អត្ថបទដោយ៖ ម៉ី មិនិត្យ
ឥណ្ឌាប្រកាសផែនការសង់មូលដ្ឋានទ័ពជើងទឹកនៅឆ្នេរសមុទ្រភាគនិរតី ជិតកោះម៉ាល់ឌីវ ខណៈពេលដែលភាពតានតឹងរវាងភាគីទាំងពីរ កាន់តែកើនឡើង។ ចាប់តាំងពីឆ្នាំមុនមក ម៉ាល់ឌីវ ចាប់ផ្តើមបង្កើនទំនាក់ទំនងជាមួយចិន ដែលជាប្រទេសមួយមានទំនាក់ទំនងមិនសូវល្អជាមួយឥណ្ឌាឡើយ។
កងទ័ពជើងទឹកឥណ្ឌា នៅថ្ងៃទី២ ខែមីនា បានប្រកាសគម្រោងសាងសង់មូលដ្ឋានទ័ពជើងទឹក INS Jatayu នៅលើកោះ Minicoy នៃប្រជុំកោះLakshadweep ចម្ងាយតែ១៣០គីឡូម៉ែត្រ នៅភាគខាងជើងកោះម៉ាល់ឌីវ។ ការប្រកាសនេះ ធ្វើឡើងក្រោយពេលកោះម៉ាល់ឌីវ ស្នើឱ្យឥណ្ឌាជំនួសទាហានឥណ្ឌា ជាមន្រ្តីស៊ីវិលវិញ។
«មូលដ្ឋានទ័ពជើងទឹកនេះ ជាផ្នែកមួយនៃគោលនយោបាយ ដើម្បី បង្កើនហេដ្ឋារចនាសម្ព័ន្ធសន្តិសុខនៅកោះសំខាន់ៗជាយុទ្ធសាស្ត្រ»។ កងទ័ពជើងទឹកឥណ្ឌាបានបញ្ជាក់បែបនេះ។
ទំនាក់ទំនងឥណ្ឌា និងម៉ាល់ឌីវមានភាពល្អក់កករខ្លាំង ចាប់តាំងពីប្រធានាធិបតីម៉ាល់ឌីវ លោក Mohamed Muizzu បានឡើងកាន់អំណាចមកម្លេះ។ មេដឹកនាំរូបនេះ បានប្រកាន់ជំហរលំអៀងទៅរកចិន។
តាមរយៈក្រសួងការបរទេសម៉ាល់ឌីវ កាលពីថ្ងៃទី ២ ខែមករាកន្លងមក មន្ត្រីប្រទេសទាំងពីរ បានជួបប្រជុំគ្នានៅទីក្រុងញូវដែលី ហើយបានព្រមព្រៀងគ្នាថា ឥណ្ឌានឹងចាប់ផ្តើមដកកងកម្លាំងរបស់ខ្លួនចេញពីម៉ាល់ឌីវនៅថ្ងៃទី១០ ខែមីនា និងបញ្ចប់ដំណើរការនៅថ្ងៃទី១០ ខែឧសភា។ យ៉ាងហោចណាស់ បុគ្គលិកយោធាឥណ្ឌា ៧៥នាក់ ស្ថិតនៅក្នុងប្រទេសម៉ាល់ឌីវ ដែលជួយដឹកជញ្ជូនអ្នកជំងឺពីកោះដាច់ស្រយាល និងសង្គ្រោះមនុស្សនៅសមុទ្រ។
លើសពីនេះ លោក Muizzu ធ្លាប់បានបំពេញទស្សនកិច្ចនៅចិនរយៈពេល៥ថ្ងៃ ដោយបានលើកឡើងថា ទោះបីជាម៉ាល់ឌីវតូចមែនក្តី ក៏មិនអនុញ្ញាតឱ្យជាន់ឈ្លីបានឡើយ។
សំដីធ្ងន់ពីសំណាក់លោកប្រធានាធិបតីបែបនេះ សំដៅលើបណ្តាញសង្គមឥណ្ឌា ដែលផ្សព្វផ្សាយឱ្យទេសចរធ្វើពហិការមិនឱ្យទៅលេងនៅម៉ាល់ឌីវ។ ការផ្សព្វផ្សាយនេះធ្វើឡើងក្រោយ មន្ត្រីម៉ាល់ឌីវ៣រូប បានប្រមាទមើលងាយនាយករដ្ឋមន្ត្រីឥណ្ឌា លោក នារិន្ទ្រា ម៉ូឌី។ ក្រោយមក មន្ត្រីទាំងនោះត្រូវបានគេព្យូរការងារ។
ឥណ្ឌាក៏បារម្ភពីកំណើនពីឥទ្ធិពលរបស់ចិនក្នុងប្រជុំកោះ ដែលមានផ្លូវទឹកដឹកជញ្ជូនអន្តរជាតិសំខាន់ៗនៅភាគខាងកើតខាងលិចផងដែរ។
តាមសេចក្តីថ្លែងការរបស់កងទ័ពជើងទឹកឥណ្ឌា ការពង្រីកមូលដ្ឋានថ្មីនេះដោយសារចង់ «ឃ្លាំមើលប្រតិបត្តិការ» ក្នុងតំបន់ប្រជុំកោះ និងជួយសម្រួលដល់កិច្ចខិតខំប្រឹងប្រែងរបស់កងទ័ពជើងទឹកឥណ្ឌា ចំពោះការប្រឆាំងចោរសមុទ្រ និងប្រឆាំងគ្រឿងញៀននៅសមុទ្រអារ៉ាប់ខាងលិច។
សូមបញ្ជាក់ថា ប្រទេសឥណ្ឌាមានមូលដ្ឋានរួចហើយនៅប្រជុំកោះ Lakshadweeps ឈ្មោះ INS Dweeprakshak នៅលើកោះKavaratti។ ការសង់មូលដ្ឋានថ្មី គឺដើម្បីបង្កើនសមត្ថភាពរបស់កងទ័ពជើងទឹកឥណ្ឌាក្នុងនាមជាអ្នកសង្គ្រោះ និងការពារក្នុងតំបន់ ព្រមទាំងមានការតភ្ជាប់ជាមួយដីគោកផងដែរ៕