យោងតាមអនុក្រឹតដដែល គ.ស.រ មានសមាសភាពរដ្ឋមន្ត្រីក្រសួងវប្បធម៌ ជាប្រ​ធាន ហើយ​តួនាទី និងភារកិច្ចនៃគណៈកម្មការនេះមានដូចជា ពិនិត្យសម្រេច​លើគោលនយោបាយ និងផែនការយុទ្ធសាស្ត្រលើការងារប្រមូល ចងក្រង ការពារ ថែរក្សាសាស្ត្រាស្លឹករឹតទាំងអស់នៅ​កម្ពុជា។ គណៈកម្មការសាស្ត្រាស្លឹករឹត ក៏ជាអ្នកវាយតម្លៃការអនុវត្តគោលនយោបាយ និងផែនការយុទ្ធសាស្ត្រទាំងនោះដែរ។ 

 

គណៈកម្មការនេះ ក៏ជាអ្នករៀបចំក្របខណ្ឌគតិយុត្តពាក់ព័ន្ធការថែរក្សា ការការពារ និងការផ្សព្វផ្សាយសាស្ត្រាស្លឹករឹត និង​សហការ សម្របសម្រួលជាមួយភាគីពាក់ព័ន្ធ​ ក្នុងការបញ្ជូន​សាស្ត្រាស្លឹករឹតត្រឡប់មក​កម្ពុជាវិញ។ 

 

​គណៈកម្មការសាស្ត្រាស្លឹករឹត ក៏ជាអ្នកដឹកនាំការងារផ្សព្វផ្សាយសាស្ត្រាស្លឹករឹត ព្រមទាំងលើក​សំណើ និងចាត់វិធានការដោះស្រាយបញ្ហានានា ​ពាក់ព័ន្ធការប្រមូល ការការពារ ការថែរក្សា និងការផ្សព្វផ្សាយសាស្ត្រាស្លឹករឹត ស្ថិតក្នុងសមត្ថកិច្ចរបស់ខ្លួន។ 

 

លើសពីនេះទៀត គណៈកម្មការសាស្ត្រាស្លឹករឹត អាចលើកសំណើសុំអនុសាសន៍ គោលនយោបាយ និងយុទ្ធសាស្ត្រពាក់ព័ន្ធការថែរក្សា ការការពារ និងការអភិវឌ្ឍសាស្ត្រាស្លឹករឹតពីប្រធានក្រុមប្រឹក្សាបណ្ឌិតសភាចារ្យតាមការចាំបាច់។ 

ការសិក្សារៀបចំបង្កើតបណ្ណាល័យ ឬសារមន្ទីរសាស្ត្រាស្លឹករឹត សម្រាប់ជាកន្លែងអភិរក្សនិងស្រាវជ្រាវ អំពីសាស្ត្រាស្លឹករឹត ក៏ស្ថិតក្រោមដែនតួនាទី និងភារកិច្ចរបស់គណៈកម្មការសាស្ត្រាស្លឹករឹតនេះដែរ។

 

សូមជម្រាបថា ពាក្យ សាស្ត្រាស្លឹករឹត ក្នុងអនុក្រឹតនេះ សំដៅដល់ឯកសារសរសេរ ឬចារលើស្លឹកទ្រាំង ឬស្លឹកត្នោតជាដើម ដែលកត់ត្រាពីក្បួន ច្បាប់ អក្សរសិស្បិ៍ ធម៌វិន័យ ប្រវត្តិសាស្ត្រ ឬរឿងរ៉ាវពីបុរាណ៕