ក្រសួងសុខាភិបាលកូរ៉េខាងត្បូង បានអំពាវនាវឱ្យ​គ្រូបង្រៀនពេទ្យកុំលាលែងពីតំណែង ដើម្បីគាំទ្រដល់ការធ្វើកូដកម្មរបស់និស្សិតពេទ្យកម្មសិក្សា ដែលធ្វើឱ្យវិបត្តិវេជ្ជសាស្ត្រនៅក្នុងប្រទេសនេះកាន់តែមានស្ថានភាពធ្ងន់ធ្ងរ។

 

អនុរដ្ឋមន្ត្រីក្រសួងសុខាភិបាល លោក Park Min-soo បាននិយាយនៅថ្ងៃទី១៣ ខែមីនាថា ប្រសិនបើសាស្រ្តាចារ្យពេទ្យក៏លាលែងពីតំណែងដែរនោះ គ្មានផ្លូវសម្រាប់គ្រូពេទ្យកម្មសិក្សាដែលបានចាកចេញពីកន្លែងធ្វើការត្រឡប់មកវិញនោះទេ។ នេះបើតាមសារព័ត៌មាន Yonhap។ 

 

លោក Park បានបន្ថែមថា គ្រូបង្រៀនពេទ្យនឹងបាត់បង់អ្នកជំងឺ ប្រសិនបើពួកគេលាលែងពីតំណែង ហើយរដ្ឋាភិបាលសុខចិត្តអង្គុយនៅតុចរចាជាមួយក្រុមសាគ្រូបង្រៀនទាំងនេះ។ កូរ៉េខាងត្បូង នឹងខិតខំប្រឹងប្រែងគ្រប់បែបយ៉ាងដើម្បីរារាំងសាស្រ្តាចារ្យពីការលាលែងពីតំណែង។ រដ្ឋាភិបាលមិនអាចរក្សាស្ថានភាពអាសន្នបច្ចុប្បន្នបានទេ ប្រសិនបើគ្រូបង្រៀនផ្នែកវេជ្ជសាស្រ្តធ្វើដូចគ្រូពេទ្យកម្មសិក្សាដទៃទៀត។ 

 

សេចក្តីថ្លែងការណ៍របស់អនុរដ្ឋមន្ត្រីក្រសួងសុខាភិបាលរូបនេះ ធ្វើឡើងក្នុងបរិបទនៃការកើនឡើងចំនួនគ្រូបង្រៀននៅតាមសាលាពេទ្យ មានគម្រោងដាក់សំណើសុំលាលែងពីតំណែង លុះត្រាតែរដ្ឋាភិបាលចាត់វិធានការជាក់លាក់ ដើម្បីកែលម្អស្ថានការណ៍កូដកម្មរបស់និស្សិតពេទ្យ។ 

 

ជាក់ស្តែង នៅថ្ងៃទី១១ខែមីនា គ្រូបង្រៀនសាលាវេជ្ជសាស្ត្រនៅសាកលវិទ្យាល័យជាតិសេអ៊ូល (SNU) គ្រោងនឹងដាក់សំណើសុំលាលែងពីតំណែងក្នុងសប្តាហ៍នេះ។ គ្រូបង្រៀនពេទ្យនៃសាកលវិទ្យាល័យកាតូលិកក៏បានព្រមានថា ពួកគេនឹងបន្តផ្អាកការវះកាត់ និងកាត់បន្ថយសកម្មភាពព្យាបាលទាំងអ្នកជំងឺខាងក្នុង និងអ្នកជំងឺក្រៅមន្ទីរពេទ្យ។
 

នៅថ្ងៃទី១២ ខែមីនា តំណាងមកពីសាលាពេទ្យចំនួន១៩ បានប្រមូលផ្តុំគ្នាក្នុងកិច្ចប្រជុំតាមប្រព័ន្ធអ៊ីនធឺណិត ដើម្បីពិចារណាលើផែនការសកម្មភាព ដោយសម្រេចប្រមូលមតិ រហូតដល់ល្ងាចថ្ងៃទី១៥ ខែមីនា។ នៅថ្ងៃដដែលនោះ រដ្ឋាភិបាលបានសម្រេចផ្តល់ថវិកាចំនួន ៩៤,៨ពាន់លានវ៉ុន (៧២,២ លានដុល្លារ) ដល់មន្ទីរពេទ្យរដ្ឋក្នុងឆ្នាំនេះ ដើម្បីដោះស្រាយកង្វះខាតធនធានមនុស្សនៅក្នុងវិស័យនេះ។