RFI
អន្តរជាតិ
វៀតណាម ចាប់ខ្លួនសកម្មជននយោបាយប្រឆាំង ៣ នាក់។ © Human Rights Watch
×![]()
ដោយ៖ហេង ឧត្តម/RFI ខេមរភាសា
ថ្មីៗនេះ នគរបាលវៀតណាម បានចាប់ឃុំខ្លួនសកម្មជននយោបាយ ៣ នាក់ ដែលតែងតែរិះគន់ប្រឆាំងរដ្ឋអំណាចសង្គមនិយមវៀតណាម។ នេះបើតាមអង្គការការពារសិទ្ធិមនុស្ស Human Rights Watch ដែលបានចេញផ្សាយរបាយការណ៍ថ្មី នៅថ្ងៃពុធ ទី៦មីនា។ រដ្ឋអំណាចវៀតណាម បដិសេធថា គ្មានចាប់ខ្លួននរណាម្នាក់ឡើយ។ 
សកម្មជននយោយបាយប្រឆាំង ៣រូប ដ៏លេចធ្លោ ដែលតែងតែឧស្សាហ៍រិះគន់ថ្កោលទោសរដ្ឋាភិបាលវៀតណាម ត្រូវរដ្ឋអំណាច ចាប់ខ្លួនឃុំខ្លួន កាលពីពេលថ្មីៗ។ អង្គការការពារសិទ្ធិមនុស្ស Human Rights Watch តាមរយៈ អ្នកតំណាងនៅតំបន់អាស៊ី លោក ផីល រ៉ូប៊ឺតស៊ុន បានអះអាងថា «ជនទាំង៣នាក់ គ្មានបានធ្វើអ្វីខុសឡើង។ ពួកគេគ្រាន់តែបានអនុវត្តសិទ្ធិបញ្ចេញមតិក្នុងនាមជាពលរដ្ឋតែប៉ុណ្ណោះ»។
បើតាម អង្គការការពារសិទ្ធិមនុស្ស Human Rights Watch ប្រចាំតំបន់អាស៊ី សកម្មជន ២ ត្រូវចាប់ខ្លួននៅរដ្ឋធានីហាណូយ ហើយម្នាក់ទៀត នៅប៉ែកកណ្តាលនៃផ្ទៃប្រទេស។ ពួកគេ ៣ សុទ្ធតែជាអ្នកជើងខ្លាំងខាងនិយាយនិងខាងសរសេររិះគន់ក្នុងបណ្តាញសង្គម និងធ្លាប់ធ្វើជាអ្នកកាសែតផង។
លោក ង្វៀន ជី ទុយៀន អាយុ ៤៩ឆ្នាំ ត្រូវនគរបាលចាប់ខ្លួន នៅសប្តាហ៍មុន ថ្ងៃទី២៩កុម្ភៈ។ លោកនេះ ប្រើបណ្តាញសង្គមហ្វេសបុកនិងយូធូបដើម្បីរិះគន់ផ្នែកនយោបាយ។ លោកមានយូធូប២។ ១ មានវីដេអូ ១ ៦០០ ហើយអ្នកតាមដានមើល ៩៨ ០០០គណនី។ យូធូប១ទៀត ផ្សាយវីដេអូ១ពាន់ មានអ្នកតាមដានមើល ៦ ម៉ឺនគណនី។ មុនពេលចាប់ខ្លួន លោក ង្វៀន ជី ទុយៀន ធ្លាប់ចេញមុខធ្វើបាតុកម្មគាំទ្របរិស្ថាន ហើយត្រូវប៉ូលិសវៀតណាមចាប់សួរចម្លើយ និងធ្វើទុក្ខបុកម្នេញជាច្រើន រួចទៅហើយ។
សកម្មជនមួយរូបទៀតដែលត្រូវចាប់ខ្លួនក្នុងថ្ងៃដដែល គឺ លោក ង្វៀន វូ ប៊ិញ អាយុ ៥៥ ឆ្នាំ ធ្លាប់ធ្វើជាអ្នកកាសែតបម្រើរដ្ឋាភិបាលវៀតណាម ប្រមាណ ១ទសវត្សរ៍ ក៏ប៉ុន្តែក្រោយមក រូបលោកត្រូវតុលាការចាប់ឃុំខ្លួន ព្រោះតែបានបង្ហាញសកម្មភាពចូលរួមចលនាប្រឆាំងរដ្ឋអំណាច។ នៅឆ្នាំ២០០៣ តុលាការបានកាត់ទោសលោក ង្វៀន វូ ប៊ិញ ឲ្យជាប់ពន្ធនាគារ ៣ ឆ្នាំ ពីបទចារកម្ម។ ចន្លោះឆ្នាំ២០១៥ដល់២០២៤ លោក ង្វៀន វូ ប៊ិញ បានបម្រើការឲ្យវិទ្យុអាស៊ីសេរី Radio Free Asia ។
បុរសទី៣ គឺលោក ហ័ង វៀត កាញ វ័យ ៤១ឆ្នាំ ត្រូវចាប់ខ្លួន ថ្ងៃទី១មីនា នៅប៉ែកកណ្តាលប្រទេស។ លោកនេះ ប្រើហ្វេសបុកតាំងពីឆ្នាំ២០១៨ ដើម្បីនិយាយបញ្ចេញមតិរិះគន់សង្គមនិងនយោបាយវៀតណាម។
ដំណឹងជុំវិញការចាប់ខ្លួនបុរសទាំងនេះ ត្រូវរដ្ឋាភិបាលសង្គមនិយមវៀតណាម បដិសេធច្រានចោល និងថាគ្មានបានចាប់ឃាត់ខ្លួននរណាម្នាក់ឡើយ។
យោងតាមអង្គការការពារសិទ្ធិមនុស្សនៅក្នុងស្រុកវៀតណាម ហើយនិង Human Rights Watch នៅវៀតណាម មានអ្នកទោសមនសិការប្រមាណ ជា ១៦០ -១៧០ នាក់ កំពុងតែជាប់ឃុំក្នុងពន្ធនាគារ។ អង្គការសិទ្ធិមនុស្ស ទាំងក្នុងនិងក្រៅស្រុក កំពុងតែផុសផុលផ្សាយច្រើនពីស្ថានភាពសិទ្ធិមនុស្សនិងការធ្វើទុក្ខបុកម្នេញពីសំណាក់រដ្ឋអំណាចរបបក្រុងហាណូយនេះ ក៏ពីព្រោះតែ រដ្ឋមន្ត្រីក្រសួងការបរទេសវៀតណាម បានអំពាវនាវនិងបញ្ចុះបញ្ចូលប្រទេសដទៃ ឲ្យបោះឆ្នោតគាំទ្របេក្ខភាពវៀតណាម ជាសមាជិកប្រឹក្សាសិទ្ធិមនុស្សអង្គការសហប្រជាជាតិ សម្រាប់អាណត្តិថ្មី ២០២៦-២០២៨៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
