សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានបំពេញទស្សនកិច្ចនៅឡាវចាប់ពីថ្ងៃទី២៥ ដល់ថ្ងៃទី២៦ ខែមីនា ក្នុងការស្វះស្វែងរកកិច្ចសហប្រតិបត្តិការ និងពង្រឹងទំនាក់ទំនងទ្វេភាគីជាមួយប្រទេសជិតខាង។ ក្នុងសន្និសីទសារព័ត៌មានរួមគ្នានៅក្នុងថ្ងៃទី២៥ ខែមីនា សម្តេចហ៊ុន ម៉ាណែត បានប្រកាសគាំទ្រឡាវយ៉ាងពេញលេញ ក្នុងការធ្វើជាប្រធានអាស៊ានផ្លាស់វេននៅក្នុងឆ្នាំ២០២៤។

 

«កម្ពុជាសូមចូលរួមជាមួយមិត្តឡាវនូវនូវថវិកា ១លានដុល្លារសម្រាប់រៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ»។ សម្តេចបានប្រកាសបែបនេះ ដោយបង្ហាញពីសុទិដ្ឋិនិយមលើកិច្ចសហប្រតិបត្តិការ និងទំនាក់ទំនងទ្វេភាគីផងដែរ។ 

 

ចំណែកសមភាគីឡាវ លោក សុនសៃ ស៊ីផាន់ដន បានបញ្ជាក់ថា ប្រទេសជិតខាងទាំងពីរ បានឯកភាពបន្តអនុវត្តកិច្ចព្រមព្រៀង និងអនុស្សរណៈ ដែលមានស្រាប់ ហើយសន្យាអភិវឌ្ឍកិច្ចសហប្រតិបត្តិការប្រកបដោយប្រសិទ្ធភាព និងស៊ីជម្រៅ។ 

 

ប្រមុខរដ្ឋាភិបាលកម្ពុជាក៏បានអញ្ជើញសមភាគីឡាវឱ្យចូលរួមក្នុងកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន នៅចុងឆ្នាំ២០២៤ ផង។ 

 

បន្ថែមពីនេះ មេដឹកនាំទាំងពីរ បានពិនិត្យលើពិធីចុះហត្ថលេខាកិច្ចសហប្រតិបត្តិការចំនួន ៧ពាក់ព័ន្ធនឹងថាមពល ព្រំដែន និងការទិញថាមពលស្អាតជាដើម៕