អន្តរជាតិ
អត្រាកំណើតធា្លក់ទាបបំផុតនៅកូរ៉េខាងត្បូង និងកាន់តែតិចទៅៗនៅជប៉ុន © iStock/interstid
×![]()
ដោយ៖អៀង សុខម៉ិញ/RFI
បើទោះបីជារដ្ឋាភិបាលបានចំណាយថវិការាប់ពាន់លានអឺរ៉ូដើម្បីលើកទឹកចិត្តឱ្យបង្កើតកូនក្តី ក៏ប្រជាពលរដ្ឋកូរ៉េខាងត្បូងមិនចាប់អារម្មណ៍ដែរ។ អត្រាកំណើតនៅប្រទេសកូរ៉េខាងត្បូង បានធ្លាក់ចុះដល់កំរិតដែលមិនធ្លាប់មានសោះគិតចាប់តាំងពីប្រទេសផ្តើមចុះស្ថិតិកំណើតនៅឆ្នាំ១៩៧០មក។ នេះបើតាមតួលេខប្រកាសដោយកូរ៉េខាងត្បូងនៅថ្ងៃពុធទី២៨កុម្ភៈ។
កូរ៉េខាងត្បូងជាប្រទេសមានអត្រាកំណើតទាបជាងគេបំផុតនៅលើពិភពលោកស្រាប់ទៅហើយ ហើយនៅឆ្នាំ២០២៣នេះអត្រាកំណើតបានធ្លាក់ចុះបន្ថែមទៀត អស់៧,៧%បើប្រៀបទៅនឹងឆ្នាំ២០២២។ ពោលគឺជាមធ្យមភាគ ស្ត្រីម្នាក់មានកូនតែ០,៧២នាក់ទល់និង០,៧៨នាក់កាលពីឆ្នាំមុន។ នេះបើតាមស្ថិតិផ្តល់ដោយរដ្ឋាភិបាលកូរ៉េខាងត្បូងនៅថ្ងៃពុធទី ២៨កុម្ភៈ២០២៤ ដោយបញ្ជាក់ថា អត្រាកំណើតនៅកូរ៉េខាងត្បូងបានធ្លាក់ចុះចំណុចទាបបំផុត គិតចាប់តាំងពីប្រទេសផ្តើមកត់ត្រាធ្វើស្ថិតិកំណើតនៅឆ្នាំ១៩៧០មក ហើយនឹងបន្តធ្លាក់ចុះទៀតដល់០,៦៨នៅឆ្នាំ២០២៤។
ដើម្បីរក្សាចំនួនប្រជាជនឱ្យនៅថេរ (៥១លាននាក់) ស្ត្រីកូរ៉េខាងត្បូងត្រូវមានកូនជាមធ្យម២,១នាក់។ តែបើការបង្កើតកូនស្ថិតក្នុងល្បឿននេះ នៅឆ្នាំ២១០០ ចំនួនប្រជាពលរដ្ឋកូរ៉េខាងត្បូងនឹងធ្លាក់មកនៅត្រឹម២៦,៨លាននាក់ប៉ុណ្ណោះ។ នេះបើតាមវិទ្យាស្ថានវាយតម្លៃសុខភាពអាមេរិក។
ដើម្បីបញ្ចៀសវិបត្តិ “រលត់ផុតពូជជាតិ” អត្រាកំណើតបានក្លាយជាអាទិភាពជាតិ ដែលរដ្ឋាភិបាលសេអ៊ូលបានសន្យាកាលពីខែធ្នូ ចាត់វិធានការពិសេស និងក្លាយជាប្រធានបទរបស់គ្រប់គណបក្សនយោបាយកូរ៉េខាងត្បូងសម្រាប់ការបោះឆ្នោតនៅខែមេសាខាងមុខ។ គណបក្សនីមួយៗបានប្តេជ្ញាបង្កើនចំនួនលំនៅដ្ឋានរដ្ឋ សម្រួលការខ្ចីប្រាក់ ។ល។ និង។ល។
តាំងពីឆ្នាំ២០០៦មក កូរ៉េខាងត្បូងមានផែនការលើកតម្កើងចំនួនប្រជាពលរដ្ឋ ដោយផ្តល់ប្រាក់ឧបត្ថម្ភ ផ្តល់សេវាថែទាំទារក និងជួយព្យាបាលរោគអារ ក្នុងទំហំដល់ទៅ២៤៩ពាន់លានអឺរ៉ូ ប៉ុន្តែមិនអាចស្តារអត្រាកំណើតឱ្យស្ទុះឡើងវិញបានទេ ព្រោះបើតាមអ្នកវិភាគ ផ្ទះថ្លៃ ជីវិតក៏ថ្លៃ ចិញ្ចឹមកូនត្រូវការថវិកាច្រើន ហើយការងារមានលក្ខណៈប្រកួតប្រជែងខ្លាំងទើបបានបា្រក់ខែខ្ពស់។ ជាងនេះទៅទៀតស្ត្រីមានបន្ទុកទ្វេ ត្រូវធ្វើការផង មើលថែអប់រំកូនផងនិងកិច្ចការផ្ទះទៀត។
កូរ៉េខាងត្បូង មិនមែនជាប្រទេសតែមួយក្នុងតំបន់ដែលមានវិបត្តិប្រជាសាស្ត្រទេ។ ជប៉ុនជិតខាង ក៏កំពុងបន្តមានអត្រាកំណើតធ្លាក់ចុះជាគម្រប់ឆ្នាំទី៨ជាប់គ្នា។ នៅឆ្នាំ២០២៣ ជប៉ុនមានកំណើតទារក៥,១%តិចជាងឆ្នាំ២០២២ ឬជាមធ្យមស្ត្រីម្នាក់បង្កើតកូនតែ១,២៦នាក់ ពោលគឺប្រមាណ៧សែននាក់កន្លះតែប៉ុណ្ណោះ ក្នុងខណៈដែលចំនួនមរណៈរបស់មនុស្សចាស់មានដល់ទៅជាងមួយលាននាក់កន្លះ។ មួយភាគ១០នៃពលរដ្ឋជប៉ុន មានអាយុលើសពី៨០ឆ្នាំ។ មានប្រពៃណីមានកូនក្រោយរៀបការ ចំនួនអាពាហ៍ពិពាហ៍នៅជប៉ុនបានធ្លាក់ចុះ៥,៩% នៅឆ្នាំ២០២៣។ គឺទាបបំផុតមិនធ្លាប់មានទេ គិតចាប់តាំងពីឆ្នាំ១៩៣៣មក សម្រាប់ជប៉ុន។ អត្រាកំណើតក៏ទាបខ្លាំងបំផុតមិនធ្លាប់មានដែរនៅក្នុងប្រទេសចិន ដោយមានអត្រាកំណើតតែ១,០៩តែប៉ុណ្ណោះ៕
© រក្សាសិទ្ធិដោយ thmeythmey.com
