កីឡាជាតិ
ជាតិ
សម្តេច ហ៊ុន ម៉ាណែត ផ្តល់ថវិការ៨០០លានរៀល ទ្រទ្រង់ជនពិការ និងអត្តពលិកប៉ារ៉ាឡាំពិក រូបភាព៖ផេកហ្វេសប៊ុកសម្តេច ហ៊ុន ម៉ាណែត
× សម្តេចនាយករដ្ឋមន្ត្រី ហ៊ុន ម៉ាណែត ប្រកាសផ្តល់ថវិកា២០០លានរៀលក្នុងមួយឆ្នាំ និងបន្តផ្តល់រយៈពេល៣ឆ្នាំបន្តបន្ទាប់ទៀត សរុប៨០០លានរៀល ដល់មូលនិធិជនពិការសម្តេចតេជោ ដើម្បីទ្រទ្រង់ ជនពិការ និងអត្តពលិកប៉ារ៉ាឡាំពិកកម្ពុជា។ សម្តេច ក៏បានលើកសរសើរ គណៈកម្មាធិការជាតិប៉ារ៉ាឡាំពិកកម្ពុជា រួមទាំងកីឡាករ-ការិនីជនពិការ ដែលប្រឹងប្រែប្រជែងមេដាយយ៉ាងច្រើននៅរយៈពេលចុងក្រោយ។
ចូលរួមសម្ពោធសមិទ្ធផលមជ្ឈមណ្ឌលជាតិនៃជនពិការតេជោសែន និងគណៈកម្មាធិការជាតិប៉ារ៉ាអូឡាំពិកកម្ពុជា នៅព្រឹកថ្ងៃទី២១ ខែមីនា សម្តេចនាយករដ្ឋមន្ត្រី បានបង្ហាញការគិតគូ និង ធានាដល់ការធ្វើបរិយាប័ន្ន ក៏ដូចជាលើកកម្ពស់សិទ្ធិរស់រានមានជីវិតរបស់ជនមានពិការភាព ដើម្បីពួកគេទទួលបានសិទ្ធិដូចប្រជាជនដែលគ្មានពិការភាព។
រដ្ឋាភិបាល នឹងផ្តល់កាលានុវត្តភាព ចំពោះជនមានពិការភាពក្នុងការដឹកនាំ ផ្តល់សេវា ស្តារលទ្ធភាពពលកម្ម ផ្តល់និងរកការងារ បង្កើនសេដ្ឋកិច្ច ដើម្បីជនមានពិការភាពទទួលបានឱកាសពេញលេញចូលរួមគ្រប់សកម្មភាព នៅក្នុងសង្គម។
ជាក់ស្ដែង កីឡាការជនមានពិការភាព ក៏បានរួមចំណែកយ៉ាងសកម្មក្នុងការដណ្តើមមេដាយជាច្រើនជូនជាតិ។ តាមរយៈបេសកកម្មនេះ រាជរដ្ឋាភិបាលនឹងបន្តផ្តល់ការគាំទ្រទាំងផ្នែកស្មារតី និងគោលការណ៍ឧបត្ថម្ភគាំទ្រ សម្រាប់ជាការបំប៉ន និងលើកកម្ពស់បន្ថែមក្នុងការហ្វឹកហាត់ និងបច្ចេកទេសសម្រាប់គ្រប់ការប្រកួតនាពេលខាងមុខ។
តបតាមការស្នើសុំរបស់លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា (NPCC) សម្តេច ហ៊ុន ម៉ាណែត យល់ព្រមផ្តល់ថវិកា ៨០០លានរៀល ក្នុងរយៈពេល៤ឆ្នាំ ពោលក្នុងមួយឆ្នាំ ២០០លានរៀល គិតចាប់ពីឆ្នាំ ២០២៤ តទៅដល់មូលនិធិជនពិការសម្តេចតេជោ ដើម្បីទ្រទ្រង់ជនពិការ និងអត្តពលិកប៉ារ៉ាឡាំពិកកម្ពុជា។
«ខ្ញុំសូមអរគុណចំពោះថ្នាក់ដឹកនាំ មន្ត្រីរាជការ ជនពិការ និងបុគ្គលិកទាំងអស់នៃមជ្ឈមណ្ឌលជនពិការជាតិតេជោសែន និងគណៈកម្មាធិការជាតិប៉ារ៉ាឡាំពិកកម្ពុជា ដែលសម្រេចបានសមិទ្ធផលដូចសព្វថ្ងៃ»។ នេះជាការលើកឡើងរបស់សម្តេចនាយករដ្ឋមន្ត្រី មុនលោកទទួលយកសំណើធ្វើជាប្រធានកិត្តិយសមជ្ឈមណ្ឌលជាតិនៃជនពិការតេជោសែន។ សម្តេច ក៏បានលើកសរសើរអត្តពលិកប៉ារ៉ាឡាំពិកកម្ពុជា ដែលព្យាយាមតំណាងជាតិដណ្តើមបានមេដាយក្នុងព្រឹត្តិការណ៍កីឡាផ្សេងៗផងដែរ។
មជ្ឈមណ្ឌលជាតិនៃជនពិការតេជោសែន បានបង្កើតឡើងដោយក្រសួងសង្គមកិច្ច ការងារ និងអតីតយុទ្ធជន នៅថ្ងៃទី១០ ខែឧសភា ឆ្នាំ១៩៩៧ ក្នុងគោលបំណងផ្តល់សេវាស្តារនីតិសម្បទា ជំរុញកំណើនសេដ្ឋកិច្ច និងសម្រួលឱកាសការងារសម្រាប់ជនពិការ និងមានឱកាសស្មើគ្នាក្នុងការចូលរួមក្នុងសកម្មភាពសង្គម៕
Tag:
ប៉ារ៉ាឡាំពិកកម្ពុជា
ហ៊ុន ម៉ាណែត
យី វាសនា
© រក្សាសិទ្ធិដោយ thmeythmey.com