អន្តរជាតិ
យូនីសេហ្វព្រមានការបាត់បង់ជីវិតយ៉ាងមហន្តរាយនៅស៊ូដង់ ខណៈទុរ្ភិក្សកើតឡើង រូបភាព Reuters
× ទីភ្នាក់ងារកុមាររបស់អង្គការសហប្រជាជាតិ ឬយូនីសេហ្វ (UNICEF) នៅថ្ងៃទី១៥ ខែមីនា បាន លើកឡើងអំពីការបាត់បង់ជីវិតដ៏មហន្តរាយដែលអាចកើតមាននៅក្នុងស៊ូដង់ ខណៈសង្រ្គាមស៊ីវិល និងភាពអត់ឃ្លានកាន់តែអាក្រក់ទៅៗ និងបានអំពាវនាវឱ្យមានការកៀងគរធនធានយ៉ាងច្រើន។
កងកម្លាំងគាំទ្ររហ័សរបស់ស៊ូដង់ (RSF) បន្តប្រយុទ្ធជាមួយកងទ័ពរបស់ស៊ូដង់ដើម្បីប្រជែង យកការគ្រប់គ្រងប្រទេសនៅក្នុងសង្គ្រាមដែលបានសម្លាប់មនុស្សរាប់ពាន់នាក់ និងជម្លៀសមនុស្សរាប់លាននាក់នៅក្នុង និងក្រៅប្រទេស និងបង្កឱ្យមានការព្រមានអំពីគ្រោះទុរ្ភិក្សផងដែរ។
«សង្រ្គាមដ៏ឃោរឃៅនៅស៊ូដង់កំពុងរុញច្រានប្រទេសឆ្ពោះទៅរកគ្រោះទុរភិក្ស ហើយលុះត្រា តែមានឆន្ទៈនយោបាយ ការយកចិត្តទុកដាក់ និងធនធានគ្រប់គ្រាន់ដើម្បីឆ្លើយតបនៅពេល នេះ យើងកំពុងសម្លឹងមើលការបាត់បង់ជីវិតដ៏មហន្តរាយដែលអាចកើតមាន»។ នេះបើតាមការលើកឡើងរបស់ប្រធានប្រតិបត្តិការ និងគ្រាអាសន្នអង្គការយូនីសេហ្វនៅស៊ូដង់ លោកស្រី Jill Lawler នៅក្នុងសន្និសីទសង្ខេបរបស់អង្គការសហប្រជាជាតិ (UN) ក្នុងទីក្រុងហ្សឺណែវ។
លោកស្រីបានចូលរួមជាផ្នែកមួយនៃបេសកកម្មUN លើកដំបូងក្នុងការត្រឡប់ទៅរដ្ឋធានីខាទុំ ចាប់តាំងពីការប្រយុទ្ធគ្នារវាងកងទ័ព និង RSF បានចាប់ផ្តើមក្នុងខែមេសា ឆ្នាំ ២០២៣។ បេសកកម្មនេះបានសម្គាល់ឃើញកុមារខ្វះអាហារូបត្ថម្ភរស់នៅក្នុងមន្ទីរពេទ្យដែលស្ថិតនៅ ភាពខ្មៅងងឹត ដោយសារតែម៉ាស៊ីនភ្លើងមិនដំណើរការ។
លោកស្រីរៀបរាប់ ពីស្ថានភាពបន្ថែមថា លើសពីនេះ ទារកអាយុ ៣ ខែម្នាក់ឈឺយ៉ាងខ្លាំង ដោយសារតែម្តាយដែលមិនមានលទ្ធភាពទិញទឹកដោះគោ និងបានជំនួសទឹកដោះពពែដែល នាំឱ្យទារកនោះរាគ។ ភាពអត់ឃ្លានគឺរីករាលដាល និងគឺជាកង្វល់ទី ១ របស់ប្រជាពលរដ្ឋ។
ទីភ្នាក់ងារ UN មួយនេះធ្លាប់បានព្រមានថា កុមាររហូតដល់ ៣,៧ លាននាក់ត្រូវបានគេ ព្យាករណ៍ថានឹងខ្វះខាតអាហារូបត្ថម្ភយ៉ាងធ្ងន់ធ្ងរនៅឆ្នាំនេះនៅស៊ូដង់ រួមទាំង ៧៣ ម៉ឺននាក់ ដែលត្រូវការការព្យាបាលសង្គ្រោះជីវិត។ នៅកន្លែងមួយផ្សេងទៀត អ្នកជំងឺរហូតដល់ទៅបី សម្រាកព្យាបាលលើគ្រែតែមួយ៕
© រក្សាសិទ្ធិដោយ thmeythmey.com