ដោយ៖អៀង សុខម៉ិញ/RFI ជាខេមរភាសា
ច្បាប់ស្តីពីបញ្ញាសិប្បនិម្មិត ដំបូងគេតែមួយគត់ត្រូវបានសភាអឺរ៉ុបអនុម័តនៅថ្ងៃពុធទី ១៣មីនា២០២៤ ដោយមានការគាំទ្រ ៥២៣សំឡេង ទល់នឹង៤៦ប្រឆាំង។ ជាច្បាប់ដែលសម្រួលដល់ការធ្វើទំនើបកម្មបច្ចេកវិទ្យាបញ្ញាសិប្បនិម្មិតនៅអឺរ៉ុបផង និងកំរិតគ្រោះថ្នាក់បង្កឡើងដោយបច្ចេកវិទ្យានេះផង។
កាលពីឆ្នាំមុន ចិននិងសហរដ្ឋអាមេរិកបានចេញវិធានស្តីពីបញ្ញាសិប្បនិម្មិតនេះហើយ តែពេលនេះ អឺរ៉ុបមានច្បាប់ស្តីពីការគ្រប់គ្រងបច្ចេកវិទ្យាបញ្ញាសិប្បនិម្មិតយ៉ាងពេញលេញតែម្តង។ សហភាពអឺរ៉ុប តាក់តែងច្បាប់នេះឡើងដោយផ្អែកលើច្បាប់ដែលមានស្រាប់ក្នុងវិស័យសន្តិសុខ និងដោយឈរលើមូលដ្ឋានត្រួតពិនិត្យហានិភ័យទាក់ទងប្រជាធិបតេយ្យ សុខភាពសាធារណៈសិទ្ធមនុស្ស និងនីតិរដ្ឋ។ ក្រោយការអនុម័តរបស់សភានៅថ្ងៃពុធទី១៣មីនា២០២៤នេះ អឺរ៉ុបនឹងចាប់អនុវត្តច្បាប់នេះមួយដំណាក់ម្តងៗ។
ការហាមឃាត់មិនឱ្យប្រើប្រាស់ប្រព័ន្ធបញ្ញាសិប្បនិម្មិតដែលចាត់ទុកថាមានគ្រោះថ្នាក់ខ្លាំង នឹងចូលជាធរមាននៅក្នុងឆ្នាំនេះតែម្តង។ ចំណែកច្បាប់ពាក់ព័ន្ធនឹងការកម្មវិធីបញ្ញាសិប្បនិម្មិត្តដូចយ៉ាងChatGPT ដែលមានសមត្ថភាពសរសេរតែងសេចក្តី តែងកំណាព្យ ឬសរសេរអត្ថបទស្មុគស្មាញក្នុងរយៈពេលតែពីរបីវិនាទី ត្រូវចាប់អនុវត្តនៅឆ្នាំក្រោយ និងចាប់ពីឆ្នាំ២០២៦ សម្រាប់វិធានការផ្សេងទៀត។
គណៈកម្មការអឺរ៉ុបបានបើកការិយាល័យបញ្ញាសិប្បនិម្មិតទទួលបន្ទុកគ្រប់គ្រងនិងត្រួតពិនិត្យការអនុវត្តច្បាប់រួចហើយ។ អំណើះតទៅ សហភាពអឺរ៉ុបមានច្បាប់ពិសេសសម្រាប់គ្រប់គ្រង កម្មវិធីបញ្ញាសិប្បនិម្មិតក្នុងបម្រើបម្រាស់ទូទៅប្រចាំថ្ងៃ ពោលគឺរ៉ូបូ។ អ្នកផលិតគំរូរ៉ូបូ ត្រូវផ្តល់ព័ត៌មានលម្អិតស្តីពីខ្លឹមសារ មានអាទិ៍ ឃ្លា អត្ថបទ រូបភាពដែលរ៉ូបូត្រូវចេះ និងគោរពកម្មសិទ្ធិបញ្ញាតាមច្បាប់អឺរ៉ុប។
កម្មវិធីឆ្លាតខ្លាំងដែលជាប្រព័ន្ធអាចមានបង្កប់គ្រោះថ្នាក់សម្រាប់ក្រសែភ្នែកអឺរ៉ុប ដូចជាកម្មវិធី ChatGPTរបស់ OpenAI ឬ Geminiរបស់Google ត្រូវស្ថិតនៅក្រោមច្បាប់កាន់តែតឹងតែង។ ក្រុមហ៊ុនអ្នកផលិតកម្មវិធីនេះ ត្រូវផ្តល់ការវាយតម្លៃ និងរបៀបស្រាយហានិភ័យ ដោយបញ្ជាក់ជាមុនអំពីគ្រោះថ្នាក់ដែលអាចកើតឡើងជាយថាហេតុ ព្រមទាំងធានាសុវត្ថិភាពខាងផ្នែកសន្តិសុខព័ត៌មានវិទ្យាទៀត។
ប្រព័ន្ធបញ្ញាសិប្បនិម្មិតប្រើក្នុងវិស័យសំខាន់ៗ រសើបៗខ្លាំង ដូចជាសេវាសុខាភិបាល ហេដ្ឋារចនាសម្ព័ន្ធ អប់រំ ធនធានមនុស្សនិងការរក្សាសណ្តាប់ធ្នាប់សង្គម ត្រូវមានកាតព្វកិច្ចគោរពតាមលក្ខខណ្ឌជាចាំបាច់។ ច្បាប់អឺរ៉ុបតម្រូវឱ្យប្រព័ន្ធបញ្ញាសិប្បនិម្មិតដែលអាចឆ្លើយឆ្លងជាមួយមនុស្សបាន ត្រូវបញ្ជាក់ប្រាប់ថានេះជាការប្រាស្រ័យទាក់ទងជាមួយម៉ាស៊ីន។ អ្នកផ្គត់ផ្គង់និងអភិវឌ្ឍកម្មវិធីបញ្ញាសិប្បនិម្មិតណាមិនគោរពច្បាប់អឺរ៉ុប អាចនឹងត្រូវទទួលការផាកពិន័យពី ៧លានអឺរ៉ូកន្លះទៅ ៣៥លានអឺរ៉ូ ឬត្រូវជា ១,៥%ទៅ៧%នៃប្រាក់ចំណូលពិភពលោក។
ផ្ទុយនឹងគោលការណ៍ជាមូលដ្ឋានរបស់អឺរ៉ុប គំរូឬកម្មវិធីបញ្ញាសិប្បនិម្មិតខ្លះត្រូវហាមឃាត់ដោយច្បាប់នៅក្នុងសហភាពអឺរ៉ុបតែម្តង គឺមានដូចជា ប្រព័ន្ធសម្គាល់ទឹកមុខ នៅក្នុងកន្លែងធ្វើការឬនៅសាលារៀន ប្រព័ន្ធសម្គាល់ឋានៈក្នុងសង្គមតាមរយៈឥរិយាបថ។ បច្ចេកវិទ្យាថតមុខសម្គាល់អត្តសញ្ញាណភ្លាមៗ ក៏ត្រូវបានហាមឃាត់ដោយច្បាប់អឺរ៉ុបដែរ លើកលែងមានសំណើសុំពីអាជ្ញាធរ ឬពីតុលាការ ដើម្បីអង្កេតភេរវកម្មឬបទឧក្រិដ្ឋធ្ងន់ធ្ងរណាមួយ តែត្រូវធ្វើក្នុងដែនបរិវេណច្បាស់លាស់ និងក្នុងរយៈពេលមានកំណត់៕