឋមន្ត្រីការបរទេសចិន។ សមភាគីទាំងពីរ បានពិភាក្សាអំពីទំនាក់ទំនងទ្វេភាគី ហើយនិង សំណុំបញ្ហាសន្តិសុខសកលលោក រួមទាំងការឈ្លានពានរុស្ស៊ីនៅអ៊ុយក្រែន ហើយនិងវិបត្តិនៅតំបន់មជ្ឈិបូព៌ា។ បើតាមក្រសួងការបរទេសកាណាដា គឺ ប្រមុខការទូតនៃប្រទេសទាំងពីរ បានយល់ព្រមព្រៀងគ្នាថា ត្រូវបន្តជជែកគ្នាថែមតទៀត ដោយឈរលើស្មារតីប្រាកដនិយមនិងស្ថាបនា គោរពគ្នាទៅវិញទៅមក ហើយនិង ទាក់ទងគ្នាឲ្យបានទៀងទាត់៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
6 ថ្ងៃ
