ជាតិ
ក្រុមបច្ចេកទេសកំពុងបង់លេខថ្ម ដែលរាយប៉ាយនៅកំពែងខាងក្រៅប្រាសាទអង្គរវត្ត ថ្មនៅរាយប៉ាយដែលកំពុងរៀបចំបង់លេខឬចុះលេខឡើងវិញ។ រូបភាពពីអាជ្ញាធរជាតិអប្សរា
×
ដោយ៖ ថោង ប្រណី
សៀមរាប៖ ក្រុមអ្នកបច្ចេកទេសនៃអាជ្ញាធរជាតិអប្សរា កំពុងរៀបចំចុះលេខបញ្ជីថ្ម ជិត២ពាន់ដុំ ដែលនៅរាយប៉ាយជាប់កំពែងខាងក្រៅ ផ្នែកខាងត្បូង និងខាងជើងនៃខ្លោងទ្វារខាងលិចរបស់ប្រាសាទអង្គរវត្ត។ ការណ៍នេះ ដើម្បីកំណត់ទីតាំង និងប្រភពរបស់ថ្មឱ្យបានច្បាស់លាស់ ។
ក្រុមការងារបច្ចេកទេសនៃនាយកដ្ឋានអភិរក្ស និងបុរាណវិទ្យា នៃអាជ្ញាធរជាតិអប្សរា បានសង្កេតឃើញថា ថ្មមួយចំនួនដែលកំពុងរៀបចំចុះលេខ ខ្លះជារចនាសម្ពន្ធរបស់តួប៉មទាំង៣ នៃខ្លោងទ្វារខាងលិចរបស់ប្រាសាទអង្គរវត្ត។ មួយចំនួនអាចជាកំពូលខាងលើ ដោយសារតែមានរាងរង្វង់មូលជាត្របកឈូក។ ក្រៅពីនោះ បំណែកមួយចំនួនទៀត អាចជាដំបូលរបស់រោងទង ជាខឿនក្រោម ព្រមទាំងបំណែករូបចម្លាក់ ដូចជា តោ ប្រអប់ជើង និងជើងទម្រជាដើម។ល។ នៅជំនាន់បារាំង គេធ្លាប់យកថ្មទាំងនោះមករក្សាទុកនៅទីនេះ។ នេះបើតាមការរៀបរាប់របស់ លោក អន សុភាព ជាបុរាណវិទូនៃអាជ្ញាធរជាតិអប្សរា។
ថ្មនៅរាយប៉ាយដែលកំពុងរៀបចំបង់លេខឬចុះលេខឡើងវិញ។ រូបភាពពីអាជ្ញាធរជាតិអប្សរា
លោកបុរាណវិទូ បន្ថែមថា ក្រោយបញ្ចប់ការចុះលេខ ក្រុមការងារនឹងសាកល្បងផ្គុំថ្មទាំងនោះ ដើម្បីរកទីតាំងដើមនិងប្រភពរបស់វា។ លោកថា ការរើថ្មនេះមានភាពស្មុគស្មាញខ្លះៗ ព្រោះថ្មបានរលំគរចម្រុះគ្នាច្រើនទីតាំង។ ឯថ្មខ្លះទៀត ធ្លាប់បានគេចល័តចេញពីកន្លែងដើមម្តងហើយ ដែលធ្វើឱ្យមានការលំបាកស្វែងរកទីតាំង និងប្រភពដើមឡើងវិញ៕
© រក្សាសិទ្ធិដោយ thmeythmey.com