ក្នុងបទសម្ភាសជាមួយសារព័ត៌មានថ្មីៗ អ្នកស្រី ព្រំ ធានី វ័យ៦០ឆ្នាំ ដែលជាម្ចាស់ផ្ទះ បានលើកឡើងថា ផ្ទះបុរាណនេះ មានអាយុកាលជិត២០០ឆ្នាំហើយ។​ ដើមឡើយវា មានទីតាំងនៅក្បែរមាត់ស្ទឹងសង្កែឯណោះ ប៉ុន្តែ ដោយសារការបាក់ច្រាំងជាបន្តបន្ទាប់ ទើបគេរុះរើផ្ទះនេះមកទីតាំងថ្មី ជិតវត្តសុភី សង្កាត់រតនៈ​ ក្រុងបាត់ដំបង​ ខេត្តបាត់ដំបង​ នៅក្នុងឆ្នាំ១៩៧៩។ 
  

ក្នុងឆ្នាំដដែល ក្រោមផ្ទះដ៏ចំណាស់នេះ ត្រូវបានគេប្រែក្លាយទៅជាកន្លែងលក់ដូរ បន្លែត្រីសាច់ សម្លៀកបំពាក់ និងគ្រឿងទេសដ៏សម្បូរបែប។ ផ្សារក្រោមផ្ទះបុរាណនេះ មានឈ្មោះថា«ផ្សារសុភី» ចាប់ផ្តើមលក់ពីម៉ោង៣ព្រឹក ដល់១២ថ្ងៃត្រង់ ដោយមានអាជីករ ប្រមាណ៥០ទៅ៦០ នាក់ កំពុងប្រកបរបរលក់ បន្លែត្រីសាច់ ខោអាវ គ្រឿងទេសផ្សេងៗ ។ 
 

ផ្សារក្រោមផ្ទះនេះ មានទទឹង៨ម៉ែត្រ និងបណ្តោយ១៥ ម៉ែត្រ។ ​បច្ចុប្បន្ន ឈើជញ្ចាំងផ្ទះមួយចំនួនដែលពុកផុយ អ្នកត្រូវបានអ្នកស្រី ព្រំ ធានី ជួសជុសឡើងវិញ ដោយទុកទម្រងដើម៕