ជាតិ
ក្រុមគ្រូពេទ្យខ្មែរ-សិង្ហបុរី ព្រួយបារម្ភចំពោះការប្រើប្រាស់ឱសថប្រឆាំងមេរោគ មិនបានត្រឹមត្រូវ ក្រុមគ្រូពេទ្យខ្មែរ-សិង្ហបុរី ចូលរួមក្នុងសិក្ខាសាលាស្ដីពី ការគ្រប់គ្រងការប្រើប្រាស់ឱសថប្រឆាំងមេរោគ។
× សៀមរាប៖ ក្រុមគ្រូពេទ្យខ្មែរ និងសិង្ហបុរី បានជួបពិភាក្សាគ្នាក្នុងសិក្ខាសាលាស្ដីពី ការគ្រប់គ្រងការប្រើប្រាស់ឱសថប្រឆាំងនឹងមេរោគ ក្នុងន័យកំណត់ការព្យាបាលអ្នកជំងឺឱ្យសមស្រប និងកុំឱ្យមានភាពសុំានឹងការប្រើឱសថប្រឆាំងមេរោគ។
នាយករងមន្ទីរពេទ្យកុមារអង្គរ លោកវេជ្ជបណ្ឌិត ង៉ែត ពិសេស ថ្លែងថា ភាពសុំានៃឱសថប្រឆាំងនឹងមេរោគ (AMR) កំពុងគំរាមកំហែងជាសកលចំពោះសុខភាពសាធារណៈ និងសុវត្ថិភាពអ្នកជំងឺ។ លោកបន្តថា នៅឆ្នាំ២០៥០ ការគំរាមកំហែងនេះ នឹងអាចឱ្យមនុស្សស្លាប់១០លាននាក់ និងធ្វើឱ្យខាតបង់សេដ្ឋកិច្ចប្រមាណ ១០០ពាន់លានដុល្លារអាមេរិកក្នុងមួយឆ្នាំ។
ក្នុងសិក្ខាសាលាដែលរៀបចំឡើងនៅថ្ងៃទី២២ កុម្ភៈ នៅសណ្ឋាគារ សោមាទេវី អង្គរ លោក ង៉ែត ពិសេស បានសង្កត់ធ្ងន់ថា អ្នកជំងឺជាច្រើនដែលត្រូវបានសង្ស័យមានការឆ្លងមេរោគ ត្រូវបានព្យាបាលដោយថ្នាំ អង់ទីប៊ីយោទិចក្នុងវិសាលភាពទូលំទូលាយ គ្មានការវិនិច្ឆ័យ និងណែនាំអំពីមីក្រូជីវសាស្រ្តគ្រប់គ្រាន់។ លោកបន្ថែមថា ចំណុចនេះធ្វើឱ្យការប្រើប្រាស់ឱសថប្រឆាំងនឹងមេរោគមានភាពសុំា ហើយអត្រាអ្នកស្លាប់ ក៏មានការកើនខ្លាំង រួមទាំងខាតបង់សេដ្ឋកិច្ចមួយផ្នែកធំ។
រដ្ឋលេខាធិការក្រសួងសុខាភិបាល លោកសាស្រ្ដាចារ្យ កុយ វ៉ាន់នី លើកឡើងថា ភាពសុំានៃឱសថប្រឆាំងមេរោគកើតឡើង ដោយសារការប្រើប្រាស់ឱសថប្រឆាំងមេរោគ មិនសមស្របតាមគោលការណ៍ណែនាំប្រតិបត្តិ និងការធ្វើរោគវិនិច្ឆ័យដោយមន្ទីរពិសោធន៍ មិនបានត្រឹមត្រូវ។ លោករំឭកថា ក្នុងកម្មវិធីគ្រប់គ្រងការប្រើប្រាស់ឱសថប្រឆាំងមេរោគនៅកម្ពុជា មន្ទីរពេទ្យកាល់ម៉ែតបានចុះកិច្ចសហការ ជាមួយសកលវិទ្យាល័យជាតិសិង្ហបុរីនៅឆ្នាំ២០១៨ ដើម្បីសិក្សាពីលទ្ធភាពក្នុងការអនុវត្តការងារនេះ ។ ក្នុងនោះមានការបញ្ជូនក្រុមគ្រូពេទ្យ ដើម្បីទៅសិក្សានៅសិង្ហបុរី និងបានចែកចាយចំណេះដឹងនោះ ទៅបណ្ដាមន្ទីរពេទ្យជាតិនៅកម្ពុជា ចំនួន១៧ផងដែរ។
លោក កុយ វ៉ាន់នី រដ្ឋលេខាធិការក្រសួងសុខាភិបាល
ជាមួយគ្នានេះ លោក កុយ វ៉ាន់នី រំពឹងថា សិក្ខាសាលារយៈពេល២ថ្ងៃ នឹងជួយឱ្យក្រុមគ្រូពេទ្យ ទទួលបានការសិក្សាថ្មីៗ និងការព្យាបាលឱ្យបានត្រឹមត្រូវ សំដៅចូលរួមកាត់បន្ថយអត្រាឈឺ និងស្លាប់របស់អ្នកជំងឺ ,កាត់បន្ថយភាពសុំានៃឱសថប្រឆាំងមេរោគ និងកាត់បន្ថយការចំណាយរបស់អ្នកជំងឺជាដើម។ លោកសាស្រ្តាចារ្យ ក៏បានវាយតម្លៃខ្ពស់ចំពោះការចូលរួមរបស់មន្ទីរពេទ្យកុមារអង្គរ ក្នុងការអភិវឌ្ឍន៍វិស័យសុខាភិបាលកម្ពុជា ជំរុញឱ្យខឿនសេដ្ឋកិច្ចជាតិរីកចម្រើន និងកាត់បន្ថយភាពក្រីក្រ៕
Tag:
សុខាភិបាល
ឱសថប្រឆាំងនឹងមេរោគ
© រក្សាសិទ្ធិដោយ thmeythmey.com