នាយករដ្ឋមន្ត្រីថៃ លោក សេដ្ឋា ថាវីស៊ីន នៅថ្ងៃទី២០ ខែមីនា បានបង្ហាញការចាប់អារម្មណ៍ យកសត្វក្របីទឹក ធ្វើជាផ្នែកមួយនៃអំណាចទន់របស់ថៃដែលនឹងប្រើប្រាស់ ដើម្បីផ្សព្វផ្សាយលើឆាកអន្តរជាតិ និងព្រមទាំងមានសក្ដានុពលក្នុងការបង្កើនចំណូលជាតិទៀតផង។ ការយកក្របីទឹកដាក់ជាអំណាចទន់ នឹងជួយឱ្យតម្លៃកាន់តែកើនឡើងថែមទៀត។
លោក Jittanart Limthongkul ម្ចាស់ក្របី និងម្ចាស់កសិដ្ឋាន Vanasuwan Farm មានប្រសាសន៍ ថា លោកចង់ឱ្យរដ្ឋាភិបាលប្រើប្រាស់ក្របីថៃក្នុងការបង្ហាញពីអំណាចទន់។ ការអះអាងបែបនេះ ធ្វើឡើងក្រោយពីលោក បានដាក់បង្ហាញក្របីទឹក Ko Muang Phet នៅលើផ្លូវ Phra Athit ដែលបានទាក់ទាញចំណាប់អារម្មណ៍ពីអ្នកទេសចរជាច្រើន។ ក្របីKo Muang Phet មានតម្លៃរហូតដល់ ១៨ លានបាតឬ ៤៩,៩ ម៉ឺនដុល្លារ។
ក្រោយតំណាងសមាគមអ្នកបង្កាត់ក្របីថៃដាក់ស្នើទៅវិមានរដ្ឋាភិបាលអំពីសំណូមពរយកសត្វក្របីទឹកជាអំណាចទន់របស់ប្រទេស នាយករដ្ឋមន្ត្រីថៃ លោក សេដ្ឋា ថាវីស៊ីន បានអនុម័តគំនិតនេះភ្លាមៗតែម្ដង។ អ្នកបង្កាត់ពូជក៏បាននាំក្របីទឹក Ko Muang Phet ដែលជាក្របីឃ្លាចសធំ ជាងគេក្នុងពិភពលោកឱ្យលោកសេដ្ឋាទស្សនាផងដែរ។ ក្របីនេះមានអាយុ ៤ ឆ្នាំ ទម្ងន់ ១,៥តោន និងកម្ពស់១,៨ម៉ែត្រ ។
ក្របីទឹក ជាប្រភេទក្របី ដែលចូលចិត្តទឹកខ្លាំង ហើយវាចំណាយពេលស្ទើរតែពេញមួយថ្ងៃនៅក្នុងទឹក។ ក្របីប្រភេទនេះ មានកំណើតនៅក្នុងអាស៊ីអាគ្នេយ៍ អាម៉េរិកខាងត្បូង និងខាងជើង អ៊ីតាលី និងបណ្តាប្រទេសមួយចំនួនទៀត។
លោក Jittanart មានគម្រោងនាំក្របីយក្សជាច្រើនក្បាល រួមទាំង Ko Muang Phet ទៅចូល រួមពិធីសង្ក្រាន្តលេងទឹកនៅថ្ងៃទី ១៣ និង ១៤ ខែមេសា ហើយសម្គាល់ថា នាយករដ្ឋ មន្ត្រីបានណែនាំឱ្យធានាសុវត្ថិភាពសាធារណៈ។ ជាការឆ្លើយតបលោក Jittanart បានបញ្ជាក់ថា ក្របីទឹកមិនកាចនោះទេ ហើយថែមទាំងចូលចិត្តទឹកទៀតផង។
លោកនាយករដ្ឋមន្ត្រីសេដ្ឋា បានសន្យានឹងផ្សព្វផ្សាយក្របីថៃជាអំណាចទន់ ហើយលោកប្រាកដថា អ្នកទេសចរនឹងរំភើបចិត្តនៅពេលឃើញពួកវាជាផ្នែកមួយនៃពិធីបុណ្យសង្ក្រាន្តនៅខែក្រោយ។ ហើយលោកក៏បានបញ្ជាឱ្យអ្នកនាំពាក្យរដ្ឋាភិបាល និងក្រសួងកសិកម្ម និងសហករណ៍ធ្វើកម្មវិធីបង្ហាញក្របីថៃនៅចិនក្នុងខែឧសភាផងដែរ។
តាមរយៈសំណេរលើបណ្ដាញសង្គម X លោកសេដ្ឋាលើកឡើងថា ថៃមានកសិដ្ឋានក្របីជាច្រើនកន្លែង ហើយការដាក់ក្របីក្នុងអំណាចទន់ នឹងជួយឱ្យតម្លៃក្របីកាន់តែឡើងថ្លៃ។
«ប្រសិនបើក្របីយក្សចូលរួមក្នុងកម្មវិធីបង្ហាញតាមផ្លូវនៅចិន និងវៀតណាម តម្លៃរបស់វានឹងកើនឡើងភ្លាមៗ»។ នាយករដ្ឋមន្ត្រីថៃបានសង្កតើធ្ងន់បែបនេះផងដែរ។
ទន្ទឹមនេះ លោកសេដ្ឋា ក៏បានលើកឡើងពីការរៀបចំឱ្យមានផលិតផលពាក់ព័ន្ធនឹងក្របីផងដែរ ដូចជាទឹកដោះក្របី និងសុកក្របី និងការធ្វើវាលស្មៅសម្រាប់ចំណីក្របី ដែលទាំងអស់នេះនឹងបង្កើតប្រាក់ចំណូលដល់កសិករ ពោលគឺអាចកើនឡើងដល់ទៅបីដងជាងការធ្វើកសិកម្មស្រូវ៕